ສະພາອິຣັກມີມະຕິ ຂັບໄລ່ທະຫານ ສ.ອາເມຣິກາ ແລະ ພັນທະມິດອອກນອກປະເທດ

ລາຍງານ 6 ມັງກອນ 2020, ສະພາປະຊາຊົນອິຣັກມີມະຕິໃນກອງປະຊຸມວາລະພິເສດ ເມື່ອວັນອາທິດ 5 ມັງກອນ ທີ່ຜ່ານມາ ວ່າດ້ວຍການຍຸຕິການປະຈຳການຂອງທະຫານອາເມຣິກາ ແລະ ພັນທະມິດໃນປະເທດ ໂດຍມະຕິຂອງສະພາຂໍໃຫ້ລັດຖະບານພາຍໃຕ້ການນຳຂອງທ່ານນາຍົກລັດຖະມົນຕີ ອາເດວ ອັບດຸນ-ມາດີ ດຳເນີນການຕາມຂະບວນການທາງກົດໝາຍ ໃຫ້ທະຫານຕ່າງປະເທດຖອນກຳລັງອອກຈາກຜືນແຜ່ນດິນອິຣັກ ແລະ ຫ້າມກອງທັບຕ່າງປະເທດໃຊ້ນ່ານຟ້າ, ນ່ານນ້ຳ ແລະ ຜືນແຜ່ນດິນຂອງອິຣັກເພື່ອປະຕິບັດການທາງທະຫານໃນທຸກກໍລະນີ.

ເຖິງແມ່ນວ່າສະມາຊິກສະພາທີ່ເປັນຊາວສຸໜີ່ ແລະ ຊາວເຄິດຈະບໍ່ເຂົ້າຮ່ວມກອງປະຊຸມເທື່ອນີ້ ແຕ່ສຽງສະໜັບສະໜູນຍັງພຽງພໍຜ່ານມະຕິ, ດ້ານກະຊວງການຕ່າງປະເທດ ສ.ອາເມຣິກາ ອອກຖະແຫຼງການວ່າຜິດຫວັງກັບຈຸດຢືນຂອງສະພາອິຣັກ, ສ່ວນອົງກອນສົນທິສັນຍາອາກລັງຕິກເໜືອ (NATO) ກໍ່ໄດ້ໂຈະພາລະກິດໃນອິຣັກຕັ້ງແຕ່ວັນເສົາ ທີ 4 ມັງກອນ ທີ່ຜ່ານມາ.

ການເຄື່ອນໄຫວດັ່ງກ່າວຖືເປັນຄັ້ງທີ 2 ໃນຮອບທົດສະວັດ ທີ່ອິຣັກຕ້ອງການໃຫ້ກອງທັບ ສ.ອາເມຣິກາ ແລະ ພັນທະມິດຖອນກຳລັງອອກໄປ ໂດຍສະເພາະທະຫານອາເມຣິກາທີ່ເຄີຍປະຈຳການໃນອິຣັກສູງສຸດເຖິງ 170,000 ຄົນ ເມື່ອປີ 2007 ແຕ່ລັດຖະບານ ສ.ອາເມຣິກາໃນເວລານັ້ນທີ່ຢູ່ພາຍໃຕ້ການນຳຂອງທ່ານປະທານປະເທດ ຈອສ ດັບເບິນຢູ ບຸສ ເຈລະຈາກັບລັດຖະບານອິຣັກເມື່ອປີ 2008 ເພື່ອຂໍຕໍ່ເວລາປະຈຳການກອງທັບ ສ.ອາເມຣິກາ ໃນອິຣັກ ແລະ ໄດ້ຮັບອະນຸຍາດຈົນເຖິງປີ 2011 ກົງກັບສະໄໝຂອງທ່ານປະທານປະເທດ ບາຣັກ ໂອບາມາ ເຊິ່ງຖອນທະຫານອາເມຣິກາກັບອອກໄປ ໂດຍລັດຖະບານອິຣັກຍັງປະຕິເສດຄຳຮ້ອງຂອງ ສ.ອາເມຣິກາ ທີ່ຕ້ອງການສິດທິພາຍນອກອານາເຂດໃຫ້ກັບທະຫານອາເມຣິກາ ຈາກການຖືກດຳເນີນຄະດີໃນອິຣັກ.

ເຖິງຢ່າງໃດກໍ່ຕາມ, ສ.ອາເມຣິກາສົ່ງທຫານກັບເຂົ້າມາອີກເມື່ອ 2011 ເພື່ອປະຕິບັດພາລະກິດປາບປາມກຸ່ມ IS ແລະ ປັກຫຼັກຢູ່ຈົນເຖິງປັດຈຸບັນປະມານ 5,200 ຄົນ ແຕ່ກຳລັງຈະເດີນທາງເພີ່ມເຂົ້າມາອີກປະມານ 3,000 ຄົນ ຕາມຄຳສັ່ງຂອງກະຊວງປ້ອງກັນປະເທດ ເພື່ອປົກປ້ອງຜົນປະໂຫຍດຂອງ ສ.ອາເມຣິກາ ພາຍຫຼັງທີ່ທ່ານປະທານປະເທດ ໂດໂນ ທຣຳ ສັ່ງໃຫ້ກອງທັບ ສ.ອາເມຣິກາ ປະຕິບັດການໂຈມຕີທາງອາກາດໃກ້ກັບສະໜາມບິນສາກົນນະຄອນຫຼວງແບກແດດ ເມື່ອວັນທີ 3 ມັງກອນ ທີ່ຜ່ານມາ ຂ້າທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ ເຊິ່ງເປັນເຄືອຂ່າຍນັກຮົບຊີອະໃນອິຣັກທີ່ມີຄວາມໃກ້ຊິດກັບອີຣານ ສົ່ງຜົນໃຫ້ບັນຍາກາດໃນຕາເວັນອອກກາງທະວີຄວາມເຄັ່ງຕຶງຂຶ້ນສຸດຂີດໃນຮອບຫຼາຍສິບປີ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube