ປ.ທຣຳ ກ່າວວ່າຢາກເຫັນອີຣານມີອະນາຄົດທີ່ຍິ່ງໃຫຍ່ ແລະ ຈະເລີນຮຸ່ງເຮືອງ, ດັ່ງນັ້ນຮ່ວມມືກັນດີກວ່າ

ລາຍງານ 9 ມັງກອນ 2020, ທ່ານ ໂດໂນ ທຣຳ ປະທານປະເທດສະຫະລັດ ອາເມຣິກາ ຖະແຫຼງທີ່ທຳນຽບຂາວ ເມື່ອວັນທີ 8 ມັງກອນ ທີ່ຜ່ານມາ ພາຍຫຼັງຖານທັບ ສ.ອາເມຣິກາ 2​ ແຫ່ງໃນອິຣັກຖືກໂຈມຕີດ້ວຍຈະຫຼວດຂອງກອງທັບປະຕິວັດອີຣານວ່າ: ຂໍບອກດ້ວຍຄວາມພາກພູມໃຈວ່າ ບໍ່ມີທະຫານອາເມຣິກາເສຍຊີວິດຈາກເຫດໂຈມຕີຖານທັບອັນ-ອັສຊາດ ແລະ ເອີບິວ ໃນອິຣັກ ມີພຽງຄວາມເສຍຫາຍເລັກໜ້ອຍເທົ່ານັ້ນ ແລະ ກ່າວວ່າອີຣານເປັນປະເທດທີ່ມີບົດບາດສຳຄັນໃນການສະໜັບສະໜູນການກໍ່ການຮ້າຍ.

ທ່ານ ໂດໂນ ທຣຳ ຍັງລະບຸວ່າ: ການໂຈມຕີສະຖານເອກອັກຄະລັດຖະທູດ ສ.ອາເມຣິກາ ໃນອິຣັກ ທີ່ທ່ານ ພົນຕີ ກັສເຊັມ ໂຊໄລມານີເປັນຜູ້ຢູ່ເບື້ອງຫຼັງ ເຮັດໃຫ້ມີທະຫານອາເມຣິກາເສຍຊີວິດ ໃນຄວາມເປັນຈິງຄວນຖືກສັງຫານດົນແລ້ວ ໂດຍຕໍ່ຈາກນີ້ຈະເດີນໜ້າຂວໍ້າບາດອີຣານຕໍ່ໄປ ຈົນກວ່າອີຣານຈະປ່ຽນແປງຮູບແບບການປົກຄອງຂອງຕົນ, ແຕ່ຜູ້ນຳ ສ.ອາເມຣິກາບໍ່ໄດ້ກ່າວເຖິງການຕອບໂຕ້ທາງທະຫານກັບອີຣານ.

ທ່ານ ໂດໂນ ທຣຳຍັງລະບຸວ່າ: ປະເທດສະມາຊິກຖາວອນສະພາຄວາມໝັ້ນຄົງແຫ່ງສະຫະປະຊາຊາດທັງອັງກິດ, ຝຣັ່ງ ແລະ ສປ.ຈີນ ເຖິງເວລາແລ້ວທີ່ຈະຕ້ອງຍົກເລີກຂໍ້ຕົກລົງນິວເຄຼຍ (Joint Comprehensive Plan of Action ຫຼື JCPOA) ກັບອີຣານ ເພື່ອລວມພະລັງກົດດັນອີຣານ, ພ້ອມທັງຮຽກຮ້ອງໃຫ້ນານາຊາດຕ້ອງຮ່ວມກັນຕໍ່ຕ້ານອີຣານ ໃນຖານະເປັນປະເທດທີ່ກໍ່ໃຫ້ເກີດກຸ່ມກໍ່ການຮ້າຍ ແລະ ຮຽກຮ້ອງໃຫ້ອົງການສົນທິສັນຍາອາກລັງຕິກເໜືອ (NATO) ເຂົ້າມາມີສ່ວນຮ່ວມໃນການຜ່ອນຄາຍສະຖານະການຄວາມຮຸນແຮງໃນຕາເວັນອອກກາງ.

ທ່ານ ໂດໂນ ທຣຳກ່າວອີກວ່າ: ສຳລັບຊັບພະຍາກອນນ້ຳມັນຂອງອີຣານບໍ່ແມ່ນປະເດັນສຳລັບ ສ.ອາເມຣິກາ ເພາະ ສ.ອາເມຣິກາ ໄດ້ຄົ້ນພົບແກັດທຳມະຊາດ ແລະ ບໍ່ນ້ຳມັນເປັນຈຳນວນຫຼາຍ ຈຶ່ງບໍ່ແມ່ນສິ່ງສຳຄັນທີ່ ສ.ອາເມຣິກາ ຈະຕ້ອງເພິ່ງພານ້ຳມັາຈາກຕາເວັນອອກກາງ.

ທ່ານ ໂດໂນ ທຣຳຕໍ່ວ່າ ເຫດໂຈມຕີຄັ້ງນີ້ໄດ້ສະແດງໃຫ້ເຫັນເຖິງຄວາມສາມາດຂອງກອງທັບ ສ.ອາເມຣິກາ ແລະ ອາວຸດຍຸດໂທປະກອນ ທີ່ພິສູດແລ້ວວ່າມີຄວາມສາມາດໃນການປ້ອງກັນຢ່າງດີເລີດ.

ນອກຈາກນີ້, ທ່ານ ໂດໂນ ທຣຳ ຍັງໄດ້ກ່າວເຖິງກຸ່ມ IS ໂດຍລະບຸວ່າ ຖືເປັນສັຕູຂອງທັງອີຣານ ແລະ ສ.ອາເມຣິກາ ດັ່ງນັ້ນ, ສ.ອາເມຣິກາ ແລະ ອີຣານຄວນຮ່ວມມືກັນເພື່ອຕໍ່ສູ້ກັບກອງກຳລັງ IS, ສ.ອາເມຣິກາຕ້ອງການໃຫ້ປະຊາຊົນອີຣານມີອະນາຄົດທີ່ຍິ່ງໃຫຍ່, ອະນາຄົດແຫ່ງຄວາມຈະເລີນຮຸ່ງເຮືອງ ແລະ ເປັນໜຶ່ງດຽວຄືກັບບັນດາປະເທດອື່ນໆໃນໂລກ ເຖິງເວລາແລ້ວທີ່ ສ.ອາເມຣິກາ ຈະຕ້ອງເດີນໜ້າເພື່ອສັນຕິພາບ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube