ສ.ອາເມຣິກາ ອົບພະຍົບເຈົ້າໜ້າທີ່ການທູດ ໜີການປະທ້ວງຕໍ່ຕ້ານໃນອິຣັກ

ລາຍງານ 1 ມັງກອນ 2020, ເຈົ້າໜ້າທີ່ສອງຄົນຂອງກະຊວງການຕ່າງປະເທດອີຣັກເປີດເຜີຍ ເມື່ອວັນທີ 31 ທັນວາ 2019 ວ່າ ເອກອັກຄະລັດຖະທູດສະຫະລັດ ອາເມຣິກາ ແລະ ເຈົ້າໜ້າທີ່ປະຈຳສະຖານທູດ ສ.ອາເມຣິກາ ໃນນະຄອນຫຼວງແບກແດດ ປະເທດອີຣັກ ໄດ້ຮັບຄຳສັ່ງໃຫ້ອົບພະຍົບອອກຈາກສະຖານທູດດ່ວນ ດ້ວຍເຫດຜົນດ້ານຄວາມປອດໄພເປັນສຳຄັນ.

ແຕ່ຍັງມີເຈົ້າໜ້າທີ່ສະຖານທູດ ສ.ອາເມຣິກາ ເຫຼືອປະຈຳການຢູ່ບໍ່ພໍເທົ່າໃດຄົນ ເພາະດ້ານນອກຂອງສະຖານທູດມີປະຊາຊົນອີຣັກຫຼາຍພັນຄົນ ໄດ້ມາໂຮມຊຸມນຸມປະທ້ວງ ເພື່ອປະນາມການໂຈມຕີທາງອາກາດຂອງກອງທັບ ສ.ອາເມຣິກາ ຕໍ່ເຂດທີ່ໝັ້ນຂອງກອງກຳລັງທີ່ອີຣານໃຫ້ການສະໜັບສະໜູນ ທາງພາກຕາເວັນຕົກຂອງອີຣັກ ເມື່ອວັນອາທິດ 29 ທັນວາ 2019 ທີ່ຜ່ານມາ ສົ່ງຜົນໃຫ້ນັກຮົບຂອງກຸ່ມທີ່ມີຊື່ກອງວ່າ ກອງພົນນ້ອຍຮິສບອນເລາະ ເສຍຊີວິດ 25 ຄົນ, ໂດຍ ສ.ອາເມຣິກາ ໃຫ້ເຫດຜົນວ່າ ຖານທັບຂອງຕົນໃນອີຣັກຖືກໂຈມຕີກ່ອນ ຈຶ່ງຈຳເປັນຕ້ອງຕອບໂຕ້ ເຊິ່ງມີທະຫານ ສ.ອາເມຣິກາ ປະຈຳການຢູ່ໃນຖານດັ່ງກ່າວດ້ວຍ.

ລາຍງານຂ່າວລະບຸວ່າ ກຸ່ມຜູ້ປະທ້ວງໄດ້ປີນຂຶ້ນໄປປົດກ້ອງວົງຈອນປິດ ທີ່ຢູ່ກຳແພງຂອງສະຖານທູດ, ຂະນະທີ່ເຈົ້າໜ້າທີ່ຝ່າຍຄວາມໝັ້ນຄົງຂອງອິຣັກ ພະຍາຍາມຊຸກດັນໃຫ້ກຸ່ມຜູ້ປະທ້ວງອອກຫ່າງຈາກສະຖານທູດ.

ຕໍ່ມາກຸ່ມຜູ້ປະທ້ວງຫຼາຍພັນຄົນໄດ້ຈູດໄຟເຜົາທຳລາຍຢູ່ພາຍນອກກຳແພງສະຖານທູດ ສ.ອາເມຣິກາ ພ້ອມໂຮຮ້ອງຕໍ່ຕ້ານ ສ.ອາເມຣິກາ ດ້ວຍຄວາມຮູ້ສຶກຄຽດແຄ້ນ, ເຊິ່ງຖືເປັນຄັ້ງທຳອິດໃນຮອບຫຼາຍປີ ທີ່ຜູ້ປະທ້ວງສາມາດຜ່າດ່ານຕຳຫຼວດເຂົ້າໄປເຖິງບໍລິເວນສະຖານທູດ ທີ່ຕັ້ງຢູ່ໃນເຂດປອດໄພສີຂຽວ ທີ່ມີການຮັກສາຄວາມປອດໄພຢ່າງເຂັ້ມງວດໃນນະຄອນຫຼວງແບກແດດ.

ຜູ້ປະທ້ວງທີ່ໃສ່ເຄື່ອງທະຫານລາຍພາງໄດ້ບຸກຜ່ານກຳແພງເຂົ້າໄປໃນສະຖານທູດ ສ.ອາເມຣິກາ ໂດຍບໍ່ມີການຂັດຂວາງຈາກເຈົ້າໜ້າທີ່ຝ່າຍຄວາມໝັ້ນຄົງຂອງອິຣັກ ເຮັດໃຫ້ໜ່ວຍຮົບພິເສດ ສ.ອາເມຣິກາ ໃນສະຖານທູດຕ້ອງຍິ່ງແກັດນ້ຳຕາ ແລະ ບັງພຸແສງເພື່ອສະກັດກຸ່ມຜູ້ປະທ້ວງ ທີ່ບໍ່ຍອມຟັງຄຳປະກາດຈາກສະຖານທູດທີ່ຂໍໃຫ້ຖອຍອອກໄປ.