ປີ 2019 ຈີນປາບປາມການສໍ້ລາດບັງຫຼວງໄດ້ 555,000 ຄະດີ, ສະມາຊິກພັກ-ລັດ 485,000 ຄົນຖືກລົງວິໄນ

ລາຍງານ 2 ມັງກອນ 2019, ອີງຕາມການລາຍງານຂອງສຳນັກຂ່າວຊິນຫົວ ສື່ຂອງທາງການຈີນໃຫ້ຮູ້ວ່າ: ຄະນະກຳມະການກວດສອບວິໄນສູນກາງພັກຄອມມູນິດຈີນ (CCDI) ແລະ ຄະນະກຳມະການກວດສອບແຫ່ງຊາດ (NSC) ເປີດເຜີຍເມື່ອວັນທີ 30 ທັນວາ 2019 ທີ່ຜ່ານມາວ່າ ຈີນປະສົບຄວາມສຳເລັດເປັນຢ່າງຍິ່ງໃນການປາບປາມການສໍ້ລາດບັງຫຼວງຕະຫຼອດປີ 2019.

ໂດຍນັບຕັ້ງແຕ່ເດືອນມັງກອນ ຫາ ເດືອນພະຈິກ 2019 ໜ່ວຍງານກວດສອບວິໄນ ແລະ ຄຸ້ມຄອງການກວດສອບທົ່ວປະເທດໄດ້ຍື່ນຟ້ອງ ແລະ ສືບສວນສອບສວນຄະດີຕ່າງໆ ກວ່າ 555,000 ຄະດີ ໂດຍມີຜູ້ກະທຳຜິດປະມານ 485,000 ຄົນໄດ້ຮັບການພິຈາລະນາຄວາມຜິດທາງວິໄນພາຍໃນພັກ ຫຼື ໜ່ວຍງານລັດ, ຂະນະທີ່ຜູ້ກະທຳຜິດຈຳນວນ 19,000 ຄົນ ຖືກສົ່ງຕໍ່ໄປຍັງໄອຍະການເພື່ອດຳເນີນການສືບສວນສອບສວນທາງອາຍາ.

ສະຖິຕິລະບຸວ່າ ໄລຍະດັ່ງກ່າວ ຈີນໄດ້ດຳເນີນຄະດີສໍ້ລາດບັງຫຼວງ ແລະ ການປະພຶດທີ່ຜິດກ່ຽວຂ້ອງກັບການຫຼຸດຜ່ອນຄວາມທຸກຍາກ ແລະ ການປັບປຸງຊີວິດການເປັນຢູ່ຂອງປະຊາຊົນ 70,800 ຄະດີ ແລະ 86,400 ຄະດີຕາມລຳດັບ ໂດຍມີຜູ້ຖືກລົງໂທດຈຳນວນ 99,000 ຄົນ ແລະ 110,000 ຄົນ.

ໂຄງການຕໍ່ຕ້ານຂະບວນການ ແລະ ອົງກອນອາຊະຍາກຳກໍ່ມີຄວາມຄືບໜ້າເຊັ່ນກັນ, ໂດຍສາມາດດຳເນີນຄະດີການສໍ້ໂກງກ່ຽວຂ້ອງກັບຂະບວນການຕ່າງໆ ແລະ ຮົ່ມເງົາທີ່ໃຫ້ການປົກປິດການກະທຳອັນເປັນອາຊະຍາກຳໄດ້ເຖິງ 47,200 ຄະດີ ນັບຕັ້ງແຕ່ເລີ່ມໂຄງການດັ່ງກ່າວເມື່ອເດືອນມັງກອນ 2018.

ນອກຈາກນັ້ນ, ຕະຫຼອດເດືອນມັງກອນ ຫາ ເດືອນພະຈິກ 2019 ຍັງມີການສົ່ງຕົວຜູ້ກະທຳຜິດທີ່ຫຼົບໜີໄປຕ່າງປະເທດກັບຄືນປະເທດຈີນທັງໝົດ 1,841 ຄົນ ໃນຈຳນວນນີ້ເປັນສະມາຊິກພັກ ແລະ ເຈົ້າໜ້າທີ່ລັດ 816 ຄົນ ແລະ ສາມາດນຳເງິນຜິດກົດໝາຍກັບມາໄດ້ຫຼາຍກວ່າ 4.09 ພັນລ້ານຢວນ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube