ສ.ອາເມຣິກາ ໂຈມຕີທາງອາກາດສັງຫານນາຍພົນລະດັບສູງຄົນສຳຄັນຂອງອີຣານ ໃນອິຣັກ

ລາຍງານ 3 ມັງກອນ 2020, ສະຖານີໂທລະພາບແຫ່ງຊາດອິຣັກລາຍງານວ່າ ໂດຣນຂອງກອງກຳລັງຍັງບໍ່ຊາບຝ່າຍ ປະຕິບັດການໂຈມຕີທາງອາກາດບໍລິເວນໃກ້ກັບສະໜາມບິນສາກົນນະຄອນຫຼວງແບກແດດ ເມື່ອຕອນເຊົ້າມືດຂອງວັນສຸກນີ້ ຕາມເວລາທ້ອງຖິ່ນ ສົ່ງຜົນໃຫ້ຂະບວນບົດທີ່ແລ່ນຜ່ານມາ ເຊິ່ງເປັນເປົ້າໝາຍໄດ້ຮັບຄວາມເສຍຫາຍຢ່າງໜັກ ແລະ ມີຜູ້ເສຍຊີວິດຈຳນວນໜຶ່ງ.

ເຊິ່ງລາຍງານໄດ້ລະບຸວ່າ ຜູ້ເສຍຊີວິດລວມມີທ່ານ ພົນຕີ ກັສເຊັມ ໂຊໄລມານີ ຜູ້ບັນຊາການກອງກຳລັງນັກຮົບຄຸດ ເຊິ່ງເປັນໜ່ວຍຮົບພິເສດໃນຕ່າງປະເທດຂອງກອງທັບປະຕິວັດອີຣານ ທີ່ຂຶ້ນໂດຍກົງກັບທ່ານ ຢາຕອນເລາະ ອາລີ ຄາເມເນອີ ຜູ້ນຳສູງສຸດຂອງອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງເຄື່ອນໄຫວປະຊາຊົນ ຫຼື ຮັສ ເຊິ່ງເປັນເຄືອຂ່າຍກອງກຳລັງນັກຮົບຊີອະໃນອິຣັກ ທີ່ຝັກໃຝ່ອີຣານ.

ພາຍຫຼັງເກີດເຫດກອງທັບປະຕິວັດອີຣານຢືນຢັນການເສຍຊີວິດຂອງທ່ານ ພົນຕີ ກັສເຊັມ ໂຊໄລມານີ, ອັນເປັນການເພີ່ມຄວາມເຄັ່ງຕຶງໃຫ້ກັບສະຖານະການໃນຕາເວັນອອກກາງ, ຖະແຫຼງການຂອງກອງທັບປະຕິວັດອີຣານລະບຸວ່າ ເປັນຜົນມາຈາກປະຕິບັດການທາງທະຫານຂອງ ສ.ອາເມຣິກາ ທີ່ໃຊ້ເຮລິຄັອບແຕ ແລະ ໂດຣນ ໂຈມຕີ.

ມາຕໍ່ກະຊວງປ້ອງກັນປະເທດ ສ.ອາເມຣິກາ ອອກຖະແຫຼງການຢືນຢັນວ່າ ເປັນຜູ້ປະຕິບັດການໂຈມຕີທາງອາກາດສັງຫານທ່ານ ພົນຕີ ກັສເຊັມ ໂຊໄລມານີ ໂດຍຖະແຫຼງການລະບຸອີກວ່າ ການໂຈມຕີເປັນໄປຕາມຄຳສັ່ງຂອງທ່ານ ໂດໂນ ທຣຳ ປະທານປະເທດ ສ.ອາເມຣິກາ ເນື່ອງຈາກ ທ່ານ ພົນຕີ ກັສເຊັມ ໂຊໄລມານີ ແລະ ກອງກຳລັງຄຸດຢູ່ເບື້ອງຫຼັງການໂຈມຕີນັກການທູດ ແລະ ທະຫານອາເມຣິກາໃນຕາເວັນອອກກາງຢ່າງຕໍ່ເນື່ອງ.

ເຫດການດັ່ງກ່າວ, ເຮັດໃຫ້ສັນຍາຊື້-ຂາຍນ້ຳມັນດິບຕະຫຼາດເບນທະເລເໜືອລອນດອນປັບຕົວເພີ່ມຂຶ້ນ 3.98% ຢູ່ທີ່ 68.90 ໂດລາສະຫະລັດຕໍ່ຖັງ, ຂະນະທີ່ສັນຍາຊື້-ຂາຍນ້ຳມັນດີບຕະຫຼາດເວສເທກຊັສອິນເຕີມີດຽດ (WTO) ຫຼື ໄລສະວີດຄຼູດຂອງ ສ.ອາເມຣິກາ ປັບສູງຂຶ້ນ 3.87% ຢູ່ທີ່ 63.55 ໂດລາສະຫະລັດຕໍ່ຖັງ.

ນອກຈາກນີ້ເຫດການດັ່ງກ່າວເກີດຂຶ້ນພຽງບໍ່ພໍເທົ່າໃດວັນ ພາຍຫຼັງທີ່ປະຊາຊົນອິຣັກຫຼາຍພັນຄົນບຸກທຳລາຍພື້ນທີ່ເຂດນອກຂອງສະຖານທູດ ສ.ອາເມຣິກາ ໃນນະຄອນຫຼວງແບກແດດ ເພື່ອປະທ້ວງການທີ່ກອງທັບ ສ.ອາເມຣິກາ ປະຕິບັດການໂຈມຕີທາງອາກາດໃນອິຣັກ ແລະ ຊີຣີ ເມື່ອທ້າຍປີທີ່ຜ່ານມາ ສົ່ງຜົນໃຫ້ສະມາຊິກອງກຳລັງຄາຕາອິບ ຮິສບອນເລາະ ເສຍຊີວິດ 25 ຄົນ ແຕ່ລັດຖະບານ ສ.ອາເມຣິກາ ຢືນຢັນວ່າ ເປັນການປົກປ້ອງຕົນເອງ ຫຼັງຈາກທີ່ເຈົ້າໜ້າທີ່ອາເມຣິກາເສຍຊີວິດຈາກການໂຈມຕີດ້ວຍຈະຫຼວດ ທີ່ຖານທັບໃນເມືອງເຄີຄຸກ ທາງທິດເໜືອຂອງນະຄອນຫຼວງແບກແດດ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube