ກອງທັບ ສ.ອາເມຣິກາຍັງເຊື່ອວ່າ ຈະຖືກປອງຮ້າຍໃນຕາເວັນອອກກາງອີກຢູ່

ລາຍງານ 9 ມັງກອງ 2020, ທ່ານ ພົນເອກ ມາກ ມິວລີ ປະທານຄະນະເສນາທິການທະຫານຮ່ວມ ສ.ອາເມຣິກາ ຖະແຫຼງເມື່ອວັນພຸດ 8 ມັງກອນ ທີ່ຜ່ານມາ ວ່າຜົນການປະເມີນໃນເບື້ອງຕົ້ນຂອງຝ່າຍທະຫານ ເຊື່ອວ່າຈະຫຼວດທີ່ກອງທັບປະຕິວັດອີຣານລະດົມຍິງໃສ່ຖານທັບ 2 ແຫ່ງໃນອິຣັກ ທີ່ມີທະຫານອາເມຣິກາປະຈຳການຢູ່ຄື: ຖານທັບອັນ ອັສຊາດ ແລະ ຖານທັບເອີບິວ ແມ່ນຫວັງຜົນໃຫ້ມີພົນລະເມືອງ ສ.ອາເມຣິກາ ເສຍຊີວິດ ເນື່ອງຈາກມີການຕິດຫົວຮົບທຸກລູກ.

ເຊິ່ງທ່ານ ພົນເອກ ມາກ ມິວລີ ຍັງກ່າວວ່າ ໄວເກີນໄປທີ່ຈະສະຫຼຸບວ່າປະຕິບັດການຂອງກອງທັບປະຕິວັດອີຣານນັ້ນສົມບູນແບບຫຼືບໍ່ ເມື່ອການໂຈມຕີກໍ່ໃຫ້ເກີດຄວາມເສຍຫາຍຕໍ່ໂຄງສ້າງພື້ນຖານພາຍໃນຖານທັບສອງແຫ່ງໃນລະດັບກາງ ໂດຍມີຄ້າຍພັກເຊົາ ແລະ ເຮລິຄັອບແຕຫຼາຍລຳຖືກທຳລາຍ ແຕ່ບໍ່ມີທະຫານອາເມຣິກາເສຍຊີວິດ, ເຖິງຢ່າງໃດກໍ່ຕາມ ກອງທັບ ສ.ອາເມຣິກາ ໝັ້ນໃນວ່າກອງກຳລັງຕິດອາວຸດຊີອະໃນອິຣັກ ຈະລົງມືກໍ່ເຫດຕໍ່ເຈົ້າໜ້າທີ່ອາເມຣິກາທັງໃນອິຣັກ ແລະ ຊີຣີ.

ຂະນະທີ່ທ່ານ ມາກ ເອັສເປີ ລັດຖະມົນຕີກະຊວງປ້ອງກັນປະເທດ ສ.ອາເມຣິກາກ່າວເສີມວ່າ ຈະຫຼວດພິໄສໃກ້ທັງໝົດທີ່ກອງທັບປະຕິວັດອີຣານຍິງມານັ້ນ ມີທັງໝົດ 16 ລູກ, ຢ່າງໜ້ອຍ 11 ລູກຕົກໃສ່ຖານທັບອັນ-ອັສຊາດ, ຕົກໃສ່ຖານທັບເອີບິວຢ່າງໜ້ອຍ 1 ລູກ, ສ່ວນທີ່ເຫຼືອພາດເປົ້າ, ການໂຈມຕີມາຈາກ 3 ທິດທາງ ແລະ ເປັນການຍິງຂ້າມແດນມາຈາກອີຣານ ເຊິ່ງລະບົບປ້ອງກັນ ແລະ ເຕືອນໄພທີ່ມີປະສິດທິພາບພາຍໃນຖານທັບສາມາດປ້ອງກັນຄວາມເສຍຫາຍເຊິ່ງອາດເກີດຂຶ້ນກັບຊີວິດຂອງພົນລະເມືອງອາເມຣິກາໄດ້.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube