ອີຣານປະກາດຈະລ້າງແຄ້ນ ສ.ອາເມຣິກາ ໃຫ້ກັບນາຍພົນ ໂຊໄລມານີ ທີ່ຖືກຂ້າໃນອິຣັກ

ລາຍງານ 3 ມັງກອນ 2020, ສຳນັກງານເລຂານຸການຂອງທ່ານ ຢາຕອນເລາະອາລີ ຄາເມເນອີ ຜູ້ນຳສູງສຸດຂອງອີຣານ ເຜີຍແຜ່ຖະແຫຼງການວ່າ: ກຸ່ມຄົນທີ່ໂຫດຮ້າຍປ່າເຖື່ອນທີ່ສຸດໃນໂລກໄດ້ລອບສັງຫານ ທ່ານ ພົນຕີ ກັສເຊັມ ໂຊໄລມານີ, ເຖິງຢ່າງໃດກໍ່ຕາມ ການຈາກໄປຂອງທ່ານ ພົນຕີ ກັສເຊັມ ໂຊໄລມານີ ບໍ່ໄດ້ໝາຍຄວາມວ່າພາລະກິດຈະຍຸຕິ ເພາະກຸ່ມອາຊະຍາກອນທີ່ມືເປື້ອນດ້ວຍເລືອດຂອງທ່ານ ພົນຕີ ກັສເຊັມ ໂຊໄລມານີ ແລະ ຜູ້ເສຍຊີວິດຈາກການໂຈມຕີ ຈະຕ້ອງຖືກລ້າງແຄ້ນຢ່າງເຖິງທີ່ສຸດ, ຂະນະດຽວກັນ ທ່ານ ຢາຕອນເລາະ ຄາເມເນອີປະກາດໃຫ້ໄວ້ອາໄລທົ່ວປະເທດເປັນເວລາ 3 ວັນ ນັບຕັ້ງແຕ່ວັນສຸກນີ້ ເພື່ອເປັນການລະນຶກເຖິງທ່ານ ພົນເອກ ກັສເຊັມ ໂຊໄລມານີ ແລະ ໄດ້ສະແດງຄວາມເສຍໃຈຢ່າງສູງສຸດໄປຍັງຄອບຄົວຂອງຜູ້ເສຍຊີວິດດ້ວຍ.

ໃນດ້ານຂອງທ່ານ ໂມຮຳໝັດ ຈາວາດ ຊາຣີບ ລັດຖະມົນຕີກະຊວງການຕ່າງປະເທດອີຣານ ປະນາມປະຕິບັດການທາງທະຫານຂອງ ສ.ອາເມຣິກາຄັ້ງນີ້ວ່າ ເປັນການກະທຳທີ່ໂງ່ຈ້າ ແລະ ເປັນການກໍ່ການຮ້າຍສາກົນ ພ້ອມທັງເຕືອນວ່າ ລັດຖະບານ ສ.ອາເມຣິກາຕ້ອງຍອມຮັບກັບຜົນກະທົບທີ່ຈະເກີດຂຶ້ນຕາມມາ, ນອກຈາກນີ້ ກະຊວງການຕ່າງປະເທດອີຣານຍັງເຊີນອຸປະທູດສະວິດເຂົ້າພົບ ເຊິ່ງສະວິດເປັນປະເທດທີ່ຄຸ້ມຄອງຜົນປະໂຫຍດໃຫ້ກັບທັງ ສ.ອາເມຣິກາ ແລະ ອີຣານ ທີ່ບໍ່ມີສາຍພົວພັນທາງການທູດຕໍ່ກັນ ນັບຕັ້ງແຕ່ສິ້ນສຸດການປະຕິບັດອີຣານ ເມື່ອປີ 1979 ແລະ ການເຊີນນັກການທູດລະດັບສູງຂອງສະວິດໃນອີຣານເຂົ້າພົບຄັ້ງນີ້ ເກີດຂຶ້ນພຽງບໍ່ພໍເທົ່າໃດວັນ ພາຍຫຼັງເມື່ອຕົ້ນອາທິດດຽວນັ້ນນີ້ ລັດຖະບານອີຣານປະທ້ວງຜ່ານອຸປະທູດສະວິດ ຈາກກໍລະນີທີ່ ສ.ອາເມຣິກາ ກ່າວຫາວ່າອີຣານຢູ່ເບື້ອງຫຼັງເຫດປະຊາຊົນອິຣັກຫຼາຍພັນຄົນໂຮມຊຸມນຸມປະທ້ວງຕໍ່ຕ້ານ ແລະ ທຳລາຍພື້ນທີ່ສ່ວນນອກຂອງສະຖານເອກອັກຄະລັດຖະທູດ ສ.ອາເມຣິກາ ໃນນະຄອນຫຼວງແບກແດດ.

ເຊິ່ງທ່ານ ພົນຕີ ກັສເຊັມ ໂຊໄລມານີ ເປັນໜຶ່ງໃນທະຫານລະດັບສູງ ທີ່ມີຊື່ສຽງໃນຕາເວັນອອກກາງ ຮັບໃຊ້ກອງທັບປະຕິວັດອີຣານ ຕັ້ງແຕ່ປີ 1979, ເຖິງແມ່ນວ່າຍັງບໍ່ຊັດເຈນວ່າທ່ານ ພົນຕີ ກັສເຊັມ ໂຊໄລມານີ ໄດ້ຮັບການແຕ່ງຕັ້ງໃຫ້ດຳລົງຕຳແໜ່ງຜູ້ບັນຊາການໜ່ວຍຮົບພິເສດ ຫຼື ຄຸດ (Quds Force) ເມື່ອໃດ, ແຕ່ນານາປະເທດ ລວມເຖິງຫຼາຍປະເທດໃນຕາເວັນຕົກຍອມຮັບສີມືຂອງທ່ານ ພົນຕີ ກັສເຊັມ ໂຊໄລມານີ ໃນຖານະຜູ້ທີ່ມີບົດບາດສຳຄັນໃນການຕໍ່ຕ້ານກຸ່ມ IS ໃນຊີຣີ ແຕ່ໃນອີກດ້ານໜຶຶ່ງ ກໍ່ເປັນທີ່ປະນາມຂອງຝ່າຍຕໍ່ຕ້ານອີຣານໃນຫຼາຍປະເທດ ຢູ່ພູມມິພາກຕາເວັນອອກກາງເຊັ່ນກັນ.

ສຳລັບຈຳນວນຜູ້ເສຍຊີວິດຈາກປະຕິບັດການທາງທະຫານຂອງ ສ.ອາເມຣິກາຄັ້ງນີ້ ເຊິ່ງເປັນການໂຈມຕີທາງອາກາດໃສ່ຂະບວນລົດຂອງທ່ານ ພົນຕີ ກັສເຊັມ ໂຊໄລມານີ ບໍລິເວນສະໜາມບິນສາກົນແບບແດດ ປະເທດອິຣັກ ຍັງບໍ່ຊັດເຈນ, ແຕ່ໜຶ່ງໃນນັ້ນລວມເຖິງທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງເຄື່ອນໄຫວປະຊາຊົນ ຫຼື ຮັສ ເຊິ່ງເປັນເຄືອຂ່າຍກອງກຳລັງນັກຮົບຊີວະໃນອິຣັກຝັກໃຝ່ອີຣານ, ທ່ານ ອາບູ ມາດີ ອັນ-ມູຮັນດິສ ເຄີຍປະຕິບັດວຽກງານກັບທ່ານ ຊັດດຳ ຮຸສເຊັນ ອະດີດປະທານປະເທດອິຣັກ ທີ່ມີສາຍພົວພັນໃຊ້ຊິດກັບກອງທັບປະຕິວັດອີຣານ ແລະ ກຸ່ມຮິສບອນເລາະ.

HTML tutorial