ລູກສາວພົນຕີ ກັສເຊັມ ໂຊໄລມານີ ກ່າວວ່າ ສ.ອາເມຣິກາ ຈະພົບກັບອະນາຄົດອັນມືດມົນ

ລາຍງານ 8 ມັງກອນ 2020, ທ່ານ ນາງ ໄຊນາບ ໂຊໄລມານີ ລູກສາວຂອງທ່ານ ພົນຕີ ກັສເຊັມ ໂຊໄລມານີ ກ່າວຕໍ່ໜ້າມວນຊົນໃນພິທີສົບຂອງຜູ້ເປັນພໍ່ ເມື່ອວັນທີ 6 ມັງກອນ ທີ່ຜ່ານມາວ່າ: ການເສຍຊີວິດຂອງພໍ່ຈະປຸກແນວຮ່ວມຕໍ່ຕ້ານໃຫ້ຕື່ນຂຶ້ນມາ ແລະ ຈະເຮັດໃຫ້ ສ.ອາເມຣິກາ ແລະ ອິດສະຣາແອນຕ້ອງພົບກັບວັນແຫ່ງຄວາມມືດມົນ, ພ້ອມກ່າວວ່າ ທ່ານ ໂດໂນ ທຣຳ ປະທານປະເທດ ສ.ອາເມຣິກາ ເປັນຈອມວາງແຜນການອັນຊົ່ວຮ້າຍ ເຮັດໃຫ້ອີຣານ ແລະ ອິຣັກແຕກແຍກດ້ວຍການລອບເອົາຊີວິດພໍ່ຕົນ ແລະ ຮອງຜູ້ບັນຊາການກອງກຳລັງຮັສ ແຕ່ນັ້ນຖືເປັນຄວາມຜິດພາດທາງຍຸດທະສາດ ແລະ ຄວາມລົ້ມແຫຼວຂອງ ສ.ອາເມຣິກາ ເພາະມີແຕ່ຈະຍິງເພີ່ມທະວີຄວາມສາມັກຄີຄັ້ງປະຫວັດສາດ ແລະ ສ້າງຄວາມກຽດຊັງຕໍ່ ສ.ອາເມຣິກາ.

ທ່ານ ນາງ ໄຊນາບ ໂຊໄລມານີ ຍັງກ່າວອີກວ່າ: ຄວາມບ້າຄັງຂອງທ່ານ ໂດໂນ ທຣຳ ເປັນສັນຍາລັກຂອງຄວາມໂງ່ຈ້າ ທີ່ເປັນຂອງຫຼິ້ນໃນມືພວກໄຊອໍນິສ (ອິດສະຣາແອນ) ເທົ່ານັ້ນ, ອາຊະຍາກຳຊົ່ວຮ້າຍຂອງຊາວອາເມຣິກາເປີດເຜີຍໃຫ້ເຫັນເຖິງຈິດວິຍານຂອງການກະທຳທີ່ຜິດກົດໝາຍ ແລະ ຂົ່ມເຫງໃຫ້ເກີດການນອງເລືອດໄປທົ່ວທຸກແຫ່ງຫົນ ໂດຍສະເພາະໃນດິນແດນປາແລັດສະຕິນ.

ເຊິ່ງທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ ເຊິ່ງເປັນເຄື່ອຂ່າຍນັກຮົບຊີອະໃນອິຣັກ ທີ່ເປັນພັນທະມິດກັບອີຣານ ໄດ້ເສຍຊີວິດຈາກປະຕິບັດການໂຈມຕີທາງອາກາດຂອງ ສ.ອາເມຣິກາ ທີ່ນະຄອນຫຼວງແບກແດດ ປະເທດອິຣັກ ເມື່ອວັນທີ 3 ມັງກອນ ທີ່ຜ່ານມາ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube