ລັດເຊຍປະກາດວ່າ ໄດ້ປະຈຳການຂີປະນາວຸດໄຮເປີໂຊນິກ ຄວາມໄວເໜືອສຽງ 27 ເທົ່າ ໃນກອງທັບແລ້ວ

ລາຍງານ 28 ທັນວາ 2019, ກະຊວງປ້ອງກັນປະເທດລັດເຊຍ ອອກຖະແຫຼງການເມື່ອວັນສຸກ 27 ທັນວາ ທີ່ຜ່ານມາ ວ່າທ່ານ ພົນເອກ ເຊີເກ ຊອຍກູ ລັດຖະມົນຕີກະຊວງປ້ອງກັນປະເທດ ໄດ້ແຈ້ງໄປຍັງທ່ານ ວະລາດິເມຍ ປູຕິນ ປະທານປະເທດລັດເຊຍ ເພື່ອຊາບກ່ຽວກັບການທີ່ກອງທັບລັດເຊຍນຳຂີປະນາວຸດໄຮເປີໂຊນິກ ຫຼື ຂີປະນາວຸດຄວາມໄວເໜືອສຽງ “Avangrad” ເຂົ້າປະຈຳການເປັນທີ່ຮຽບຮ້ອຍແລ້ວ ແຕ່ບໍ່ໄດ້ລະບຸສະຖານທີ່ຊັດເຈນ.

ເຊິ່ງ “Avangrad” ຄື 1 ໃນ 6 ອາວຸດທາງຍຸດທະສາດໃໝ່ ທີ່ຜູ້ນຳລັດເຊຍເປີດຕົວເມື່ອເດືອນມີນາ ປີທີ່ຜ່ານມາ ໂດຍ “Avangrad” ສາມາດທົນແຮງສຽດສີຈາກອຸນຫະພູມໄດ້ສູງສຸດ 2,000 ອົງສາເຊ ເດີນທາງດ້ວຍຄວາມໄວເໜືອສຽງ 27 ເທົ່າ ແລະ ສາມາດຕິດຕັ້ງຫົວຮົບນິວເຄຼຍທີ່ມີນ້ຳໜັກສູງສຸດ 2 ເມກະຕັນ.

ສຳລັບການທົດສອບປະສິດທິພາບຂອງ “Avangrad” ທີ່ມີລະຫັດສະເພາະຄື YU-71 ແລະ YU-74 ເກີດຂຶ້ນເປັນຄັ້ງທຳອິດເມື່ອທ້າຍເດືອນທັນວາ 2018 ເຊິ່ງຂີປະນາວຸດເດີນທາງອອກຈາກຖານຍິງດອມບາຣັອບສະກີ ຕັ້ງຢູ່ທາງທິດໃຕ້ຂອງສາຍພູຢູຣັນ ທີ່ແກ່ຍາວໄປຕາມຊາຍແດນເບື້ອງຕາເວັນຕົກຈາກພາກເໜືອສູ່ພາກໃຕ້ຂອງປະເທດ ແລະ ສາມາດທຳລາຍເປົ້າໝາຍທີ່ຢູ່ຫ່າງອອກໄປທາງທິດຕາເວັນອອກໄກ 6,000 ກິໂລແມັດ ໄດ້ຢ່າງແມ້ນຢຳ, ຂະນະທີ່ສື່ທ້ອງຖິ່ນຫຼາຍແຫ່ງລາຍງານວ່າ ລັດຖະບານລັດເຊຍມີແຜນຕິດຕັ້ງ “Avangrad” ກັບຂີປະນາວຸດຂ້າມທະວີບ(ICMB) ຮຸ້ນ RS-18B ທີ່ຜະລິດໃນສະໄໝສະຫະພາບໂຊວຽດ ແລະ ICBM ຮຸ້ນໃໝ່ RS-28 Sarmat.

ເຊິ່ງທ່ານ ປູຕິນ ໄດ້ກ່າວເມື່ອວັນທີ 24 ທັນວາ ທີ່ຜ່ານມາ ວ່າລັດເຊຍຄືຜູ້ນຳໂລກ ໃນດ້ານການພັດທະນາອາວຸດຄວາມໄວເໜືອສຽງ ແລະ ຈຳເປັນຕ້ອງຮີບດ່ວນພັດທະນາ “Avangrad” ລວມເຖິງອາວຸດຄວາມໄວເໜືອສຽງອີກຫຼາຍປະເພດໃຫ້ດີທີ່ສຸດ ເນື່ອງຈາກ ສ.ອາເມຣິກາ ກຳລັງດັກຊຸ້ມພັດທະນາເຕັກໂນໂລຊີແບບດຽວກັນ, ຂະນະທີ່ລັດຖະບານ ສ.ອາເມຣິກາ ຍັງບໍ່ສະແດງທ່າທີຢ່າງເປັນທາງການ ປັດຈຸບັນທັງສອງປະເທດເຫຼືອສົນທິສັນຍາການຮ່ວມມືສອງຝ່າຍດ້ານອາວຸດແຕ່ພຽງສະບັບດຽວຄື ສົນທິສັນຍາ ວ່າດ້ວຍການຫຼຸດຈຳນວນອາວຸດນິວເຄຼຍຊື່ New Start ເຊິ່ງຈະຄົບກຳນົດອາຍຸການມີຜົນບັງຄັບໃຊ້ 10 ປີ ໃນເດືອນກຸມພາ 2021 ອັນໄດ້ເພີ່ມຄວາມເປັນຫ່ວງໃຫ້ແກ່ຫຼາຍຝ່າຍ ວ່າລັດເຊຍ ແລະ ສ.ອາເມຣິກາ ທີ່ມີຫົວຮົບນິວເຄຼຍໃນຄອບຄອງຫຼາຍເປັນອັນດັບ 1 ແລະ 2 ຂອງໂລກ ຈະກັບມາແຂ່ງຂັນກັນດ້ານອາວຸດຢ່າງເປີດເຜີຍອີກຄັ້ງ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube