ລັດເຊຍກ່າວວ່າການກະທຳຂອງ ສ.ອາເມຣິກາ ຕໍ່ນາຍພົນອີຣານນັ້ນລະເມີດກົດໝາຍສາກົນຢ່າງຊັດເຈນ

ລາຍງານ 5 ມັງກອນ 2020, ທ່ານ ເຊີເກ ລາວາຣົບ ລັດຖະມົນຕີກະຊວງການຕ່າງປະເທດລັດເຊຍກ່າວວ່າ ການຂ້າທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ຈາກປະຕິບັດການໂຈມຕີທາງອາກາດຂອງ ສ.ອາເມຣິກາ ທີ່ນະຄອນຫຼວງແບກແດດ ປະເທດອິຣັກ ຖືເປັນການລະເມີດກົດໝາຍສາກົນ ໃນລະຫວ່າງການສົນທະນາທາງໂທລະສັບກັບທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ເມື່ອວັນສຸກ 3 ມັງກອນ ທີ່ຜ່ານມາ.

ລັດຖະມົນຕີກະຊວງການຕ່າງປະເທດລັດເຊຍລະບຸວ່າ: ການກະທຳໂດຍເຈດຕະນາຂອງ ສ.ອາເມຣິກາ ໃນການກຳຈັດເຈົ້າໜ້າທີ່ຂອງລັດສະມາຊິກສະຫະປະຊາດ ໂດຍສະເພາະຢ່າງຍິ່ງໃນອານາເຂດຂອງລັດອະທິປະໄຕທີສາມ ໂດຍບໍ່ແຈ້ງໃຫ້ຊາບລ່ວງໜ້າ ຖືເປັນການລະເມີດກົດໝາຍລະຫວ່າງປະເທດຢ່າງຮ້າຍແຮງ ແລະ ຄວນຖືກປະນາມ.

ທ່ານ ເຊີເກ ລາວາຣົບ ຍັງຮຽກຮ້ອງໃຫ້ ສ.ອາເມຣິກາຢຸດຕິໃຊ້ວິທີການທີ່ບໍ່ຖືກຕ້ອງຕາມກົດໝາຍ ແລະ ຄວນແກ້ໄຂບັນຫາດ້ວຍການເຈລະຈາ, ພ້ອມທັງກ່າວວ່າ ການທະກຳດັ່ງກ່າວຂອງ ສ.ອາເມຣິກາສົ່ງຜົນກະທົບຢ່າງຮ້າຍແຮງຕໍ່ສັນຕິພາບ ແລະ ຄວາມໝັ້ນຄົງໃນພູມມິພາກຕາເວັນອອກກາງ ແລະ ບໍ່ໄດ້ຊ່ວຍໃຫ້ຄວາມພະຍາຍາມໃນການແກ້ບັນຫາຄວາມຂັດແຍ່ງອັນຍາວນານໃນຕາເວັນອອກກາງ ໃນທາງກົງກັນຂ້າມຜັດຍິ່ງເພີ່ມທະວີຄວາມເຄັ່ງຕຶງຂຶ້ນອີກຄັ້ງໃໝ່.

ເຊິ່ງທ່ານ ໂດໂນ ທຣຳ ປະທານປະເທດ ສ.ອາເມຣກາ ກໍ່ໄດ້ຖະແຫຼງຕໍ່ກໍລະນີດັ່ງກ່າວ ໂດຍໃຫ້ເຫດຜົນວ່າ ທ່ານ ພົນຕີ ກັສເຊັມ ໂຊໄລມານີ ກຳລັງວາງແຜນໃຫ້ມີການໂຈມຕີຢ່າງໂຫດຮ້າຍຕໍ່ເຈົ້າໜ້າທີ່ການທູດຂອງ ສ.ອາເມຣິກາ, ທະຫານອາເມຣິກາ ແລະ ຜົນປະໂຫຍດຂອງ ສ.ອາເມຣິກາໃນຕາເວັນອອກກາງ ໂດຍປະຕິບັດການດັ່ງກ່າວເປັນຄຳສັ່ງຂອງຕົນ ເພື່ອປົກປ້ອງຜົນປະໂຫຍດຂອງ ສ.ອາເມຣິກາ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube