ຍານແຄັບຊູນຂອງໂບອິ້ງ ທີ່ບໍ່ສາມາດເຊື່ອມຈອດກັບສະຖານີອະວະກາດນານາຊາດ ກັບເຖິງໂລກແລ້ວ

ລາຍງານ 23 ທັນວາ 2019, ອົງການບໍລິຫານການບິນ ແລະ ອະວະກາດແຫ່ງຊາດສະຫະລັດ ອາເມຣິກາ (NASA) ອອກຖະແຫຼງການວ່າ ຍານແຄັບຊູນອະວະກາດ CST-100 Starliner ຂອງບໍລິສັດໂບອິ້ງ ໄດ້ລົງຈອດກາງທະເລຊາຍຂາວ ໃນລັດນິວແມັກຊິໂກ ທາງພາກຕາເວັນຕົກສຽງໃຕ້ ສ.ອາເມຣິກາ ເມື່ອເວລາ 07:58 ນາທີ ຕາມເວລາທ້ອງຖິ່ນ ຂອງວັນທີ 22 ທັນວາ ທີ່ຜ່ານມາ ພາຍຫຼັງໂຄຈອນຢູ່ນອກໂລກໃນພາວະວິກິດຍາວນານ 48 ຊົ່ວໂມງ.

ເຊິ່ງບໍ່ດົນພາຍຫຼັງທີ່ຍານແຄັບຊູນ Starliner ອອກເດີນທາງຈາກຖານປ່ອຍຈະຫຼວດພາຍໃນສູນອະວະກາດແຄນເນດີ ແຫຼມຄານາເວໂຣ ໃນລັດຟໍຣິດາ ເມື່ອວັນສຸກ ທີ 20 ທັນວາ ທີ່ຜ່ານມາ ລາຍງານຂອງ NASA ລະບຸວ່າ: ເກີດຄວາມຜິດພາດທາງເຕັກນິກບາງຢ່າງ ສົ່ງຜົນໃຫ້ຍານ Starliner ເຄື່ອນທີ່ຜິດວົງໂຄຈອນ NASA ຈຶ່ງສັ່ງຍົກເລີກການເຊື່ອມຕໍ່ລະຫວ່າງຍານແຄັບຊູນລຳດັ່ງກ່າວ ກັບສະຖານີອະວະກາດນານາຊາດ (ISS), ຂະນະທີ່ໂບອິ້ງຍັງຄົງໃຫ້ຂໍ້ມູນໃນເບື້ອງຕົ້ນພຽງວ່າ ເປັນຄວາມຂັດຂ້ອງຂອງລະບົບຊັອບແວ ແລະ ທັນທີທີ່ຍານລົງຈອດ ທີມງານຂອງໂບອິ້ງ ແລະ NASA ໄດ້ເຂົ້າໄປກວດສອບສະພາບທັນທີ ເຊິ່ງໂດຍລວມຢູ່ໃນສະພາບດີ ມີຮ່ອງຮອຍໄໝ້ເລັກໜ້ອຍ ເຊິ່ງເປັນທຳມະດາຈາກການສຽດສີກັບຊັ້ນບັນຍາກາດໂລກດ້ວຍຄວາມໄວສູງ ສ່ວນຄວາມກົດອາກາດ ແລະ ອຸນຫະພູມພາຍໃນຍານຍັງປົກກະຕິ.

ເຖິງຢ່າງໃດກໍ່ຕາມ, ການທີ່ຍານ Starliner ເປີດໂຕຢ່າງລົ້ມແຫຼວ ໄດ້ເພີ່ມບົດຮຽນສຳຄັນໃຫ້ກັບໂບອິ້ງອີກຄັ້ງໜຶ່ງ, ໃນຂະນະທີ່ທາງບໍລິສັດໄດ້ກຽມໂຈະການຜະລິດຍົນໂດຍສານຕະກູນ 737 Max ໃນເດືອນມັງກອນປີໜ້າ ພາຍຫຼັງເກີດເຫດໂສກອະນາດຕະກຳກັບຍົນຮຸ້ນນີ້ແລ້ວ 2 ຄັ້ງ ສົ່ງຜົນໃຫ້ມີຜູ້ເສຍຊີວິດລວມກັນ 346 ຄົນ, ແຕ່ NASA ຍັງຄົງເຊື່ອໝັ້ນວ່າເຫດການຄັ້ງນີ້ຈະບໍ່ສົ່ງຜົນກະທົບຕໍ່ແຜນການກັບມາສົ່ງລູກເຮືອເດີນທາງສູ່ອະວະກາດ ພາຍຫຼັງຢຸດຕິເມື່ອປີ 2011 ນັບຕັ້ງແຕ່ພາລະກິດຍານແອັດແລນຕິສ ໂດຍ NASA ໄດ້ຈ້າງໂບອິ້ງ ແລະ ສະເປສເອັກໃຫ້ຜະລິດຍານແຄັບຊູນສົ່ງນັກບິນອະວະກາດຂຶ້ນສູ່ ISS ຖ້ຽວລະ 4 ຄົນ ຈຳນວນ 6 ຖ້ຽວ ເຊິ່ງມີການວາງແຜນການເດີນທາງຖ້ຽວທຳອິດໃນປີໜ້າ ແລະ ຖ້ຽວສຸດທ້າຍຕາມສັນຄາຄືພາຍໃນປີ 2024.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube