ອີຣານແຈ້ງຕໍ່ UN ວ່າການຕີຖານທັບ ສ.ອາເມຣິກາ ດຳເນີນໄປຢ່າງໃຫ້ກຽດຕໍ່ອິຣັກ

ລາຍງານ 9 ມັງກອນ 2020, ທ່ານ ມາຈິດ ທັກ ຣາວານຊີ ເອກອັກຄະລັດຖະທູດອີຣານ ປະຈຳສະຫະປະຊາຊາດ (UN) ໄດ້ຍື່ນໜັງສືຕໍ່ທ່ານ ອັນໂຕນິໂອ ກູເຕເຣສ ເລຂາທິການໃຫຍ່ UN ແລະ ສະພາຄວາມໝັ້ນຄົງແຫ່ງສະຫະປະຊາຊາດ ມີເນື້ອໃນສຳຄັນວ່າ ລັດຖະບານອີຣານມີຄວາມເຄົາລົບ ແລະ ໃຫ້ກຽດຕໍ່ເອກະລາດ, ອຳນາດອະທິປະໄຕ ແລະ ຜືນແຜ່ນດິນອັນຄົບຖ້ວນຂອງອິຣັກ ສຳລັບປະຕິບັດການທາງທະຫານທີ່ເກີດຂຶ້ນນັ້ນເປັນການໂຈມຕີເປົ້າໝາຍທາງຍຸດທະສາດໃນວົງຈຳກັດ ເພື່ອປ້ອງກັນຄວາມເສຍຫາຍເປັນວົງກວ້າງ ທີ່ຈະສົ່ງຜົນກະທົບຕໍ່ຊີວິດ ແລະ ຊັບສິນຂອງປະຊາຊົນໃນພື້ນທີ່ ພ້ອມທັງຢືນຢັນວ່າ ອິຣານບໍ່ຕ້ອງການເຂົ້າສູ່ສົງຄາມ.

ພາບດາວທຽມ ສະແດງໃຫ້ເຫັນຄວາມເສຍຫາຍຂອງຖານທັບອັນ-ອັສຊາດ

ການເຄື່ອນໄຫວທາງການທູດຂອງອີຣານ ເກີດຂຶ້ນພາຍຫຼັງກະຊວງການຕ່າງປະເທດອິຣັກເຊີນເອກອັກຄະລັດຖະທູດອີຣານ ປະຈຳນະຄອນຫຼວງແບກແດດເຂົ້າພົບ, ໃນດ້ານຂອງທ່ານ ອາເດວ ອັບດຸນ-ມາດີ ນາຍົກລັດຖະມົນຕີອິຣັກ ກ່າວຮຽກຮ້ອງໃຫ້ ສ.ອາເມຣິກາ ແລະ ອີຣານຖອຍຄົນລະກ້າວ, ປະຕິບັດຕາມກົດໝາຍລະຫວ່າງປະເທດ ແລະ ໃຫ້ກຽດອິຣັກ ຕະຫຼອດຮອດປະຊາຄົມໂລກທີ່ບໍ່ຕ້ອງການໃຫ້ເກີດສົງຄາມ.

ຂະນະດຽວກັນນາຍົກລັດຖະມົນຕີອິຣັກກ່າວວ່າ ຕົນໄດ້ຮັບແຈ້ງດ້ວຍວາຈາຈາກລັດຖະບານອີຣານ ພາຍຫຼັງຜ່ານພົ້ນທ່ຽງຄືນເຂົ້າສູ່ວັນພຸດທີ 8 ມັງກອນ ຜ່ານມາ ວ່າປະຕິບັດການທາງທະຫານເພື່ອຕອບໂຕ້ການທີ່ ສ.ອາເມຣິກາ ລອບສັງຫານທ່ານ ພົນຕີ ກັສເຊັມ ໂຊໄລມານີ ກຳລັງຈະເກີດຂຶ້ນ ຕໍ່ຈາກນັ້ນ ສ.ອາເມຣິກາກໍ່ໂທລະສັບສາຍກົງແຈ້ງມາວ່າ ຖານທັບອັນ-ອັສຊາດ ໃນແຂວງອັນບາ ທາງພາກຕາເວັນຕົກ ແລະ ຖານທັບເອີບິວ ໃນເຂດປົກຄອງຕົນເອງເຄີດິດສະຖານ ຖືກໂຈມຕີດ້ວຍຈະຫຼວດຫຼາຍສິບລູກ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube