ສື່ອີຣານລາຍງານວ່າ ທະຫານອາເມຣິກາເສຍຊີວິດ 80 ຄົນ, ຂະນະທີ່ ປ.ທຣຳ ບອກວ່າສະບາຍດີ

ລາຍງານ 8 ມັງກອນ 2020, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ລົງຂໍ້ຄວາມໃນ Twitter ວ່າ: ທຸກຢ່າງສະບາຍດີ ພາຍຫຼັງທີ່ກອງທັບອີຣານຍິງຈະຫຼວດກວ່າ 20 ລູກໂຈມຕີເປົ້າໝາຍຖານທັບ ສ.ອາເມຣິກາ 2 ແຫ່ງໃນອິຣັກ, ໂດຍຜູ້ນຳ ສ.ອາເມຣິກາຢືນຢັນວ່າ ຄວາມເສຍຫາຍກຳລັງຢູ່ໃນລະຫວ່າງການປະເມີນ ລວມທັງຜູ້ເສຍຊີວິດ ແລະ ບາດເຈັບ ແຕ່ກ່າວເພີ່ມເຕີມວ່າຈົນເຖິງຂະນະນີ້ທຸກຢ່າງເປັນໄປດ້ວຍດີ ແລະ ຕົນຈະຖະແຫຼງເລື່ອງການໂຈມຕີຖານທັບ ສ.ອາເມຣິກາ ໃນອິຣັກໃນຕອນເຊົ້າວັນພຸດ 8 ມັງກອນ ຕາມເວລາທ້ອງຖິ່ນ.

ເຖິງຢ່າງໃດກໍ່ຕາມ, ໂທລະພາບຂອງທາງການອີຣານລາຍງານວ່າ ການໂຈມຕີຖານທັບ ສ.ອາເມຣິກາ ເປັນການແກ້ແຄ້ນທີ່ ສ.ອາເມຣິກາ ສັງຫານທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ເມື່ອວັນທີ 3 ມັງກອນ ທີ່ຜ່ານມາ ຢູ່ນະຄອນຫຼວງແບກແດດ ປະເທດອິຣັກ.

ຂະນະທີ່ສື່ທ້ອງຖິ່ນຂອງອີຣານລາຍງານວ່າ ການໂຈມຕີຖານທັບອາກາດ ອັນ-ອັສຊາດ ແຂວງອັນບາ ທາງພາກຕາເວັນຕົກຂອງອິຣັກ ເຮັດໃຫ້ທະຫານອາເມຣິກາເສຍຊີວິດ 80 ຄົນ ແລະ ອາວຸດຍຸດໂທປະກອນໄດ້ຮັບຄວາມເສຍຫາຍ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube