ສ.ອາເມຣິກາລົງໂທດທາງເສດຖະກິດຕໍ່ອີຣານ ພ້ອມຂຶ້ນບັນຊີດຳນາຍພົນອີຣານອີກຫຼາຍຄົນ

ລາຍງານ 11 ມັງກອນ 2020, ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ຖະແຫຼງເມື່ອວັນສຸກ 10 ມັງກອນ ທີ່ຜ່ານມາ ເລື່ອງຂຶ້ນບັນຊີດຳເຈົ້າໜ້າທີ່ລະດັບສູງ 8 ຄົນຂອງອີຣານ ໃນນັ້ນລວມມີທ່ານ ພົນຈັດຕະວາ ໂກລຳເຣຊາ ໂຊໄລມານີ ຜູ້ບັນຊາການກອງກຳລັງບາຊິດ ເຊິ່ງເປັນກອງກຳລັງອາສາສະໝັກຮັກສາຄວາມສະຫງົບຮຽບຮ້ອຍໃນປະເທດ ພາຍໃຕ້ສັງກັດກອງທັບປະຕິວັດອີຣານ, ທ່ານ ພົນຈັດຕະວາ ໂມຣຳເໝັດ ເຣຊາ ຮອງປະທານຄະນະເສນາທິການກອງທັບປະຕິວັດອີຣານ ແລະ ທ່ານ ອາລີ ຊຳຄານີ ເລຂາທິການສະພາຄວາມໝັ້ນຄົງສູງສຸດແຫ່ງຊາດອີຣານ.

ຂະນະດຽວກັນ, ລັດຖະບານ ສ.ອາເມຣິກາຍັງໄດ້ຂວໍ້າບາດບໍລິສັດຕ່ຳແຜ່ນ, ເຫຼັກກ້າ ແລະ ຜູ້ປະກອບທຸລະກິດບໍ່ແຮ່ລວມ 17 ແຫ່ງ ສ່ວນໃຫຍ່ຈົດທະບຽນໃນຈີນ ແລະ ເກາະເຊເຊວ ຖານມີສ່ວນຮ່ວມຊື້-ຂາຍ ແລະ ຈັດສົ່ງຜະລິດຕະພັນດັ່ງກ່າວໃຫ້ກັບອີຣານ, ໃນດ້ານຂອງທ່ານ ສະຕີບ ມະນູຊິນ ລັດຖະມົນຕີກະຊວງການເງິນ ສ.ອາເມຣິກາ ເຊິ່ງເປັນຜູ້ຮ່າງມາດຕະການຂວໍ້າບາດ ກ່າວວ່າລັດຖະບານ ສ.ອາເມຣິກາ ພ້ອມຂະຫຍາຍຂອບເຂດມາດຕະການກົດດັນທາງເສດຖະກິດຕໍ່ອີຣານອີກໃນອະນາຄົດຫາກຈຳເປັນ.

ເຊິ່ງມາດຕະການຂວໍ້າບາດຄັ້ງນີ້ ເປັນການຕອບໂຕ້ທີ່ກອງທັບປະຕິວັດອີຣານຍິງຈະຫຼວດໂຈມຕີຖານທັບ ສ.ອາເມຣິກາ 2 ແຫ່ງໃນອິຣັກ ເມື່ອວັນທີ 8 ມັງກອນ ທີ່ຜ່ານມາ ເພື່ອແກ້ແຄ້ນໃຫ້ກັບທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການໜ່ວຍຮົບພິເສດຄຸດ ທີ່ເສຍຊີວິດຈາກປະຕິບັດການໂຈມຕີຂອງກອງທັບ ສ.ອາເມຣິກາ ໃນນະຄອນຫຼວງແບກແດດ ປະເທດອິຣັກ ເມື່ອວັນທີ 3 ມັງກອນ ທີ່ຜ່ານມາ ໂດຍເສຍຊີວິດພ້ອມກັບທ່ານ ອາບູ ມາດີ ອັນ-ມູຮັນດິສ ອະດີດຮອງຜູ້ບັນຊາການຮັສ ເຊິ່ງເປັນກອງກຳລັງຕິດອາວຸດຊີອະໃນອິຣັກ ທີ່ມີຄວາມໃກ້ຊິດກັບອີຣານ.

ທ່ານ ໄມ ພອມແພວ ກ່າວວ່າທ່ານ ພົນຕີ ກັສເຊັມ ໂຊໄລມານີ ຄືໄພຮຸກຮານຮ້າຍແຮງ ເນື່ອງຈາກແຫຼ່ງຂ່າວລະບຸວ່າກຳລັງວາງແຜນກຽມກໍ່ເຫດເພື່ອສ້າງຄວາມເສຍຫາຍໃຫ້ກັບຊັບສິນຂອງ ສ.ອາເມຣິກາ ລວມເຖິງຖານທັບຫຼາຍແຫ່ງໃນຕາເວັນອອກກາງ ແລະ ສະຖານເອກອັກຄະລັດຖະທູດໃນພູມມິພາກຢ່າງໜ້ອຍ 5 ແຫ່ງ ໜຶ່ງໃນນັ້ນຄືສະຖານເອກອັກຄະລັດຖະທູດໃນອິຣັກ ເຊິ່ງທ່ານ ໄມ ພອມແພວປະຕິເສດໃຫ້ລາຍລະອຽດໄປກວ່ານັ້ນ ແຕ່ຢືນຢັນວ່າແຜນການຂອງທ່ານ ພົນຕີ ກັສເຊັມ ໂຊໄລມານີ ກຳລັງຈະເກີດຂຶ້ນ, ເຖິງຢ່າງໃດກໍ່ຕາມ ລັດຖະບານອີຣານ ແລະ ກອງທັບປະຕິວັດອີຣານຍັງບໍ່ສະແດງຈຸດຢືນຢ່າງເປັນທາງການຕໍ່ມາດຕະການຂວ້ຳບາດຄັ້ງນີ້ຂອງ ສ.ອາເມຣິກາ.


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube


ຕິດຕາມພວກເຮົາທາງ Twitter



ຕິດຕາມພວກເຮົາທາງ Youtube