ປີ 2019 ສປປ.ລາວ ປະສົບກັບໄພພິບັດໜັກໜ່ວງທັງນ້ຳຖ້ວມ, ໄພແລ້ງ, ແຜ່ນດິນໄຫວ ແລະ ໂລກລະບາດ

ລາຍງານ 29 ທັນວາ 2019, ອີງຕາມການລາຍງານຂອງຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ, ກະຊວງແຮງງານ ແລະ ສະຫວັດດີການສັງຄົມໃຫ້ຮູ້ວ່າ: ນັບແຕ່ເດືອນມັງກອນ ຫາ ເດືອນພະຈິກ 2019 ທີ່ຜ່ານມາ ໄພພິບັດທາງທຳມະຊາດໄດ້ສົ່ງຜົນກະທົບໂດຍກົງຕໍ່ປະຊາຊົນ 163,000 ກວ່າຄອບຄົວ ໃນ 1,961 ບ້ານ, 128 ເມືອງ, 13 ແຂວງ (ແຂວງຜົ້ງສາລີ, ຫົວພັນ, ຊຽງຂວາງ, ອຸດົມໄຊ, ບໍ່ແກ້ວ, ໄຊຍະບູລີ, ຫຼວງພະບາງ, ຄຳມ່ວນ, ສະຫວັນນະເຂດ, ສາລະວັນ, ເຊກອງ, ຈຳປາສັກ ແລະ ອັດຕະປື) ເຮັດໃຫ້ມີຜູ້ເສຍຊີວິດທັງໝົດ 27 ຄົນ, ສູນຫາຍ 7 ຄົນ ແລະ ບາດເຈັບ 16 ຄົນ, ພ້ອມນັ້ນ ໄດ້ສ້າງຄວາມເສຍຫາຍຕໍ່ພື້ນຖານໂຄງລ່າງທາງເສດຖະກິດ, ສັງຄົມ ແລະ ສິ່ງແວດລ້ອມ ຄິດເປັນມູນຄ່າຫຼາຍກວ່າ 1,560 ຕື້ກີບ (1,560,091,355,578 ກີບ).

ເຫດການທີ່ໜັກໜ່ວງ ແລະ ໄດ້ສ້າງຄວາມເສຍຫາຍຢ່າງມະຫາສານ ແມ່ນໄພພິບັດນ້ຳຖ້ວມທີ່ເກີດຂຶ້ນໃນລະຫວ່າງທ້າຍເດືອນກໍລະກົດ ຫາ ເດືອນກັນຍາ ທີ່ຜ່ານມາ ໂດຍມີລົມພາຍຸດີເປຼຊັນ, ພະຍຸໂພດູ ແລະ ຄາຈິກິ ໄດ້ພັດຜ່ານເຂົ້າ ສປປ.ລາວ ເຮັດໃຫ້ 7 ແຂວງ (ແຂວງຄຳມ່ວນ, ສະຫວັນນະເຂດ, ສາລະວັນ, ຈຳປາສັກ, ເຊກອງ, ອັດຕະປື ແລະ ຫຼວງພະບາງ) ໄດ້ຮັບຜົນກະທົບຢ່າງໜັກໜ່ວງ ປະກອບມີ 45 ເມືອງ, 1,534 ບ້ານ, 154,359 ຄອບຄົວ, ໃນນັ້ນເສຍຊີວິດ 19 ຄົນ ແລະ ສູນຫາຍ 1 ຄົນ ຄິດເປັນມູນຄ່າຄວາມເສຍຫາຍ 1,458 ຕື້ກີບ (1,458,669,675,328 ກີບ).

ພ້ອມດຽວກັນນັ້ນ, ຍັງມີເຫດການແຜ່ນດິນໄຫວທີ່ເກີດຂຶ້ນຢູ່ແຂວງໄຊຍະບູລີໃນເດືອນພະຈິກ ທີ່ຜ່ານມາ ທີ່ມີຄວາມຮຸນແຮງ 6.4 ຣິກເຕີ ເຊິ່ງໄດ້ສ້າງຄວາມເສຍຫາຍຢູ່ 4 ເມືອງຄື: ເມືອງໄຊສະຖານ, ເມືອງພຽງ, ເມືອງໄຊຍະບູລີ ແລະ ເມືອງຫົງສາ ລວມມີ 30 ບ້ານ, 321 ຄອບຄົວ, ວັດ 12 ແຫ່ງ, ໂຮງຮຽນ 15 ແຫ່ງ, ໂຮງໝໍຊຸມຊົນ ແລະ ໂຮງໝໍນ້ອຍ 7 ແຫ່ງ, ສຳນັກງານລັດ 15 ແຫ່ງ, ຫ້ອງການບ້ານ 3 ແຫ່ງ, ຫ້ອງການພາກເອກະຊົນ 6 ແຫ່ງ, ອານຸສອນ 1 ແຫ່ງ, ໃນນັ້ນມີຜູ້ບາດເຈັບເລັກໜ້ອຍ 10 ຄົນ ລວມມູນຄ່າຄວາມເສຍຫາຍທັງໝົດ 1.8 ຕື້ກີບ.

ນອກຈາກນັ້ນ, ຍັງມີເຫດການລະບາດຂອງພະຍາດສັດ ແລະ ການທຳລາຍຂອງສັດຕູພືດເຊັ່ນ: ການລະບາດຂອງພະຍາດອະຫິວາໝູອາຟຣິກາ ໃນ 103 ບ້ານ, 42 ເມືອງ ລວມໝູທີ່ຕາຍ ແລະ ໄດ້ຂ້າທຳລາຍ ມີທັງໝົດ 14,209 ໂຕ; ການລະບາດຂອງບົ້ງຝູງສາລີ ໃນ 12 ແຂວງ, 59 ເມືອງ, 691 ບ້ານ ເຊິ່ງມີເນື້ອທີ່ປູກສາລີ 104,730 ເຮັກຕາ ຫຼື ເທົ່າກັບ 83% ຂອງເນື້ອທີ່ທັງໝົດ ໄດ້ຖືກລະບາດ, ໃນນັ້ນ 40,755 ເຮັກຕາໄດ້ຮັບຜົນກະທົບ; ການລະບາດຂອງຕັກແຕນຝູງໄມ້ປ່ອງຢູ່ 5 ແຂວງພາກເໜືອ, 28 ເມືອງ, 228 ບ້ານ, 431 ຈຸດ ແລະ ໄພແຫ້ງແລ້ງຢູ່ແຂວງບໍ່ແກ້ວ ແລະ ຜົ້ງສາລີ ສົ່ງຜົນກະທົບຕໍ່ 5 ເມືອງ, 67 ບ້ານ, 2,962 ຄອບຄົວ  ລວມມູນຄ່າຄວາມເສຍຫາຍ 1 ຕື້ກວ່າກີບ.