ສ.ອາເມຣິກາ ແລະ ອີຣານຕ່າງກໍ່ອ້າງອີງກົດບັດ UN ມາດຕາ 51 ວ່າສິ່ງທີ່ກະທຳເປັນການປ້ອງກັນຕົນເອງ

ລາຍງານ 9 ມັງກອນ 2020, ທ່ານ ນາງ ແຄວລີ ຄຼາບ ເອກອັກຄະລັດຖະທູດ ສ.ອາເມຣິກາ ປະຈຳສະຫະປະຊາຊາດ (UN) ຍື່ນໜັງສືຕໍ່ທ່ານ ອັນໂຕນິໂອ ກູເຕເຣສ ເລຂາທິການໃຫຍ່ UN ແລະ ສະພາຄວາມໝັ້ນຄົງແຫ່ງ UN ເມື່ອວັນທີ 8 ມັງກອນ ທີ່ຜ່ານມາ ວ່າປະຕິບັດການທາງທະຫານຂອງກອງທັບ ສ.ອາເມຣິກາ ທີ່ນະຄອນຫຼວງແບກແດດ ປະເທດອິຣັກ ເມື່ອວັນທີ 3 ມັງກອນ ທີ່ຜ່ານມາ ທີ່ສັງຫານທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ຮອງຜູ້ບັນຊາການກອງກຳລັງຮັສ ເຊິ່ງເປັນເຄືອຂ່າຍນັກຮົບຊີອະໃນອິຣັກ ທີ່ມີຄວາມໃກ້ຊິດກັບອີຣານ ເປັນການປ້ອງກັນຕົນເອງ ຕາມມາດຕາ 51 ຂອງກົດບັດສະຫະປະຊາຊາດ.

ຂະນະດຽວກັນ, ລັດຖະບານ ສ.ອາເມຣິກາພ້ອມເຈລະຈາຢ່າງຈິງຈັງ ໂດຍບໍ່ມີການກຳນົດເງື່ອນໄຂລ່ວງໜ້າກັບອີຣານ ເພື່ອບັນລຸເປົ້າໝາຍຄື ການຫຼຸດອັນຕະລາຍຕໍ່ສັນຕິພາບ ແລະ ຄວາມໝັ້ນຄົງລະຫວ່າງປະເທດ ທີ່ມີລັດຖະບານອີຣານເປັນຕົ້ນເຫດ ນອກຈາກນີ້, ສ.ອາເມຣິກາ ພ້ອມດຳເນີນການຕາມຄວາມຈຳເປັນເພື່ອປົກປ້ອງຊີວິດຂອງພົນລະເມືອງອາເມຣິກາ ແລະ ຜົນປະໂຫຍດຂອງ ສ.ອາເມຣິກາ ໃນຕາເວັນອອກກາງ.

ເຖິງຢ່າງໃດກໍ່ຕາມ, ລັດຖະບານອີຣານກໍ່ອ້າງອີງມາດຕາ 50 ຂອງກົດບັດສະຫະປະຊາຊາດເຊັ່ນກັນ ໂດຍທ່ານ ໂມຮຳໝັດ ຈາວາດ ຊາຣີບ ລັດຖະມົນຕີກະຊວງການຕ່າງປະເທດອິຣັກ ກ່າວກ່ອນໜ້ານີ້ວ່າ ປະຕິບັດການທາງທະຫານຂອງກອງທັບປະຕິວັດອີຣານ ທີ່ລະດົມຍິງຈະຫຼວດໂຈມຕີຖານທັບ 2 ແຫ່ງຂອງ ສ.ອາເມຣິກາໃນອິຣັກ ເມື່ອວັນທີ 8 ມັງກອນ ທີ່ຜ່ານມາ ອາໄສອຳນາດຕາມມາດຕາ 51 ຂອງກົດບັດສະຫະປະຊາຊາດ ເພື່ອປ້ອງກັນຕົນເອງຈາກການໂຈມຕີຂອງ ສ.ອາເມຣິກາ.

ສຳລັບມາດຕາ 51 ຂອງກົດບັດສະຫະປະຊາຊາດ ສະບັບທີ 6 ມີເນື້ອໃນວ່າດ້ວຍສິດທິອັນຊອບທຳຂອງລັດສະມາຊິກ ໃນການໃຊ້ມາດຕະການທີ່ຈຳເປັນ ເພື່ອປ້ອງກັນຕົນເອງເມື່ອຖືກໂຈມຕີດ້ວຍອາວຸດ ຈົນກວ່າສະພາຄວາມໝັ້ນຄົງ UN ຈະປະກາດມາດຕະການທີ່ເໝາະສົມ ເພື່ອຍຸຕິສະຖານະການ, ນອກຈາກນີ້ ສະມາຊິກ UN ປະເທດໃດກໍ່ຕາມທີ່ອາໄສອຳນາດຕາມມາດຕາດັ່ງກ່າວ ຕ້ອງລາຍງານໃຫ້ສະພາຄວາມໝັ້ນຄົງ UN ຮັບຊາບໂດຍໄວທີ່ສຸດ ແລະ ບໍ່ກີດກັນ ຫຼື ກ້າວກ່າຍຂະບວນການຂອງສະພາຄວາມໝັ້ນຄົງ UN ໃນການດຳເນີນການໃນລຳດັບຕໍ່ໄປ.

HTML tutorial