ປ.ທຣຳກ່າວວ່າ ການຂ້ານາຍພົນ ໂຊໄລມານີ ແມ່ນເພື່ອປົກປ້ອງຜົນປະໂຫຍດຂອງ ສ.ອາເມຣິກາ

ລາຍງານ 4 ມັງກອນ 2020, ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ຖະແຫຼງເມື່ອວັນສຸກ 3 ມັງກອນ ທີ່ຜ່ານມາ ວ່າທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາກາດກອງກຳລັງນັກຮົບພິເສດ ຫຼື ຄຸດ ແຫ່ງກອງທັບປະຕິວັດອີຣານ ທີ່ເສຍຊີວິດເມື່ອວັນສຸກ ທີ່ຜ່ານມາ ພາຍຫຼັງທີ່ກອງທັບ ສ.ອາເມຣິກາ ປະຕິບັດການໂຈມຕີທາງອາກາດຕໍ່ເປົ້າໝາຍເຊິ່ງເປັນລົດທີ່ກຳລັງແລ່ນຢູ່ບໍລິເວນໃກ້ຄຽງກັບສະໜາມບິນສາກົນແບກແດດ ປະເທດອິຣັກ ກຳລັງວາງແຜນໃຫ້ມີການໂຈມຕີຢ່າງໂຫດຮ້າຍຕໍ່ເຈົ້າໜ້າທີ່ການທູດຂອງ ສ.ອາເມຣິກາ, ທະຫານອາເມຣິກາ ແລະ ຜົນປະໂຫຍດຂອງ ສ.ອາເມຣິກາໃນຕາເວັນອອກກາງ.

ເຊິ່ງທ່ານ ໂດໂນ ທຣຳ ຢືນຢັນວ່າ ຕົນໄດ້ສັ່ງໃຫ້ກອງທັບ ສ.ອາເມຣິກາຕິດຕາມ ແລະ ປະຕິບັດການໂຈມຕີທາງອາກາດຕໍ່ທ່ານ ພົນຕີ ກັສເຊັມ ໂຊໄລມານີ ທີ່ຄວນຈາກໂລກໃບນີ້ໄປຕັ້ງແຕ່ດົນແລ້ວ ແລະ ມີຜົນພອຍໄດ້ຄືການເສຍຊີວິດຂອງທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງເຄື່ອນໄຫວປະຊາຊົນ ຫຼື ຮັສ ເຊິ່ງເປັນເຄືອຂ່າຍກອງກຳລັງນັກຮົບຊີວະໃນອິຣັກທີ່ຝັກໃຝ່ອີຣານ, ເຖິງຢ່າງໃດກໍ່ຕາມ ຜູ້ນຳ ສ.ອາເມຣິກາກ່າວວ່າຕົນບໍ່ຕ້ອງການເຮັດສົງຄາມກັບອີຣານ ແລະ ບໍ່ມີຈຸດປະສົງຈະໂຄ່ນລົ້ມອຳນາດຂອງທ່ານ ຢາຕອນເລາະອາລີ ຄາເມເນອີ ຜູ້ນຳສູງສຸດຄົນປັດຈຸບັນຂອງອີຣານ.

ໃນຂະນະທີ່ຄວາມຄືບໜ້າຢ່າງເປີດເຜີຍຈາກຝ່າຍລັດຖະບານອີຣານຍັງບໍ່ຄ່ອຍມີຫຼາຍປານໃດ ເຖິງແມ່ນວ່າການເສຍຊີວິດຂອງທ່ານ ພົນຕີ ກັສເຊັມ ໂຊໄລມານີ ຈະເປັນຈຸດເລີ່ມຕົ້ນຄວາມຂັດແຍ່ງຄັ້ງໃຫຍ່ທີ່ສຸດລະຫວ່າງ ສ.ອາເມຣິກາ ກັບ ອີຣານ ນັບຕັ້ງແຕ່ການປະຕິວັດອີຣານ 1979 ໂດຍທ່ານ ຢາຕອນເລາະອາລີ ຄາເມເນອີປະກາດວ່າ ຈະລ້າງແຄ້ນຢ່າງເຖິງທີ່ສຸດ ແລະ ເຈົ້າໜ້າທີ່ລະດັບສູງທຸກຄົນໃນລັດຖະບານອີຣານ ລວມເຖິງທ່ານ ຮັສຊັນ ໂຣຮານີ ປະທານປະເທດອີຣານ ກ່າວວ່າການເສຍຊີວິດຂອງທ່ານ ພົນຕີ ກັສເຊັມ ໂຊໄລມານີ ຕ້ອງມີຄຳຕອບ, ໃນເວລາດຽວກັນ ທ່ານ ຢາຕອນເລາະອາລີ ຄາເມເນອີໄດ້ເລື່ອນຂັ້ນເອົາທ່ານ ພົນຈັດຕະວາ ເອສມາອິນ ກາອານີ ຈາກຕຳແໜ່ງຮອງຜູ້ບັນຊາການໜ່ວຍຮົບພິເສດຄຸດ ໃຫ້ຂຶຶ້ນມາດຳລົງຕຳແໜ່ງຜູ້ບັນຊາການ ແລະ ປະຊາຊົນອີຣານຈຳນວນຫຼາຍເດີນຂະນວບໄປຕາມຖະໜົນຫົນທາງຂອງຫົວເມືອງໃຫຍ່ຫຼາຍແຫ່ງ ເພື່ອໄວ້ອາໄລໃຫ້ແກ່ທ່ານ ພົນຕີ ກັສເຊັມ ໂຊໄລມານີ ແລະ ສະແດງຈຸດຢືນຕໍ່ຕ້ານ ສ.ອາເມຣິກາ.

ສ່ວນຈຸດຢືນຂອງອິຣັກຕໍ່ສະຖານະການຄັ້ງນີ້ ທ່ານ ອາເດວ ອັບດຸນ-ມາດີ ນາຍົກລັດຖະມົນຕີອິຣັກ ກ່າວໄວ້ອາໄລໃຫ້ທ່ານ ພົນຕີ ກັສເຊັມ ໂຊໄລມານີ ແລະ ປະນາມ ສ.ອາເມຣິກາວ່າລະເມີດອະທິປະໄຕຢ່າງຮ້າຍແຮງ ແລະ ທ່ານ ຮັສຊັນ-ອັນ-ຄາອາບີ ຮອງປະທານສະພາຜູ້ແທນປະຊາຊົນອິຣັກ ກ່າວວ່າ ສ.ອາເມຣິກາຂ້າທ່ານ ພົນຕີ ກັສເຊັມ ໂຊໄລມານີ ເພື່ອສວຍໃຊ້ເປັນໂອກາດໃນການເພີ່ມຈຳນວນທະຫານໃນອິຣັກ ແລະ ຮຽກຮ້ອງໃຫ້ທຸກພາກສ່ວນຮ່ວມກັນຫາທາງຍຸຕິການຮຸກຮານດັ່ງກ່າວ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube