NATO ຖອນທະຫານບາງສ່ວນອອກຈາກອິຣັກ ຕາມມະຕິຂອງສະພາອິຣັກ

ລາຍງານ 8 ມັງກອນ 2020, ອົງການສົນທິສັນຍາອາກລັງຕິກເໜືອ (NATO) ອອກຖະແຫຼງການ ເລື່ອງການຍ້າຍ ແລະ ສັບປ່ຽນກຳລັງພົນບາງສ່ວນອອກຈາກອິຣັກໄປຍັງກູເວດ ເພື່ອຄວາມປອດໄພຂອງເຈົ້າໜ້າທີ່ ແຕ່ NATO ຢືນຢັນວ່າຈະຍັງຄົງປະຕິບັດການຢູ່ອິຣັກ.

ເຊິ່ງ NATO ໄດ້ປະກາດຍຸດຕິພາລະກິດສະໜັບສະໜູນທາງທະຫານແກ່ກອງທັບອິຣັກມາຕັ້ງແຕ່ວັນທີ 3 ມັງກອນ ທີ່ຜ່ານມາ ພາຍຫຼັງທີ່ກອງທັບ ສ.ອາເມຣິກາ ໂຈມຕີທາງອາກາດໃນນະຄອນຫຼວງແບກແດດ ຂ້າທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາກການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ ເຊິ່ງເປັນເຄືອຂ່າຍນັກຮົບຊີອະໃນອິຣັກ ທີ່ເປັນພັນທະມິດກັບອີຣານ.

ເຖິງແມ່ນວ່າຖະແຫຼງການຂອງ NATO ບໍ່ໄດ້ໃຫ້ລາຍລະອຽດກ່ຽວກັບຈຳນວນທະຫານ, ແຕ່ກອງທັບການາດາ ໄດ້ອອກຖະແຫຼງການເລື່ອງການຍ້າຍທະຫານປະມານ 500 ຄົນອອກຈາກອິຣັກໄປຍັງກູເວດ, ກອງທັບເຢຍລະມັນຍ້າຍທະຫານ 35 ຄົນ ຈາກທັງໝົດ 120 ຄົນອອກຈາກອິຣັກໄປຍັງກູເວດ ແລະ ຊອກດານີ, ຂະນະທີ່ກະຊວງປ້ອງກັນປະເທດອັງກິດ ອອກຖະແຫຼງການພ້ອມຍ້າຍທະຫານອອກຈາກອິຣັກ ຕາມຄວາມຕ້ອງການຂອງລັດຖະບານອິຣັກ, ສ່ວນຝຣັ່ງ ແລະ ອິຕາລີຍັງຈະຮັກສາກຳລັງທະຫານໄວ້ໃນອິຣັກ ແຕ່ມີການປະເມີດສະຖານະການຢ່າງໃກ້ຊິດ.

ໃນດ້ານຂອງທ່ານ ອາເດວ ອັບດຸນ-ມາດີ ນາຍົກລັດຖະມົນຕີອິຣັກ ຢືນຢັນວ່າລັດຖະບານ ສ.ອາເມຣິກາບໍ່ມີທາງເລືອກອື່ນອີກແລ້ວ ນອກຈາກຕ້ອງຖອນທະຫານທີ່ມີປະມານ 5,200 ຄົນອອກຈາກອິຣັກ ຕາມມະຕິຂອງສະພາປະຊາຊົນອິຣັກ ທີ່ປະກາດເມື່ອວັນທີ 5 ມັງກອນ ທີ່ຜ່ານມາ ວ່າກອງທັບ ສ.ອາເມຣິກາ ແລະ ພັນທະມິດຕ້ອງຍຸຕິກິດຈະກຳທາງການທະຫານທຸກຮູບແບບ ລວມທັງຫ້າມໃຊ້ຜືນແຜ່ນດິນ, ນ່ານນ້ຳ, ນ່ານຟ້າຂອງອິຣັກເພື່ອປະຕິບັດການທາງທະຫານ.

ເຖິງຢ່າງໃດກໍ່ຕາມ, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວເມື່ອວັນທີ 7 ມັງກອນ ທີ່ຜ່ານ ວ່າການທີ່ ສ.ອາເມຣິກາຖອນທະຫານອອກຈາກອິຣັກໃນຕອນນີ້ ຖືເປັນເລື່ອງທີ່ຊົ່ວຮ້າຍ ແລະ ທະຫານອາເມຣິກາຈະຖອນກຳລັງອອກອິຣັກແນ່ນອນ ແຕ່ບໍ່ຕອນເວລານີ້, ໂດຍກ່ອນໜ້ານັ້ນຜູ້ນຳ ສ.ອາເມຣິກາ ປະກາດວ່າລັດຖະບານ ສ.ອາເມຣິກາ ຈະຮຽກຄ່າເສຍຫາຍຈຳນວນມະຫາສານ ຈາກລັດຖະບານອິຣັກ ແລະ ກະຊວງການເງິນ ສ.ອາເມຣິກາຢູ່ໃນລະຫວ່າງຮ່າງມາດຕະການຂວ້ຳບາດຄັ້ງໃຫຍ່ທີ່ສຸດຕໍ່ອິຣັກ.

HTML tutorial