ປ.ທຣຳກ່າວວ່າ ໄດ້ລັອກເປົ້າອີຣານ 52 ຈຸດ ພ້ອມຕີຫາກໝາກຜົນໃນຕາເວັນອອກກາງຖືກແຕະຕ້ອງ

ລາຍງານ 5 ມັງກອນ 2020, ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ກ່າວເມື່ອວັນເສົາ 4 ມັງກອນ ທີ່ຜ່ານມາວ່າ ອີຣານມີຄວາມຫຶກເຫີມໃນການທຳລາຍຜົນປະໂຫຍດຂອງ ສ.ອາເມຣິກາໃນອິຣັກ ແລະ ອີກຫຼາຍປະເທດໃນຕາເວັນອອກກາງ ເພື່ອແກ້ແຄ້ນໃຫ້ກັບການເສຍຊີວິດຂອງທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ.

ເຊິ່ງໜ່ວຍງານທີ່ກ່ຽວຂ້ອງຂອງລັດຖະບານ ສ.ອາເມຣິກາໄດ້ລະບຸຕຳແໜ່ງຂອງສະຖານທີ່ສຳຄັນ 52 ແຫ່ງໃນອີຣານ ໂດຍ ສ.ອາເມຣິກາຈະໂຈມຕີຢ່າງໄວວາ ແລະ ໜັກໜ່ວງ ຫາກລັດຖະບານອີຣານສ້າງຄວາມເສຍຫາຍໃຫ້ກັບຊີວິດຂອງພົນລະເມືອງອາເມຣິກາ ແລະ ຊັບສິນຂອງ ສ.ອາເມຣິກາ, ທ່ານ ໂດໂນ ທຣຳ ກ່າວອີກວ່າ ເປົ້າໝາຍບາງແຫ່ງມີຄວາມສຳຄັນຢ່າງຍິ່ງໃນດ້ານວັດທະນະທຳຕໍ່ອີຣານ ແລະ ຂະຫຍາຍຄວາມວ່າ ການກຳນົດເປົ້າໝາຍ 52 ແຫ່ງນັ້ນ ເພື່ອໃຫ້ເທົ່າກັບຈຳນວນພົນລະເມືອງອາເມຣິກາ ທີ່ເຄີຍຖືກຈັບເປັນຕົວປະກັນຢູ່ໃນສະຖານເອກອັກຄະລັດຖະທູດ ສ.ອາເມຣິກາ ທີ່ນະຄອນຫຼວງເຕຫະຣານ ເປັນເວລາເຖິງ 444 ວັນ ໃນໄລຍະການປະຕິວັດອີຣານ ເມື່ອປີ 1979 ແລະ ເປັນຈຸດແຕກຫັກຂອງສາຍພົວພັນລະຫວ່າງທັງສອງປະເທດ.

ເຖິງຢ່າງໃດກໍ່ຕາມ, ທ່າທີດັ່ງກ່າວຂອງຜູ້ນຳ ສ.ອາເມຣິກາ ເກີດຂຶ້ນພຽງວັນດຽວ ຫຼັງຈາກທີ່ກ່າວວ່າບໍ່ຕ້ອງການສົງຄາມກັບອີຣານ ແລະ ໃນເວລາດຽວກັນມີລາຍງານການຍິງປືນໃຫຍ່ຢ່າງໜ້ອຍ 2 ນັດ ໂຈມຕີພື້ນທີ່ໃກ້ກັບສະຖານເອກອັກຄະລັດຖະທູດ ສ.ອາເມຣິກາ ປະຈຳນະຄອນຫຼວງແບກແດດ ປະເທດອິຣັກ ທີ່ປິດທຳການຢ່າງບໍ່ມີກຳນົດ ນັບຕັ້ງແຕ່ເຫດປະທ້ວງຕໍ່ຕ້ານປະຕິບັດການທາງອາກາດຂອງ ສ.ອາເມຣິກາ ທີ່ໂຈມຕີກຸ່ມຄາຕາອິບ ຮິສບອນເລາະ ໃນອິຣັກ ແລະ ຊີຣີ ເມື່ອທ້າຍປີທີ່ຜ່ານມາ ສົ່ງຜົນໃຫ້ມີຜູ້ເສຍຊີວິດຢ່າງໜ້ອຍ 25 ຄົນ ແລະ ມີການຍິງຈະຫຼວດອີກຢ່າງໜ້ອຍ 2 ລູກ ໂຈມຕີຖານທັບອັນ-ບາລັດ ເຂດນອກນະຄອນຫຼວງແບກແດດ ທີ່ມີທະຫານອາເມຣິກາປະຈຳການຢູ່ ຫຼັງເກີດເຫດຍັງບໍ່ມີບຸກຄົນໃດອອກມາສະແດງຕົນວ່າກ່ຽວຂ້ອງ.

ຂະນະທີ່ກອງກຳລັງຮັສ ເຊິ່ງເປັນເຄືອຂ່າຍນັກຮົບຊີອະໃນອິຣັກທີ່ມີຄວາມໃກ້ຊິດກັບອີຣານ ແລະ ສູນເສຍທ່ານ ອາບູມາດີ ອັນ-ມູຮັນດິສ ຮອງຜູ້ບັນຊາການ ພ້ອມກັບທ່ານ ພົນຕີ ກັສເຊັມ ໂຊໄລມານີ ຈາກການໂຈມຕີຂອງ ສ.ອາເມຣິກາ ປະກາດເຕືອນໃຫ້ທະຫານອິຣັກຖອຍຫ່າງຈາກຖາບທັບ ສ.ອາເມຣິກາທຸກແຫ່ງໃນລັດສະໜີ 1 ກິໂລແມັດ ເລີ່ມຕັ້ງແຕ່ຕອນຄ່ຳຂອງວັນອາທິດ 5 ມັງກອນນີ້.