ເກົາຫຼີເໜືອ ປະກາດເດີນໜ້າໂຄງການອາວຸດນິວເຄຼຍ ເພາະ ສ.ອາເມຣິກາ ບໍ່ປະຕິບັດຕາມຂໍ້ຮຽກຮ້ອງ

ລາຍງານ 1 ມັງກອນ 2020, ສຳນັກຂ່າວກາງເກົາຫຼີ (KCNA) ກະບອກສຽງຂອງລັດຖະບານເກົາຫຼີເໜືອລາຍງານວ່າ: ທ່ານ ຄິມ ຈອງ-ອຶນ ຜູ້ນຳສູງສຸດຂອງປະເທດ ຖະແຫຼງສະຫຼຸບກອງປະຊຸມໃຫຍ່ ສະໄໝສາມັນ ຄັ້ງທີ 7 ປະຈຳປີ 2019 ຂອງຄະນະກຳມະການບໍລິຫານງານສູນກາງພັກແຮງງານເກົາຫຼີ ເປັນເວລາ 4 ວັນ ແລະ ສຳເລັດລົງເມື່ອວັນອັງຄານ 31 ທັນວາ 2019 ທີ່ຜ່ານມາ ວ່າ ສະຫະລັດ ອາເມຣິກາ ບໍ່ຕອບສະໜອງຕໍ່ຂໍ້ຮຽກຮ້ອງຂອງເກົາຫຼີເໜືອສະເໝີມາ ທີ່ຕ້ອງການໃຫ້ອີກຝ່າຍເພີ່ມຄວາມປະນີປະນອມ ແລະ ມີການຜ່ອນສັ້ນຜ່ອນຍາວຫຼາຍກວ່ານີ້ກ່ອນເຂົ້າສູ່ປີໃໝ່ 2020 ເພື່ອເປີດທາງສູ່ການເຈລະຈາຮ່ວມກັນອີກຄັ້ງ ອັນສະທ້ອນວ່າ ລັດຖະບານ ສ.ອາເມຣິກາບໍ່ຈິງໃຈ ຕໍ່ການຮ່ວມມືດ້ານຄວາມໝັ້ນຄົງສອງຝ່າຍ.

ດ້ວຍເຫດຜົນນີ້, ເກົາຫຼີເໜືອຈຶ່ງຕີລາຄາວ່າ ບໍ່ມີຄວາມຈຳເປັນອີກຕໍ່ໄປ ທີ່ຈະຢຶດໝັ້ນຕາມແນວທາງປະຕິບັດດ້ວຍການລະງັບການທົດລອງຂີປະນາວຸດຂ້າມທະວີບ (ICBM) ແລະ ລະເບີດນິວເຄຼຍ, ໃນຂະນະທີ່ ສ.ອາເມຣິກາ ຍັງຄົງປະຕິບັດຕົນບໍ່ຕ່າງຈາກ ຫົວໜ້າແກ້ງອັນທະພານ ດ້ວຍການເດີນໜ້າຊ້ອມຮົບກັບເກົາຫຼີໃຕ້, ພັດທະນາອາວຸດນຳວິຖີ ແລະ ບໍ່ຫຼຸດຜ່ອນມາດຕະການຂວໍ້າບາດຕໍ່ເກົາຫຼີເໜືອ, ກ່ອນທີ່ຈະປິດທ້າຍວ່າ ພາຍໃນອີກບໍ່ດົນນີ້ ປະຊາຄົມໂລກຈະໄດ້ເປັນທີ່ປະຈັກແຈ້ງ ກັບອາວຸດທາງຍຸດທະສາດຊະນິດໃໝ່ຂອງເກົາຫຼີເໜືອ ເຊິ່ງມີຈຸດປະສົງຫຼັກຄືປົກປ້ອງອະທິປະໄຕຂອງປະເທດໃນໄລຍະຍາວ ໃຫ້ຫຼຸດພົ້ນຈາກການຖືກຮຸກຮານໂດຍ ສ.ອາເມຣິກາ.

ໃນດ້ານຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ກ່າວວ່າລັດຖະບານ ສ.ອາເມຣິກາ ຜິດຫວັງເປັນຢ່າງຍິ່ງ ເມື່ອຊາບຂ່າວ ແລະ ຢືນຢັນວ່າ ສ.ອາເມຣິກາຕ້ອງການສັນຕິພາບ ຫຼາຍກວ່າການປະເຊີນໜ້າທາງທະຫານກັບເກົາຫຼີເໜືອ.

ເຊິ່ງເກົາຫຼີເໜືອໄດ້ທົດລອງລະເບີດນິວເຄຼຍມາແລ້ວ 6 ຄັ້ງ, ຄັ້ງຫຼ້າສຸດເກີດຂຶ້ນເມື່ອເດືອນກັນຍາ 2017 ເຊິ່ງຜົນລັບຂອງການທົດລອງປະກົດວ່າ ມີອານຸພາບຂອງການໂຈມຕີຮຸນແຮງກວ່າ 16 ເທົ່າ ເມື່ອທຽບກັບລະເບີດທີ່ ສ.ອາເມຣິກາ ໃຊ້ທີ່ເມືອງຮິໂຣຊິມາຂອງຍີ່ປຸ່ນ ໃນຕອນສົງຄາມໂລກ ຄັ້ງທີ II, ຂະນະທີ່ນັກວິເຄາະຫຼາຍຄົນຕີລາຄາວ່າ ການປ່ຽນແປງຈຸດຢືນຂອງເກົາຫຼີເໜືອຄັ້ງນີ້ ຖືເປັນສັນຍານເຕືອນ ສຳລັບທ່ານ ໂດໂນ ທຣຳ ປະທານປະເທດ ສ.ອາເມຣິກາ ແຕ່ການເຄື່ອນໄຫວໃດກໍ່ຕາມຕໍ່ຈາກນີ້ ສາມາດຕີກັບມາມີຜົນກະທົບຕໍ່ເກົາຫຼີເໜືອໄດ້ເອງເຊັ່ນກັນ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube