ທ່ານນາຍົກ ຈະຢ້ຽມຢາມຫວຽດນາມຮ່ວມປະຊຸມ ຄັ້ງທີ 42 ການຮ່ວມມືສອງຝ່າຍ ປະຈຳປີ 2020

ລາຍງານ 31 ທັນວາ 2019, ກະຊວງການຕ່າງການຕ່າງປະເທດ ໄດ້ອອກແຈ້ງການເມື່ອວັນທີ 29 ທັນວາ ທີ່ຜ່ານມາ ວ່າ: ໂດຍຕອບສະໜອງຕາມຄຳເຊີນຂອງ ທ່ານ ຫງວຽນ ຊວັນ ຟຸກ ນາຍົກລັດຖະມົນຕີຫວຽດນາມ, ທ່ານ ທອງລຸນ ສີສຸລິດ ນາຍົກລັດຖະມົນຕີ ພ້ອມດ້ວຍຄະນະຜູ້ແທນຂັ້ນສູງ ສປປ.ລາວ ຈະເດີນທາງໄປເຂົ້າຮ່ວມກອງປະຊຸມຄະນະກຳມະການຮ່ວມມື ທະວິພາຄີ (ສອງຝ່າຍ) ລະຫວ່າງລັດຖະບານແຫ່ງ ສປປ.ລາວ ແລະ ລັດຖະບານ ສສ.ຫວຽດນາມ ຄັ້ງທີ 42 ແຕ່ວັນທີ 2-4 ມັງກອນ 2020, ທີ່ນະຄອນຫຼວງຮ່າໂນ້ຍ.

ເຊິ່ງກອງປະຊຸມຂອງຄະນະກຳມະການຮ່ວມມືສອງຝ່າຍລາວ-ຫວຽດນາມ ຄັ້ງທີ 41 ທີ່ຜ່ານມາ ເມື່ອວັນທີ 6 ມັງກອນ 2019 ທັງສອງປະເທດໄດ້ຮ່ວມລົງນາມເອກະສານສຳຄັນ 6 ສະບັບ ແລະ 1 ໃບຢັ້ງຢືນຄື:

  1. ບົດບັນທຶກກອງປະຊຸມຄັ້ງທີ 41
  2. ຂໍ້ຕົກລົງ ວ່າດ້ວຍແຜນການຮ່ວມມື ປະຈຳປີ 2019 ຂອງຄະນະກຳມະການຮ່ວມມືທະວີພາຄີລະຫວ່າງສອງລັດຖະບານ
  3. ແຜນການຮ່ວມມື ປະຈຳປີ 2019 ລະຫວ່າງກະຊວງສຶກສາທິການ ແລະ ກິລາຂອງ ສປປ.ລາວ ກັບ ກະຊວງສຶກສາ ແລະ ກໍ່ສ້າງຫວຽດນາມ
  4. ການມອບ-ຮັບໂຄງການ ສຳເລັດການກໍ່ສ້າງສະຖານສຶກສາ-ຮ່ຳຮຽນໃນ ສປປ.ລາວ ຄື: ໂຮງຮຽນມັດທະຍົມສົມບູນມິດຕະພາບເຈົ້າອານຸວົງ ຢູ່ແຂວງໄຊສົມບູນ; ຫໍພັກນັກສຶກສາຕ່າງປະເທດ ຢູ່ດົງໂດກ, ນະຄອນຫຼວງວຽງຈັນ; ໂຮງຮຽນມັດທະຍົມສົມບູນ ມິດຕະພາບໄລຍະ 2 (ຫຼັກ 5) ນະຄອນຫຼວງວຽງຈັນ ແລະ ສູນພາສາຫວຽດນາມ ຢູ່ມະຫາວິທະຍາໄລສຸພານຸວົງ ແລະ ມະຫາວິທະຍາໄລຈຳປາສັກ
  5. ການມອບ-ຮັບໂຄງການ ສຳເລັດການກໍ່ສ້າງສະຖານີວິທະຍາໂທລະພາບ ແຂວງສະຫວັນນະເຂດ
  6. ຂໍ້ຕົກລົງ ວ່າດ້ວຍການຊ່ວຍເຫຼືອແນວພັນເຂົ້າ ຈຳນວນ 300 ໂຕນຂອງລັດຖະບານຫວຽດນາມ ໃຫ້ແກ່ລັດຖະບານລາວ
  7. ມອບໃບຢັ້ງຢືນຮັບຊື້ໄຟຟ້າ ຈາກໂຄງການໄຟຟ້ານ້ຳຊຳ (ລາວ).

ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube