ດ່ວນ: ຍົນໂດຍສານຂອງອູແກຣນຕົກໃນອີຣານ ພ້ອມຜູ້ໂດຍສານ ແລະ ຈຸບິນ 176 ຊີວິດ

ລາຍງານ 8 ມັງກອນ 2020, ອີງຕາມການລາຍງານຂອງສຳນັກຂ່າວແຫ່ງຊາດອີຣານ (IRNA) ວ່າຖ້ຽວບິນ PS752 ຂອງສາຍການບິນ Ukrainian International Airlines (UIA) ທີ່ໃຊ້ຍົນໂດຍສານໂບອິ້ງຮຸ້ນ 737-800 ມີຜູ້ໂດຍສານ ແລະ ຈຸບິນລວມກັນປະມານ 176 ຄົນ ຕົກພາຍໃນເວລາບໍ່ພໍເທົ່າໃດນາທີ ຫຼັງຈາກອອກເດີນທາງຈາກສະໜາມບິນສາກົນອິໝ່າມ ໂຄໄມນີ ນະຄອນຫຼວງເຕຫະຣານ ເມື່ອຕອນເຊົ້າມືດຂອງວັນພຸດນີ້ ຕາມເວລາທ້ອງຖິ່ນ ຍົນລຳດັ່ງກ່າວມີຈຸດໝາຍປາຍທາງຄືນະຄອນຫຼວງຄຽບ ປະເທດອູແກຣນ.

ເຊິ່ງລາຍງານລະບຸວ່າ: ຍົນໄດ້ມີໄຟລຸກໄໝ້ຈົນສາມາດແນມເຫັນໃນໄລຍະໄກເປັນດວງໄຟຂະໜາດໃຫຍ່ ກ່ອນຕົກລົງກະແທກພື້ນດິນ ສົ່ງຜົນໃຫ້ເກີດໄຟລຸກຢ່າງຮຸນແຮງ ເບື້ອງຕົນໜ່ວຍກູ້ໄພໄດ້ເດີນທາງເຖິງຈຸດເກີດເຫດເພື່ອຄວບຄຸມສະຖານະການແລ້ວ, ໂດຍໃນເບື້ອງຕົ້ນມີລາຍງານສາເຫດການຕົກຂອງຍົນວ່າ ເກີດຈາກຄວາມຂັດຂ້ອງທາງເຕັກນິກ.

ເຖິງຢ່າງໃດກໍ່ຕາມ ເຫດການແມ່ນກີດຂຶ້ນໃນເວລາດຽວກັນກັບທີ່ກອງທັບປະຕິວັດອີຣານ ລະດົມຍິງຈະຫຼວດຂ້າມແດນ ໂຈມຕີຖານທັບ ສ.ອາເມຣິກາ 2 ແຫ່ງໃນອິຣັກ ເພື່ອແກ້ແຄ້ນປະຕິບັດການໂຈມຕີທາງອາກາດຂອງ ສ.ອາເມຣິກາ ໃນນະຄອນຫຼວງແບກແດດ ເມື່ອວັນທີ 3 ມັງກອນ ທີ່ຜ່ານມາ ເພື່ອຂ້າທ່ານ ພົນຕີ ກັສເຊັມ ໂຊໄລມານີ້ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ.