ສາມມະຫາອຳນາດອາຊີຕາເວັນອອກ ຍົກລະດັບການຮ່ວມມືດ້ານການຄ້າ ແລະ ຄວາມໝັ້ນຄົງ

ລາຍງານ 26 ທັນວາ 2019, ທ່ານ ຫຼີ ເຄີ້ສຽງ ນາຍົກລັດຖະມົນຕີຂອງຈີນ ແລະ ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນ ພົບປະສອງຝ່າຍ ນອກຮອບກອງປະຊຸມສາມຝ່າຍຮ່ວມກັບເກົາຫຼີໃຕ້ ທີ່ເມືອງເສິງຕູ ມົນທົນເສສວນ ເມື່ອວັນພຸດ 25 ທັນວາ ທີ່ຜ່ານມາ, ໂດຍທ່ານ ຊິນໂຊ ອາເບະ ກ່າວໃນຕອນໜຶ່ງວ່າ ລັດຖະບານຍີ່ປຸ່ນມີຄວາມມຸ່ງໝັ້ນທີ່ຈະຍົກລະດັບສາຍພົວພັນກັບລັດຖະບານຈີນທີ່ກຳລັງແໜ້ນແຟ້ນ ໃຫ້ມີຄວາມກ້າວໜ້າໃນດ້ານບວກຍິ່ງຂຶ້ນກວ່າເກົ່າ ເພື່ອຊຸກດັນໃຫ້ເກີດການຮ່ວມມືໃນລະດັບສູງຢ່າງໝັ້ນຄົງ ບໍ່ວ່າຈະເປັນການແລກປ່ຽນການຢ້ຽມຢາມຂອງການນຳຂັ້ນສູງ ແລະ ການເຈລະຈາຮ່ວມກັນຕາມແນວທາງສັນຕິ.

ໃນດ້ານຂອງນາຍົກລັດຖະມົນຕີຈີນ ສະແດງຄວາມເພິ່ງພໍໃຈກັບລະດັບສາຍພົວພັນກັບຍີ່ປຸ່ນໃນເວລານີ້ ທີ່ມີທິດທາງກັບຄືນສູ່ພາວະປົກກະຕິ ແລະ ເຫັນດີຮ່ວມກັນໃນການໃສ່ໃຈປັບປຸງການຮ່ວມມືສອງຝ່າຍ ໂດຍທ່ານ ຫຼີ ເຄີ້ສຽງ ກ່າວວ່າຈີນມີແຜນເປີດກວ້າງດ້ານອຸດສາຫະກຳບໍລິການໃຫ້ກັບຍີ່ປຸ່ນ ແລະ ການຮ່ວມມືດ້ານເສດຖະກິດອື່ນໆ ເຊິ່ງລວມເຖິງການເດີນໜ້າເຈລະຈາຈັດຕັ້ງຂໍ້ຕົກລົງການຄ້າສາມຝ່າຍລະຫວ່າງຈີນ, ຍີ່ປຸ່ນ ແລະ ເກົາຫຼີໃຕ້ ທີ່ຫາກປະສົບຄວາມສຳເລັດ ຈະເປັນໜຶ່ງໃນຂໍ້ຕົກລົງການຄ້າ ທີ່ມີມູນຄ່າທາງເສດຖະກິດສູງທີ່ສຸດໃນໂລກ.

ເຊິ່ງຈີນ, ຍີ່ປຸ່ນ ແລະ ເກົາຫຼີໃຕ້ ເປັນປະເທດທີ່ມີມູນຄ່າຂອງຜະລິດຕະພັນລວມຍອດພາຍໃນປະເທດ (GDP) ເປັນອັບດັບ 2, 3 ແລະ 12 ຂອງໂລກ ແລະ ອັນດັບ 1, 2 ແລະ 4 ຂອງທະວີບອາຊີ ຕາມການຈັດອັນດັບຂອງທະນຄານໂລກ ແລະ ກອງທຶນການເງິນລະຫວ່າງປະເທດ, ຂະນະທີ່ມູນຄ່າການຄ້າລະຫວ່າງທັງສາມປະເທດມີເຖິງ 720,000 ລ້ານໂດລາສະຫະລັດ ໃນປີ 2018.

ເຖິງຢ່າງໃດກໍ່ຕາມ, ຄວາມຂັດແຍ່ງເລື່ອງນະໂຍບາຍຄວາມໝັ້ນຄົງຂອງແຕ່ລະປະເທດ ແລະ ຄວາມຂັດແຍ່ງເລື່ອງດິນແດນຍັງຄົງເປັນອຸປະສັກສຳຄັນ ທີ່ສົ່ງຜົນໃຫ້ຄວາມພະຍາຍາມໃນການສົ່ງເສີມການຮ່ວມມືທາງເສດຖະກິດສາມຝ່າຍບໍ່ອາດເປັນໄປໄດ້ຢ່າງຫຼ່ຽນໄຫຼ, ໂດຍຈີນ ແລະ ຍີ່ປຸ່ນຍັງຕ້ອງຫາແນວທາງຜ່ອນຄາຍບັນຫາຄວາມຂັດແຍ່ງເລື່ອງໝູ່ເກາະຕຽວຫຍູ ຫຼື ເຊນກາກຸໃນທະເລຈີນຕາເວັນອອກ, ສ່ວນຍີ່ປຸ່ນ ແລະ ເກົາຫຼີໃຕ້ກໍ່ຂັດແຍ່ງກັນເລື່ອງໝູ່ເກາະທາເຄຊິມະ ຫຼື ດັອກໂດ ໃນທະເລຍີ່ປຸ່ນ, ເຖິງຢ່າງໃດກໍ່ຕາມທັງສາມປະເທດສະແດງຈຸດຢືນຮ່ວມກັນຢ່າງໜັກແໜ້ນໃນການປະຊຸມຄັ້ງນີ້ ວ່າຕ້ອງການຍົກລະດັບການຮ່ວມມືສາມຝ່າຍ.

ເຊິ່ງເມື່ອວັນອັງຄານ 24 ທັນວາ ທີ່ຜ່ານມາ, ທ່ານ ມູນ ແຈ-ອິນ ປະທານປະເທດເກົາຫຼີໃຕ້ ກໍ່ໄດ້ພົບປະສອງຝ່າຍກັບທ່ານ ຊິນໂຊ ອາເບະ ໂດຍຜູ້ນຳທັງສອງໃຊ້ເວລາໃນການປຶກສາຫາລືກັນປະມານ 45 ນາທີ ໂດຍຜູ້ນຳຍີ່ປຸ່ນໄດ້ຍົກປະເດັນຄຳຕັດສິນຂອງສານເກົາຫຼີໃຕ້ເມື່ອທ້າຍເດືອນຕຸລາ ປີທີ່ຜ່ານມາໃຫ້ບໍລິສັດນິບປອນ ສະຕິວ ແລະ ບໍລິສັດ ມິດຊູບິຊິ ຈ່າຍຄ່າຊົດເຊີຍໃຫ້ແກ່ຍາດພີ່ນ້ອງຂອງແຮງງານທາດສະໄໝສົງຄາມໂລກ ຄັ້ງທີ II ເຊິ່ງລັດຖະບານຍີ່ປຸ່ນກ່າວຢ້ຳມາຕະຫຼອດ ວ່າຍີ່ປຸ່ນກັບເກົາຫຼີໃຕ້ລົງນາມຍຸຕິກໍລະນີຄວາມຂັດແຍ່ງຕໍ່ບັນຫາດັ່ງກ່າວ ມາຕັ້ງແຕ່ປີ 1965 ແລ້ວ ເຊິ່ງເປັນປີດຽວກັນກັບທີ່ທັງສອງປະເທດລົງນາມຂໍ້ຕົກລົງຟື້ນຟູສາຍພົວພັນທາງການທູດລະຫວ່າງກັນ.

ເຊິ່ງທ່ານ ຊິນໂຊ ອາເບະ ກ່າວກັບທ່ານ ມູນ ແຈ-ອິນ ວ່າຄຳຕັດສິນຂອງສານສູງສຸດເກົາຫຼີໃຕ້ ຕໍ່ບັນຫາດັ່ງກ່າວ ຄືຊະນວນເຫດທີ່ສົ່ງຜົນໃຫ້ສາຍພົວພັນສອງຝ່າຍເຄັ່ງຕຶງ ແລະ ຍົກລະດັບຄວາມຮຸນແຮງຂອງຄວາມຂັດແຍ່ງລະຫວ່າງກັນ ພ້ອມທັງຮຽກຮ້ອງໃຫ້ລັດຖະບານເກົາຫຼີໃຕ້ ເປັນຝ່າຍສະເໜີແນວທາງແກ້ໄຂບັນຫາກ່ອນ ເພາະເປັນຜູ້ຜູກມັດບັນຫາຄັ້ງນີ້ຂຶ້ນມາເອງ ແລະ ຢືນຢັນວ່າຍີ່ປຸ່ນຕ້ອງການສົ່ງເສີມສາຍພົວພັນກັບເກົາຫຼີໃຕ້ໃນທຸກດ້ານ.

ຂະນະທີ່ທ່ານ ມູນ ແຈ-ອິນ ສະແດງຄວາມຍິນດີທີ່ໄດ້ພົບປະຫາລືກັບນາຍົກລັດຖະມົນຕີຍີ່ປຸ່ນ ເຊິ່ງເປັນການສົນທະນາຢ່າງເປັນທາງການຄັ້ງທຳອິດໃນຮອບ 1 ປີເຄິ່ງ ຫາກບໍ່ນັບການທີ່ທັງສອງມີໂອກາດໂອ້ລົມກັນລະຫວ່າງກອງປະຊຸມອາຊຽນ ທີ່ນະຄອນຫຼວງບາງກອງ ປະເທດໄທ ເມື່ອເດືອນພະຈິກ ທີ່ຜ່ານມາ ແລະ ຢືນຢັນວ່າການແກ້ໄຂບັນຫາຄວາມທ້າທາຍທັງຫຼາຍ ລະຫວ່າງເກົາຫຼີໃຕ້ກັບຍີ່ປຸ່ນ ຄືໜຶ່ງໃນວາລະຮີບດ່ວນຂອງລັດຖະບານເກົາຫຼີໃຕ້ ເຊິ່ງຕໍ່ມາແຫຼ່ງຂ່າວໃນຄະນະຜູ້ຕິດຕາມຂອງທ່ານ ຊິນໂຊ ອາເບະ ແລະ ທ່ານ ມູນ ແຈ-ອິນ ໃຫ້ຂໍ້ມູນກົງກັນວ່າ ຜູ້ນຳທັງສອງປະເທດຕົກລົງຈັດກອງປະຊຸມຮ່ວມກັນທັງໃນລະດັບເຈົ້າໜ້າທີ່ຝ່າຍປະຕິບັດງານ ແລະ ເຈົ້າໜ້າທີ່ລະດັບສູງໃນອະນາຄົດ.

ນອກຈາກນີ້, ເມື່ອວັນຈັນ 23 ທັນວາ ທີ່ຜ່ານມາ ທ່ານ ມູນ ແຈ-ອິນ ໄດ້ເຂົ້າພົບທ່ານ ສີ ຈິ້ນຜິງ ປະທານປະເທດຈີນ ກ່ອນການປະຊຸມສາມ, ເຊິ່ງຜູ້ນຳຈີນກ່າວວ່າ ລັດຖະບານຈີນສະໜັບສະໜູນຄວາມພະຍາຍາມຂອງລັດຖະບານເກົາຫຼີໃຕ້ ໃນການຟື້ນຟູສາຍພົວພັນກັບເກົາຫຼີເໜືອ ແລະ ພ້ອມຊຸກດັນໃຫ້ເກີດການເຈລະຈາສັນຕິພາບຄັ້ງໃໝ່ລະຫວ່າງສອງເກົາຫຼີ.

ຂະນະທີ່ຜູ້ນຳເກົາຫຼີໃຕ້ກ່າວວ່າ ການເຈລະຈາວ່າດ້ວຍການປົດນິວເຄຼຍລະຫວ່າງລັດຖະບານເກົາຫຼີເໜືອ ກັບ ສ.ອາເມຣິກາ ເຊິ່ງບໍ່ມີຄວາມຄືບໜ້າຫຍັງ ນັບຕັ້ງແຕ່ກອງປະຊຸມລະຫວ່າງທ່ານຄິມ ຈອງ-ອຶນ ຜູ້ນຳສູງສຸດເກົາຫຼີເໜືອ ກັບ ທ່ານ ໂດໂນ ທຣຳ ປະທານປະເທດ ສ.ອາເມຣິກາ ທີ່ນະຄອນຫຼວງຮ່າໂນ້ຍ ປະເທດຫວຽດນາມ ເມື່ອເດືອນກຸມພາ ທີ່ຜ່ານມາ ແລະ ສາຍພົວພັນລະຫວ່າງເກົາຫຼີເໜືອ ກັບ ສ.ອາເມຣິກາ ຫຼັງຈາກນັ້ນກໍ່ເຄັ່ງຕຶງຂຶ້ນຕາມລຳດັບ ໂດຍສະເພາະການທີ່ເກົາຫຼີເໜືອທົດລອງອາວຸດຫຼາຍກວ່າ 10 ຄັ້ງນັບຕັ້ງແຕ່ເດືອນພຶດສະພາ ທີ່ຜ່ານມາ ອັນບໍ່ເປັນຜົນດີກັບລັດຖະບານເກົາຫຼີເໜືອ, ເຊິ່ງເກົາຫຼີໃຕ້ມີຄວາມຍິນດີຕໍ່ການທີ່ຈີນມີບົດບາດສຳຄັນ ກັບສະຖານະການຢູ່ແຫຼມເກົາຫຼີ ແລະ ຫວັງເປັນຢ່າງຍິ່ງວ່າທັງສອງປະເທດຈະສາມາດປະຕິບັດງານຮ່ວມກັນຕໍ່ບັນຫາດັ່ງກ່າວຢ່າງໃກ້ຊິດຍິ່ງຂຶ້ນ ເພື່ອຜົນປະໂຫຍດຮ່ວມກັນຂອງທຸກຝ່າຍ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube