ຜູ້ບັນຊາການໜ່ວຍຮົບພິເສດຄົນໃໝ່ຂອງອີຣານ ປະກາດວ່າ ສ.ອາເມຣິກາ ຕ້ອງຖືກຕອບໂຕ້

ລາຍງານ 6 ມັງກອນ 2020, ທ່ານ ພົນຈັດຕະວາ ເອສມາເອວ ການີ ຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານຄົນໃໝ່ ກ່າວຜ່ານສະຖານີໂທລະພາບແຫ່ງຊາດວ່າ ກອງທັບປະຕິວັດອີຣານມີມາດຕະການສະເພາະແລ້ວ ເພື່ອຕອບໂຕ້ການທີ່ ສ.ອາເມຣິກາ ຂ້າທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການຄຸດ ທີ່ເສຍຊີວິດພ້ອມກັບທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ ເຊິ່ງເປັນເຄືອຂ່າຍນັກຮົບຊີອະໃນອິຣັກ ທີ່ມີຄວາມໃກ້ຊິດກັບອີຣານ ເມື່ອວັນທີ 3 ມັງກອນ ທີ່ຜ່ານມາ.

ເຖິງແມ່ນວ່າຄຳກ່າວຂອງທ່ານ ພົນຈັດຕະວາ ເອສມາເອວ ການີ ຈະລະບຸພຽງເທົ່ານັ້ນ ແລະ ບໍ່ມີການໃຫ້ລາຍລະອຽດໃດໆເພີ່ມອີກ ແຕ່ຖືເປັນການສະແດງຈຸດຢືນຢ່າງເປັນທາງການຄັ້ງທຳອິດຂອງຜູ້ບັນຊາການໜ່ວຍຮົບພິເສດຄົນໃໝ່ຂອງອີຣານ ເຊິ່ງອະດີດເຄີຍເປັນຮອງທ່ານ ພົນຕີ ກັສເຊັມ ໂຊໄລມານີມາຍາວນານຫຼາຍທົດສະຫວັດ ວ່າອີຣານຈະເລືອກເສັ້ນທາງໃດຕໍ່ຈາກນີ້ ທ່າມກາງການຕິດຕາມຂອງທຸກຝ່າຍ ທີ່ເລັງໄປທີ່ອິຣັກ ວ່າອາດເປັນສະໜາມຮົບໃໝ່ຂອງສົງຄາມຕົວແທນລະຫວ່າງ ສ.ອາເມຣິກາ ແລະ ອີຣານ ຈາກການທີ່ລັດຖະບານອິຣັກຊຸດປັດຈຸບັນມີຄວາມໃກ້ຊິດກັບອີຣານຫຼາຍຂຶ້ນ.