UN ເປັນຫ່ວງຕໍ່ຊະຕາກຳຂອງ ສ.ອາເມຣິກາ ແລະ ອີຣານ ເພາະຢ້ານເກີດສົງຄາມອ່າວອີກຄັ້ງ

ລາຍງານ 4 ມັງກອນ 2020, ສະຫະປະຊາຊາດ (UN) ເຜີຍແຜ່ຖະແຫຼງການຂອງທ່ານ ອັນໂຕນິໂອ ກູເຕເຣສ ເລຂາທິການໃຫຍ່ ວ່າມີຄວາມເປັນຫ່ວງຢ່າງຍິ່ງຕໍ່ສະຖານະການໃນຕາເວັນອອກກາງ ແລະ ຮຽກຮ້ອງໃຫ້ຜູ້ນຳປະເທດຄູ່ກໍລະນີອົດທົນອົດກັ້ນໃຫ້ຫຼາຍທີ່ສຸດ ພ້ອມທັງປິດທ້າຍວ່າໂລກບໍ່ຕ້ອງການສົງຄາມອ່າວຄັ້ງໃໝ່.

ເຖິງແມ່ນວ່າເລຂາທິການ UN ບໍ່ໄດ້ກ່າວເຖິງສະຖານະການໃດ ແລະ ເຈາະຈົງປະເທດໃດໂດຍກົງ ແຕ່ສາຍພົວພັນລະຫວ່າງ ສ.ອາເມຣິກາ ແລະ ອີຣານມາເຖິງຈຸດເຄັ່ງຕຶຶງສຸດຂີດ ນັບຕັ້ງແຕ່ການປະຕິວັດອີຣານ 1979 ຈາກການທີ່ກອງທັບ ສ.ອາເມຣິກາປະຕິບັດການໂຈມຕີທາງອາກາດບໍລິເວນສະໜາມບິນສາກົນແບກແດດ ປະເທດອິຣັກ ເມື່ອວັນສຸກ 3 ມັງກອນ ທີ່ຜ່ານມາ ຕາມເວລາທ້ອງຖິ່ນ ຂ້າທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ແຫ່ງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ ຫຼື PMF ເຊິ່ງເປັນເຄືອຂ່າຍນັກຮົບຊີວະໃນອິຣັກ ທີ່ມີຄວາມໃກ້ຊິດກັບອີຣານ ຕໍ່ຈາກນັ້ນພຽງ 24​ ຊົ່ວໂມງ ມີການໂຈມຕີທາງອາກາດຄັ້ງໃໝ່ເກີດຂຶ້ນທາງທິດເໜືອ ຂອງນະຄອນຫຼວງແບກແດດ ມີເປົ້າໝາຍເປັນລົດ 2 ຄັນຂອງກອງກຳລັງຮັສ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 6 ຄົນ ແລະ ໄດ້ຮັບບາດເຈັບ 3 ຄົນ.

ຂະນະທີ່ສະພາຄວາມໝັ້ນຄົງສູງສຸດຂອງອີຣານ ທີ່ຂຶ້ນໂດຍກົງກັບທ່ານ ຢາຕອນເລາະອາລີ ຄາເມເນອີ ຜູ້ນຳສູງສຸດອີຣານ ອອກຖະແຫຼງການວ່າ ກອງປະຊຸມມີມະຕີໃນການໃຊ້ມາດຕະການຕອບໂຕ້ຕໍ່ ສ.ອາເມຣິກາແລ້ວ ແຕ່ບໍ່ໄດ້ລະບຸລາຍລະອຽດວ່າແມ່ນຫຍັງ.

ໃນດ້ານຂອງລັດຖະບານສະວິດ ທີ່ເຮັດໜ້າທີ່ຄຸ້ມຄອງຜົນປະໂຫຍດຂອງ ສ.ອາເມຣິກາ ແລະ ອີຣານ ທີ່ບໍ່ມີສາຍພົວພັນການທູດຕໍ່ກັນມາຕັ້ງແຕ່ປີ 1979 ຮຽກຮ້ອງໃຫ້ທັງສອງປະເທດຫຼີກລ້ຽງຄວາມຮຸນແຮງ ເຊັ່ນດຽວກັນສະຫະພາບເອີຣົບ, ເອຢິບ, ຊອກດານີ ແລະ ບາເຣນ ຕ່າງກໍ່ຮຽກຮ້ອງເຊັ່ນກັນ, ສ່ວນຕວັກກີເຕືອນວ່າ ຫາກມີການປະເຊີນໜ້າເກີດຂຶ້ນ ສ.ອາເມຣິກາ ແລະ ອີຣານຈະເຈັບໜັກທັງສອງຝ່າຍ.