ປ.ປູຕິນ ກ່າວວ່າລັດເຊຍຄືຜູ້ນຳໂລກ ດ້ານອາວຸດໄຮເປີໂຊນິກ ທີ່ມີຄວາມໄວເໜືອສຽງ

ລາຍງານ 25 ທັນວາ 2019, ທ່ານ ວະລາດິເມຍ ປູຕິນ ປະທານປະເທດລັດເຊຍ ກ່າວຕໍ່ກອງປະຊຸມທະຫານ ແລະ ເຈົ້າໜ້າທີ່ລະດັບສູງຂອງສູນປ້ອງກັນປະເທດ ໃນນະຄອນຫຼວງມົດສະກູ ເມື່ອວັນອັງຄານ 24 ທັນວາ ທີ່ຜ່ານມາ ວ່າເປັນຄັ້ງທຳອິດໃນປະຫວັດສາດທີ່ລັດເຊຍກ້າວຂຶ້ນມາເປັນຜູ້ນຳໂລກ ໃນດ້ານການພັດທະນາອາວຸດ ແຕກຕ່າງຈາກໃນອະດີດທີ່ລັດຖະບານລັດເຊຍ ເປັນຮອງພຽງສະຫະລັດ ອາເມຣິກາ, ໂດຍທ່ານ ປູຕິນ ກ່າວໄປເຖິງສະໄໝສົງຄາມເຢັນທີ່ສະຫະພາບໂຊວຽດຕາມຫຼັງ ສ.ອາເມຣິກາໃນໂຄງການລະເບີດນິວເຄຼຍ, ການອອກແບບ ແລະ ການພັດທະນາອາວຸດທາງຍຸດທະສາດ ແລະ ຂີປະນາວຸດຂ້າມທະວີບ.

ເຊິ່ງຜູ້ນຳລັດເຊຍຢືນຢັນວ່າ ແຕ່ໃນປະຫວັດສາດຍຸກໃໝ່ຍັງບໍ່ມີປະເທດໃດມີອາວຸດໄຮເປີໂຊນິກ ຫຼື ອາວຸດຄວາມໄວເໜືອສຽງໄວໃນຄອບຄອງ ຫຼື ແມ່ນແຕ່ການສະແດງແສນຍານຸພາບຂອງອາວຸດໄຮເປີໂຊນິກໃຫ້ເປັນທີ່ຮັບຮູ້ຂອງຊາວໂລກ, ເປັນຄວາມຈິງທີ່ ສ.ອາເມຣິກາ ແລະ ອີກຫຼາຍປະເທດຕ່າງກໍ່ດັກຊຸ້ມພັດທະນາອາວຸດຊະນິດນີ້ເຊັ່ນກັນ ແຕ່ຍັງບໍ່ສຳເລັດ.

ເຊິ່ງລັດຖະບານລັດເຊຍໄດ້ທົດສອບປະສິດທິພາບຂອງຕົ້ນແບບຂີປະນາວຸດຄວາມໄວເໜືອສຽງຊື່ Avangrad ຫຼື YU-71 ແລະ YU-74 ເມື່ອເດືອນທັນວາ 2018 ແລະ ກຽມນຳອາວຸດັ່ງກ່າວເຂົ້າປະຈຳການໃນກອງທັບພາຍໃນທ້າຍປີນີ້, ຂະນະທີ່ຂີປະນາວຸດຄວາມໄວເໜືອສຽງອີກຮຸ້ນໜຶ່ງຊື່ Kinzhal ຜ່ານການທົດສອບເມື່ອເດືອນມີນາ 2018 ແລະ ເຂົ້າປະຈຳການໃນກອງທັບຮຽບຮ້ອຍແລ້ວ ເຊິ່ງໂຄງການພັດທະນາຂີປະນາວຸດໄຮເປີໂຊນິກເປັນໜຶ່ງໃນແຜນຍຸດທະສາດຍົກລະດັບຄວາມສາມາດໃນການປ້ອງກັນປະເທດຂອງລັດເຊຍ.

ນອກຈາກນີ້, ທ່ານ ປູຕິນ ສະແດງຄວາມເປັນຫ່ວງຕໍ່ການທີ່ອົງການສົນທິສັນຍາອາກລັງຕິກເໜືອ (NATO) ເດີນໜ້າເສີມສ້າງຄວາມເຂັ້ມແຂງໃຫ້ກັບແນວຮົບທາງຕາເວັນອອກຂອງເອີຣົບ ເຊິ່ງຕິດກັບພາກຕາເວັນຕົກຂອງລັດເຊຍ ແລະ ການທີ່ ສ.ອາເມຣິກາ ກັບ ລັດເຊຍໄດ້ຢຸດຕິສົນທິຍັນສາອາວຸດນິວເຄຼຍພິໄສກາງ ທີ່ລົງນາມຮ່ວມກັນເມື່ອປີ 1987 ໃນປີນີ້ ສົ່ງຜົນໃຫ້ເຫຼືອສົນທິສັນຍາຮ່ວມມືກ່ຽວຂ້ອງພຽງສະບັບດຽວຄື: ສົນທິສັນຍາ ວ່າດ້ວຍການຫຼຸດຈຳນວນອາວຸດນິວເຄຼຍ ເຊິ່ງຈະຄົບກຳນົດອາຍຸການມີຜົນບັງຄັບໃຊ້ 10 ປີ ພາຍໃນເດືອນກຸມພາ 2021 ວ່າຈຶ່ງເປັນເຫດຜົນທີ່ລັດເຊຍຕ້ອງມີອາວຸດທີ່ດີທີ່ສຸດ, ດ້ານ ສ.ອາເມຣິກາ ຍັງບໍ່ສະແດງທ່າທີຢ່າງເປີດເຜີຍ ແຕ່ໄດ້ທົດລອງຕົ້ນແບບຂອງຂີປະນາວຸດພິໄສກາງຮຸ້ນໃໝ່ເມື່ອຕົ້ນເດືອນນີ້.