ສ.ອາເມຣິກາ ເສີມທະຫານເກືອບ 3,000 ຄົນໃນຕາເວັນອອກກາງ ພາຍຫຼັງຂ້ານາຍພົນຂອງອີຣານ

ລາຍງານ 4 ມັງກອນ 2020, ກະຊວງປ້ອງກັນປະເທດສະຫະລັດ ອາເມຣິກາ ອອກຖະແຫຼງການເມື່ອວັນສຸກ 3 ມັງກອນ ທີ່ຜ່ານມາ ເລື່ອງການເສີມກຳລັງພົນເພີ່ມອີກເກືອບ 3,000 ຄົນ ໃນຕາເວັນອອກກາງ ໂດຍຈະມາຈາກກອງພົນສົ່ງກຳລັງທາງອາກາດທີ 82 ທີ່ມີຖານປະຈຳຖານທີ່ລັດນໍແຄໂຣໄລນາ ແຕ່ອາດມີການເສີມກຳລັງທະຫານເພີ່ມອີກຈາກກອງພົນສົ່ງກຳລັງທາງອາກາດທີ 173 ທີ່ມີຖານປະຈຳການຢູ່ໃນເອີຣົບ.

ໂດຍການເຄື່ອນໄຫວດັ່ງກ່າວເກີດຂຶ້ນພຽງບໍ່ພໍເທົ່າໃນວັນ ພາຍຫຼັງທີ່ທະຫານປະມານ 750 ຄົນ ຈາກກອງພົນສົ່ງກຳລັງທາງອາກາດທີ 82 ເດີນທາງເຖິງກູເວດ ເພື່ອກຽມປະຕິບັດການປົກປ້ອງສະຖານທູດຂອງ ສ.ອາເມຣິກາໃນອິຣັກ ເຊິ່ງປັດຈຸບັນມີທະຫານອາເມຣິກາຢູ່ແລ້ວປະມານ 5,200 ຄົນ.

ໃນເວລາດຽວກັນ, ກອງກຳລັງເຄື່ອນໄຫວປະຊາຊົນຮັສ ຫຼື PMF ເຊິ່ງເປັນເຄືອຂ່າຍກອງກຳລັງນັກຮົບຊີອະໃນອິຣັກທີ່ຝັກໃຝ່ອີຣານ ອອກຖະແຫຼງການວ່າ ມີການໂຈມຕີທາງອກາດຕໍ່ເປົ້າໝາຍເປັນລົດ 2 ຄັນ ບໍລິເວນສະໜາມກິລາທາຈິ ທາງທິດເໜືອຂອງນະຄອນຫຼວງແບກແດດ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 6 ຄົນ ແລະ ໄດ້ຮັບບາດເຈັບອີກ 3 ຄົນ.

ພາຍຫຼັງເກີດເຫດ ຍັງບໍ່ມີໃຜອອກມາສະແດງຕົນວ່າເປັນຜູ້ລົງມື ແຕ່ເຫດການເກີດຂຶ້ນພຽງວັນດຽວ ພາຍຫຼັງທີ່ກອງທັບ ສ.ອາເມຣິກາ ປະຕິບັດການໂຈມຕີທາງອກາດໃກ້ກັບສະໜາມບິນສາກົນແບກແດດ ຂ້ານາຍພົນ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ແຫ່ງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການຂອງກອງກຳລັງຮັສ ນອກຈາກນີ້ຍັງມີຜູ້ເສຍຊີວິດອີກຢ່າງໜ້ອຍ 5 ຄົນ.

ຂະນະທີ່ສະຖານເອກອັກຄະລັດຖະທູດ ສ.ອາເມຣິກາ ປະຈຳນະຄອນຫຼວງແບກແດດ ອອກຖະແຫຼງການຂໍ້ໃຫ້ພົນລະເມືອງອາເມຣິກາໃນອິຣັກ ເດີນທາງອອກນອກປະເທດໃນທັນທີ ດ້ວຍເຫດຜົນດ້ານຄວາມປອດໄພ ໂດຍສະຖານທູດໄດ້ປິດໃຫ້ບໍລິການຢ່າງບໍ່ມີກຳນົດ ຕັ້ງແຕ່ຕົ້ນອາທິດນີ້ ພາຍຫຼັງມີເຫດຜູ້ປະທ້ວງຫຼາຍພົນຄົນໂຮມຊຸມນຸມໜ້າສະຖານທູດ ແລະ ທຳລາຍອາຄານດ້ານນອກຂອງສະຖານທູດ ເພື່ອສະແດງຄວາມບໍ່ພໍໃຈທີ່ກອງທັບ ສ.ອາເມຣິກາ ໂຈມຕີທາງອາກາດເມື່ອທ້າຍປີທີ່ຜ່ານມາ ຂ້າສະມາຊິກກຸ່ມຄາຕາອິບ ຮິສບອນເລາະ ເສຍຊີວິດ 25 ຄົນ ເຊິ່ງລັດຖະບານ ສ.ອາເມຣິກາເຊື່ອວ່າເປັນຜູ້ຍິງຈະຫຼວດໂຈມຕີຖານທັບໃນເມືອງເຄີຄຸກ ເຮັດໃຫ້ພົນລະເມືອງອາເມຣິກາເສຍຊີວິດ 1 ຄົນ.

ໃນດ້ານຂອງກະຊວງນ້ຳມັນອິຣັກລາຍງານວ່າ ພະນັກງານຕ່າງປະເທດຈຳນວນຫຼາຍຂອງບໍລິສັດນ້ຳມັນຕ່າງປະເທດ ໄດ້ເລີ່ມເດີນທາງອອກນອກປະເທດ ແຕ່ຢືນຢັນວ່າຈະບໍ່ສົ່ງຜົນກະທົບຕໍ່ການຜະລິດນ້ຳມັນໃນພາບລວມ, ເຖິງຢ່າງໃດກໍ່ຕາມ ບໍລິສັດນ້ຳມັນຫຼາຍແຫ່ງ ລວມເຖິງ ເອັກຊອນ ໂມບິວ ແລະ ບີພີ ປະຕິເສດໃຫ້ຂໍ້ມູນເລື່ອງການອົບພະຍົບພະນັກງານຂອງຕົນອອກຈາກອິຣັກ, ນອກຈາກນີ້ Royal Jordanian ສາຍການບິນແຫ່ງຊາດຊອກດານີ ແລະ Gulf Air ສາຍການບິນແຫ່ງຊາດບາເຣນ ໂຈະເສັ້ນທາງບິນລະຫວ່າງນະຄອນຫຼວງແບກແດດຊົ່ວຄາວ.