ອີຣານຈະບໍ່ໃຫ້ກ່ອງດຳຍົນອູແກຣນທີ່ຕົກກັບໂບອິ້ງ ແລະ ສ.ອາເມຣິກາ ແຕ່ຈະໃຫ້ການຮ່ວມກັບອູແກຣນ

ລາຍງານ 9 ມັງກອນ 2020, ຕໍ່ຈາກເຫດການຍົນໂດຍສານຖ້ຽວບິນ PS752 ຂອງສາຍການບິນ Ukraine International Airlines ຫຼື UIA ຂອງອູແກຣນ ທີ່ໃຊ້ຍົນໂບອິ້ງຮຸ້ນ 737-800 ຕົກໃນເວລາບໍ່ພໍເທົ່າໃດນາທີ ພາຍຫຼັງທີ່ອອກເດີນທາງຈາກສະໜາມບິນສາກົນອິໝ່າມ ໂຄໄມນີ ນະຄອນຫຼວງເຕຫະຣານ ປະເທດອີຣານ ເພື່ອເດີນທາງໄປຍັງນະຄອນຫຼວງຄຽບ ປະເທດອູແກຣນ ເມື່ອເຊົ້າມືດຂອງວັນທີ 8 ມັງກອນ ທີ່ຜ່ານມາ ຕາມເວລາທ້ອງຖິ່ນ ເຮັດໃຫ້ມີຜູ້ໂດຍສານ 167 ຄົນ ແລະ ຈຸບິນ 9 ຄົນເສຍຊີວິດທັງໝົດ ໂດຍໃນຖ້ຽວບິນດັ່ງກ່າວລວມມີຄົນອີຣານ 82 ຄົນ, ການາດາ 63 ຄົນ ແລະ ອູແກຣນ 11 ຄົນ, ຊູແອດ 10, ອາຟະການິດສະຖານ 4, ເຢຍລະມັນ 3 ແລະ ອັງກິດ 3.

ທ່ານ ອາລີ ອາເບດຊາເດ ຜູ້ອຳນວຍການອົງການການບິນພົນລະເຮືອນອີຣານຖະແຫຼງເມື່ອວັນທີ 8 ມັງກອນ ທີ່ຜ່ານມາ ວ່າເຈົ້າໜ້າທີ່ກູ້ໄພພົບກອງບັນທຶກຂໍ້ມູນ ຫຼື ກ່ອງດຳຂອງຍົນຖ້ຽວບິນ PS752 ຄົບທັງສອງກ່ອງແລ້ວຄື: ກ່ອງດຳໃນຫ້ອງນັກບິນ ແລະ ກ່ອງບັນທຶກລາຍລະອຽດທັງໝົດຂອງຖ້ຽວບິນ, ເຖິງຢ່າງໃດກໍ່ຕາມ ລັດຖະບານອີຣານຈະບໍ່ມອບກ່ອງດຳ ຫຼື ແບ່ງປັນຂໍ້ມູນຈາກກ່ອງດຳໃຫ້ກັບບໍລິສັດຜູ້ຜະລິດຍົນຄືໂບອິ້ງ ແລະ ລັດຖະບານ ສ.ອາເມຣິກາຢ່າງເດັດຂາດ ແຕ່ຈະຮ່ວມມືກັບທາງການອູແກຣນເທົ່ານັ້ນ, ເຊິ່ງໃນເບື້ອງຕົ້ນເຈົ້າໜ້າທີ່ຂອງອີຣານຢືນຢັນວ່າ ເປັນຄວາມຂັດຂ້ອງທາງເຕັກນິກ ແລະ ນັກບິນບໍ່ໄດ້ສົ່ງສັນຍານຂໍລົງຈອດສຸກເສີນກ່ອນເກີດເຫດ.

ໃນດ້ານຂອງທ່ານ ໂວໂລດິເມຍ ເຊເລນສະກີ ປະທານປະເທດອູແກຣນ ກ່າວວ່າ ບໍ່ວ່າຝ່າຍໃດກໍ່ຕາມ ບໍ່ຄວນນຳໂສກນາດຕະກຳຄັ້ງນີ້ໄປຕີຄວາມເປັນທິດສະຕີສົມຄົບຄິດ, ສ່ວນທ່ານ ຈັສຕິນ ທຼູໂດ ນາຍົກລັດຖະມົນຕີການາດາກ່າວວ່າ ການາດາຄວນມີສ່ວນຮ່ວມໃນການກວດສອບດ້ວຍ, ສ່ວນໃນດ້ານຂອງທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ໄດ້ກ່າວສະແດງຄວາມເສຍໃຈໄປຍັງຄອບຄົວຂອງຜູ້ເສຍຊີວິດທຸກຄົນ ພ້ອມທັງລະບຸວ່າ ລັດຖະບານ ສ.ອາເມຣິກາ ຈະຕິດຕາມການສືບສວນສອບສວນເຫດຍົນຖ້ຽມບິນ P752 ຕົກຢ່າງໃກ້ຊິດ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube