ຈີນກ່າວກັບອີຣານ ພ້ອມເຂົ້າໄປຮັກສາສັນຕິພາບໃນຕາເວັນອອກກາງ ທ່າມກາງຄວາມເຄັ່ງຕຶງສຸດຂີດກັບ ສ.ອາເມຣິກາ

ລາຍງານ 5 ມັງກອນ 2020, ທ່ານ ຫວັງ ອີ້ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດຂອງ ສປ.ຈີນ ກ່າວເມື່ອວັນເສົາ 4 ມັງກອນ ທີ່ຜ່ານມາວ່າ: ປະຕິບັດການທາງທະຫານຂອງສະຫະລັດ ອາເມຣິກາໃນຕາເວັນອອກກາງ ມີແຕ່ສ້າງຄວາມຂັດແຍ່ງລະຫວ່າງປະເທດ ອັນສົ່ງຜົນໃຫ້ສະຖານະການໃນຕາເວັນອອກາງຕົກຕ່ຳລົງ ຈຶ່ງບໍ່ເຫັນດີນຳກັບການໃຊ້ກຳລັງໃນການແກ້ໄຂບັນຫາ ການຫັນໜ້າເຂົ້າມາເຈລະຈາກັນເປັນການແກ້ໄຂບັນຫາທີ່ດີທີ່ສຸດ.

ເຊິ່ງທ່ານ ຫວັງ ອີ້ ຢືນຢັນພາຍຫຼັງການສົນທະນາທາງໂທລະສັບກັບທ່ານ ໂມຮຳໝັດ ຈາວາດ ຊາຣີບ ລັດຖະມົນຕີກະຊວງການຕ່າງປະເທດອີຣານວ່າ ຈີນຈະເຂົ້າໄປມີບົດບາດໃນການຮັກສາສັນຕິພາບ ແລະ ຄວາມໝັ້ນຄົງໃນຕາເວັນອອກາງ ແລະ ອ່າວເປີເຊຍໃຫ້ເປັນໄປຢ່າງຖືກຕ້ອງ ແລະ ເປັນທຳ.

ເຊິ່ງຈຸດຢືນດັ່ງກ່າວຂອງ ສປ.ຈີນ ເກີດຂຶຶ້ນພາຍຫຼັງທີ່ສະຖານະການໃນຕາເວັນອອກກາງທະວີຄວາມເຄັ່ງຕຶງຂຶຶ້ນສຸດຂີດອີກຄັ້ງ ຈາກກໍລະນີທີ່ ສ.ອາເມຣິກາ ໂຈມຕີທາງອາກາດໃນນະຄອນຫຼວງແບກແດດ ປະເທດອິຣັກ ເມື່ອວັນທີ 3 ມັງກອນ ທີ່ຜ່ານມາ ຂ້າທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube