ອີຣານປະກາດຈີກຂໍ້ຕົກລົງນິວເຄຼຍ ກັບມາເສີມສະມັດຕະພາບຢູເຣນຽມຢ່າງເຕັມຮູບແບບ

ລາຍງານ 6 ມັງກອນ 2020, ສະຖານີໂທລະພາບແຫ່ງຊາດອີຣານເຜີຍແຜ່ຖະແຫຼງການຂອງກອງປະຊຸມຄະນະລັດຖະມົນຕີອີຣານ ເມື່ອວັນອາທິດ 5 ມັງກອນ ທີ່ຜ່ານມາ ມີມະຕິໃຫ້ດຳເນີນການ “ຂັ້ນທີ 5” ເຖິງຖືເປັນຂັ້ນສຸດທ້າຍໃນການປະຕິບັດການຕາມຂໍ້ກຳນົດທີ່ລະບຸໃນຫຍໍ້ໜ້າທີ 36 ຂອງຂໍ້ຕົກລົງແຜນປະຕິບັດການຮ່ວມແບບສົມບູນ (Joint Comprehensive Plan of Action ຫຼື JCPOA)  ເຊິ່ງເປັນຂໍ້ຕົກລົງນິວເຄຼຍ ສະບັບປີ 2015 ໂດຍລັດຖະບານອີຣານຈະບໍ່ຈຳກັດຈຳນວນເຄື່ອງຈັກເສີມສະມັດຕະພາບຢູເຣນຽມໃນປະເທດອີກຕໍ່ໄປ ຕໍ່ຈາກນີ້ໂຄງການນິວເຄຼຍອີຣານຈະເດີນໜ້າດ້ວຍຕົນເອງ ແລະ ຄວາມຕ້ອງການທາງເຕັກນິກຂຶ້ນຢູ່ກັບການປະເມີນສະຖານະການ.

ເຊິ່ງການເຄື່ອນໄຫວດັ່ງກ່າວເທົ່າກັບເປັນການຍຸຕິຂໍ້ຕົກລົງນິວເຄຼຍໄປໃນຕົວ ເຖິງແມ່ນວ່າອີຣານຢືນຢັນທີ່ຈະຍຶດໝັ້ນຕາມແນວທາງປະຕິບັດຂອງອົງການພະລັງງານປະລະມານູສາກົນ (IAEA) ເຖິງຢ່າງໃດກໍ່ຕາມ ຂໍ້ຕົກລົງສະບັບນີ້ໄດ້ເສື່ອມສະຖຽນລະພາບຢ່າງຕໍ່ເນື່ອງ ນັບຕັ້ງແຕ່ ສ.ອາເມຣິກາ ຖອນຕົວເມື່ອເດືອນພຶຶຶດສະພາ 2018 ແລະ ກັບມາເດີນໜ້າໃຊ້ມາດຕະການຂວໍ້າບາດທາງເສດຖະກິດຝ່າຍດຽວຕໍ່ລັດຖະບານອີຣານ ໂດຍເນັ້ນເປົ້າໄປທີ່ອຸດສາຫະກຳນ້ຳມັນຂອງອີຣານ ທີ່ມີປະລິມານຫຼາຍເປັນອັນດັບ 4 ຂອງໂລກ ແລະ ອັນດັບ 2 ໃນບັນດາສະມາຊິກອົງການກຸ່ມປະເທດຜູ້ຜະລິດນ້ຳມັນ (OPEC) ເປັນຮອງພຽງອາຣັບບີ ຊາອູດິດ, ເຊິ່ງຕະຫຼອດເວລາທີ່ຜ່ານມາ ອີຣານຕອບໂຕ້ດ້ວຍການຍົກເລີກປະຕິບັດຕາມເງື່ອນໄຂຂອງຂໍ້ຕົກລົງນິວເຄຼຍສະບັບນີ້ເປັນລຳດັບຂັ້ນ.

ຂະນະທີ່ລັດຖະບານ ສ.ອາເມຣິກາ ຍັງບໍ່ສະແດງຈຸດຢືນຕໍ່ຖະແຫຼງການຂອງລັດຖະບານອີຣານໃນເລື່ອງນີ້ ທ່າມກາງບັນຍາກາດອັນເຄັ່ງຕຶງສຸດຂີດໃນຕາເວັນອອກກາງ ນັບຕັ້ງແຕ່ກອງທັບ ສ.ອາເມຣິກາ ປະຕິບັດການໂຈມຕີທາງອາກາດ ຂ້າທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງກຳລັງປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ ເຊິ່ງເປັນເຄືອຂ່າຍນັກຮົບຊີອະໃນອິຣັກ ທີ່ມີຄວາມໃກ້ຊິດກັບອີຣານ ໃກ້ກັບສະໜາມບິນສາກົນນະຄອນຫຼວງແບກແດດ ເມື່ອວັນທີ 3 ມັງກອນ ທີ່ຜ່ານມາ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube