ສະພາລ່າງ ສ.ອາເມຣິກາ ມີມະຕິຄວບຄຸມການໃຊ້ອຳນາດສົງຄາມກັບອີຣານ ຂອງ ປ.ທຣຳ

ລາຍງານ 10 ມັງກອນ 2020, ສະພາປະຊາຊົນ (ສະພາລ່າງ) ຂອງສະຫະລັດ ອາເມຣິກາລົງມະຕິເມື່ອວັນພະຫັດ 9 ມັງກອນ ທີ່ຜ່ານມາ ດ້ວຍສຽງສ່ວນໃຫຍ່ 224 ຕໍ່ 194 ສຽງ ແລະ ງົດອອກສຽງ 13 ສຽງ ໃຫ້ມີການໃຊ້ກົດໝາຍສົງຄາມ ຫຼື ມະຕິອຳນາດສົງຄາມ ສະບັບປີ 1973 ຕໍ່ຄວາມຂັດແຍ່ງລະຫວ່າງ ສ.ອາເມຣິກາ ກັບ ອີຣານ, ໂດຍຕໍ່ຈາກນີ້ທ່ານ ໂດໂນ ທຣຳ ປະທານປະເທດ ສ.ອາເມຣິກາ ຕ້ອງຍື່ນຄຳຮ້ອງຕໍ່ລັດຖະສະພາ ເພື່ອຂໍມະຕີກ່ອນ ຫາກຕ້ອງການໃຊ້ມາດຕະການທາງທະຫານຕໍ່ອີຣານໃນອະນາຄົດ ແຕ່ຍັງບໍ່ລະບຸຂໍ້ຍົກເວັ້ນວ່າ ຜູ້ນຳ ສ.ອາເມຣິກາສາມາດສັ່ງໃຫ້ກອງທັບເຄື່ອນໄຫວໄດ້ທັນທີ ໃນກໍລະນີຈຳເປັນຫາກຖືກຄຸກຄາມທາງທະຫານຈາກອີຣານ.

ເຊິ່ງການລົງມະຕິດັ່ງກ່າວຂອງສະພາລ່າງຂ້ອນຂ້າງເປັນໄປຕາມຈຸດຢືຂອງສອງພັກການເມືອງ ແຕ່ມີສະມາຊິກພັກຣີພັບລິກັນ 3 ຄົນເທົ່ານັ້ນທີ່ອອກສຽງສະໜັບສະໜູນ ແລະ ສະມາຊິກພັກເດໂມແຄຼດ 8 ຄົນອອກສຽງຄັດຄ້ານ, ສຳລັບຂັ້ນຕອນຕໍ່ຈາກນີ້ຄືການອະພິປາຍ ແລະ ລົງມະຕິໂດຍວຸດທິສະພາ (ສະພາສູງ) ເຊິ່ງພັກຣີພັບລິກັນຄອງສຽງສ່ວນໃຫຍ່ ແລະ ນັບຕັ້ງແຕ່ທ່ານ ໂດໂນ ທຣຳ ດຳລົງຕຳແໜ່ງຜູ້ນຳ ສ.ອາເມຣິກາ ມະຕິຂອງສະພາສູງເກືອບບໍ່ມີເທື່ອໃດທີ່ຈະກົງກັນຂ້າມກັບຈຸດຢືນຂອງທ່ານ ໂດໂນ ທຣຳ.

ເຖິງຢ່າງໃດກໍ່ຕາມ, ສະມາຊິກສະພາສູງພັກຣີພັບລິກັນຢ່າງນ້ອຍ 2 ຄົນປະກາດຊັດເຈນວ່າບໍ່ເຫັນດີກັບຈຸດຢືນຂອງຜູ້ນຳ ສ.ອາເມຣິກາເລື່ອງອີຣານ, ເຊິ່ງຫາກມະຕິນີ້ຜ່ານການຮັບຮອງຈາກສະພາສູງ ຈະມີຜົນທັນທີໂດຍບໍ່ຈຳເປັນຕ້ອງລໍຖ້າການລົງນາມຈາກທ່ານ ໂດໂນ ທຣຳ, ແຕ່ກໍ່ຍັງມີການຖົກຖຽງມາຍາວນານໃນ ສ.ອາເມຣິກາ ເລື່ອງມະຕິອຳນາດສົງຄາມ ວ່າຄວນມີຜົນຜູກພັນໃນທາງກົດໝາຍຫຼືບໍ່ ແລະ ຕະຫຼອດໄລຍະທີ່ຜ່ານມາ ເກືອບບໍ່ເຄີຍມີປະທານປະເທດຄົນໃນປະຕິບັດຕາມອຳນາດສົງຄາມຢ່າງສະເໝີຕົ້ນສະເໝີປາຍ.

ການເຄື່ອນໄຫວຂອງສະພາລ່າງ ສ.ອາເມຣິກາ ເກີດຂຶ້ນ 1 ອາທິດພາຍຫຼັງທີ່ທ່ານ ໂດໂນ ທຣຳ ໃຊ້ອຳນາດທາງທະຫານ ໃຫ້ກອງທັບປະຕິບັດການໂຈມຕີທາງອາກາດ ທີ່ນະຄອນຫຼວງແບກແດດ ປະເທດອິຣັກ ເມື່ອວັນທີ 3 ມັງກອນ ທີ່ຜ່ານມາ ລອບສັງຫານທ່ານ ພົນຕີ ກັສເຊັມ ໂຊໄລມານີ ອະດີຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນດິສ ອະດີດຮອງຜູ້ບັນຊາການກອງກຳລັງຮັສ ເຊິ່ງເປັນເຄືອຂ່າຍນັກຮົບຊີອະໃນອິຣັກ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube