ອົດສະຕຣາລີ ຮຽກໃຊ້ກຳລັງເສີມຈາກກອງທັບ 3,000 ຄົນ ສູ້ກັບວິກິດໄຟປ່າທີ່ລຸກລາມໜັກໜ່ວງ

ລາຍງານ 4 ມັງກອນ 2019, ທ່ານ ສະກັອດ ມໍຣິສັນ ນາຍົກລັດຖະມົນຕີອົດສະຕຣາລີຖະແຫຼງເມື່ອວັນສຸກ 3 ມັງກອນ ທີ່ຜ່ານມາ ເລື່ອງການຮຽກລະດົມກຳລັງພົນສຳຮອງ 3,000 ຄົນ ເພື່ອກຽມປະຕິບັດພາລະກິດສະໜັບສະໜູນທຸກພາກສ່ວນໃນການຕໍ່ສູ້ກັບໄຟປ່າທີ່ລຸກລາມໃນທົ່ວປະເທດຫຼາຍກວ່າ 130 ຈຸດ ຕັ້ງແຕ່ເດືອນກັນຍາ ປີທີ່ຜ່ານມາ, ໂດຍສ່ວນໃຫຍ່ຢູ່ທາງພາກຕາເວັນອອກລົງໄປຫາພາກໃຕ້ຂອງປະເທດຄື ລັດນິວເຊົາເວວ, ລັດວິກຕໍເຣຍ, ເຊົາອົດສະຕຣາລີ ແລະ ລັດທັສແມເນຍ ສົ່ງຜົນໃຫ້ມີຜູ້ເສຍຊີວິດລວມກັນຢ່າງໜ້ອຍ 23 ຄົນ ຖືເປັນການລະດົມກຳລັງພົນສຳຮອງໃນຄັ້ງດຽວຫຼາຍທີ່ສຸດໃນປະຫວັດສາດຍຸກໃໝ່ຂອງອົດສະຕຣາລີ, ເຖິງຢ່າງໃດກໍ່ຕາມ ມີການຕັ້ງຄຳຖາມຕາມມາເຊັ່ນກັນວ່າ ເພາະເຫດໃດລັດຖະບານຈຶ່ງຕ້ອງໃຊ້ເວລາດົນນານປານນີ້ ໃນການຕັດສິນໃຈດຳເນີນການຢ່າງຈິງຈັງ ເພື່ອແກ້ໄຂໄພທຳມະຊາດຮຸນແຮງຄັ້ງນີ້.

ຂະນະທີ່ສຳນັກງານອຸຕຸນິຍົມວິທະຍາແຫ່ງຊາດອົດສະຕຣາລີລາຍງານວ່າ ອຸນຫະພູມສູງສຸດໃນປະເທດ 4 ມັງກອນນີ້ ວັດແທກໄດ້ 48.1 ອົງສາເຊ ທີ່ເມືອງເພນຣິດ ໃນລັດນິວເຊົາເວວ, ສ່ວນອຸນຫະພູມທີ່ນະຄອນຫຼວງແຄນເບີຣາແມ່ນ 42.9 ອົງສາເຊ ສູງທີ່ສຸດເປັນສະຖິຕິໃໝ່ສຳລັບນະຄອນຫຼວງຂອງອົດສະຕຣາລີເຊັ່ນກັນ ເຊິ່ງເປັນໄປຕາມການພະຍາກອນເມື່ອຕົ້ນອາທິດນີ້ ວ່າຄື້ນຄວາມຮ້ອນຮອບໃໝ່ຈະແຜ່ອິດທິພົນປົກຄຸມເກືອບທົ່ວທັງອົດສະຕຣາລີ ແລະ ຈະເພີ່ມອຸປະສັກໃຫ້ກັບເຈົ້າໜ້າທີ່ໃນການແກ້ໄຂໄຟປ່າ ທີ່ຕອນນີ້ຄວບຄຸມເກືອບບໍ່ໄດ້ແລ້ວ.

ໃນເວລາດຽວກັນ, ໜ່ວຍງານດັບເພີງແຫ່ງລັດນິວເຊົາເວວລາຍງານວ່າ ໄຟປ່າເຄີໂຣແວນ ເຊິ່ງເປັນໜຶ່ງໃນປ່າຂະໜາດໃຫຍ່ທີ່ເຈົ້າໜ້າທີ່ຍັງຄວບຄຸມບໍ່ໄດ້ ໄດ້ທະວີຄວາມຮຸນແຮງຂຶ້ນອີກດ້ວຍອິດທິພົນຈາກຄື້ນຄວາມຮ້ອນ ແລະ ສ້າງການປ່ຽນແປງໃຫ້ກັບລະບົບອາກາດໃນບໍລິເວນໃກ້ຄຽງ ໂດຍເກີດພາຍຸຟ້າຮ້ອງຟ້າເຫຼື້ອມ ແລະ ລົມຜີຫົວກຸດຂະໜາດນ້ອຍ, ເຊິ່ງທາງການລັດນິວເຊົາເວວ ແລະ ລັດວິກຕໍເຣຍສັ່ງອົບພະຍົບປະຊາຊົນລວມກັນຫຼາຍກວ່າ 100,000 ຄົນໃນອາທິດນີ້ ລວມເຖິງ 4,000 ຄົນທີ່ເມືອງມັນລາຄູຕາ ແຄມຝັ່ງລັດນິວເຊົາເວວ ທີ່ຢູ່ທ່າມກາງວົງລ້ອມຂອງໄຟປ່າ ແລະ ກອງທັບອົດສະຕຣາລີໄດ້ສົ່ງເຮືອ 2 ລຳໄປອົບພະຍົບຜູ້ປະສົບໄຟທີ່ນີ້ຕັ້ງແຕ່ວັນສຸກ ທີ່ຜ່ານມາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube