ສ.ອາເມຣິກາ ປະຕິເສດທີ່ຈະປະຕິບັດຕາມການຮຽກຮ້ອງຂອງອິຣັກ ທີ່ຕ້ອງການໃຫ້ຖອນທະຫານທັງໝົດ

ລາຍງານ 11 ມັງກອນ 2020, ກະຊວງການຕ່າງປະເທດ ສ.ອາເມຣິກາ ອອກຖະແຫຼງການເມື່ອວັນສຸກ 10 ມັງກອນ ທີ່ຜ່ານມາ ວ່າການປະຈຳການຂອງທະຫານອາເມຣິກາ ປະມານ 5,200 ຄົນໃນອິຣັກນັ້ນມີຄວາມເໝາະສົມແລ້ວ ຈຶ່ງບໍ່ຈຳເປັນຕ້ອງສະເໜີແຜນການຖອນທະຫານກັບລັດຖະບານອີຣັກ, ເຖິງຢ່າງໃດກໍ່ຕາມ ເປັນເລື່ອງຈຳເປັນທີ່ທັງສອງປະເທດຕ້ອງປຶກສາຫາລືກັນກ່ຽວກັບສາຍພົວພັນສອງຝ່າຍ ທັງໃນເລື່ອງການທູດ, ເສດຖະກິດ-ການເງິນ ແລະ ຄວາມໝັ້ນຄົງ.

ຖະແຫຼງການດັ່ງກ່າວຂອງລັດຖະບານ ສ.ອາເມຣິກາ ເກີດຂຶ້ນວັນດຽວກັບທ່ານ ອາເດວ ອັນດຸນ-ມາດີ ນາຍົກລັດຖະມົນຕີອິຣັກ ກ່າວວ່າຕົນໄດ້ສົ່ງເລື່ອງໄປຍັງໜ່ວຍງານທີ່ກ່ຽວຂ້ອງຂອງ ສ.ອາເມຣິກາ ໃຫ້ເລັ່ງສະເໜີແຜນປະຕິບັດການເພື່ອກຽມຖອນທະຫານ ແລະ ອາວຸດຍຸດໂທປະກອນອອກຈາກອິຣັກ ຕາມມະຕິຂອງສະພາປະຊາຊົນອິຣັກ ເມື່ອວັນທີ 5 ມັງກອນທີ່ຜ່ານມາ, ຂະນະທີ່ທ່ານ ແກຣນ ຢາຕອນເລາະ ອາລີ ອັນ-ຊິສທານີ ຜູ້ນຳສູງສຸດທາງສາສະໜາມອິດສະລາມນິກາຍຊີອະໃນອິຣັກ ກ່າວວ່າປະຊາຊົນອິຣັກຄືຜູ້ເຈັບປວດຫຼາຍທີ່ສຸດ ຈາກຄວາມຂັດແຍ່ງລະຫວ່າງ ສ.ອາເມຣິກາ ກັບ ອີຣານ ທີ່ເກີດຂຶຶ້ນຊ້ຳແລ້ວຊ້ຳອີກໃນຜືນແຜ່ນດິນຂອງອິຣັກ ຕໍ່ຈາກນີ້ໄປ ອິຣັກຕ້ອງການປົກຄອງຕົນເອງ ແລະ ຕັດສິນໃຈດ້ວຍຕົນເອງ ໂດຍປາສະຈາກການແຊກແຊງຈາກພາຍນອກ.

ເຊິ່ງກອງທັບ ສ.ອາເມຣິກາເຄີຍປະຈຳການທະຫານໃນອິຣັກສູງສຸດເຖິງ 170,000 ຄົນ ເມື່ອປີ 2007 ແຕ່ລັດຖະບານ ສ.ອາເມຣິກາໃນເວລານັ້ນທີ່ຢູ່ພາຍໃຕ້ການບໍລິຫານຂອງທ່ານປະທານປະເທດ ຈອສ ດັບເບິນຢູ ບຸສ ເຈລະຈາກັບລັດຖະບານອີຣານເມື່ອປີ 2008 ເພື່ອຂໍຕໍເວລາການປະຈຳການກອງທັບ ສ.ອາເມຣິກາໃນອິຣັກ ແລະ ໄດ້ຮັບອະນຸຍາດຈົນເຖິງປີ 2011 ກົງກັບສະໄໝການນຳຂອງທ່ານປະທານປະເທດ ບາຣັກ ໂອບາມາ ເຊິ່ງຖອນທະຫານອາເມຣິກາກັບອອກໄປ ແລະ ລັດຖະບານອິຣັກຍັງປະຕິເສດຄຳຮ້ອງຂອງ ສ.ອາເມຣິກາ ທີ່ຕ້ອງການສິດທິນອກອານາເຂດ ໃຫ້ກັບທະຫານອາເມຣິກາ ຈາກການຖືກດຳເນີນຄະດີໃນອິຣັກ.

ເຖິງຢ່າງໃດກໍ່ຕາມ, ສ.ອາເມຣິກາໄດ້ສົ່ງທະຫານກັບເຂົ້າໄປອິຣັກອີກເມື່ອປີ 2014 ໂດຍໃຫ້ເຫດຜົນວ່າ ເພື່ອປະຕິບັດພາລະກິດປາບປາມກຸ່ມ IS ແລະ ຕັ້ງຫຼັກຢູ່ຈົນເຖິງປັດຈຸບັນນີ້ ແລະ ມີແຜນເພີ່ມທະຫານອີກ 3,000 ຄົນ ເຊິ່ງຕອນນີ້ຕັ້ງຫຼັກຢູ່ທີ່ກູເວດ ເພື່ອປົກປ້ອງໝາກຜົນຂອງ ສ.ອາເມຣິກາໃນອິຣັກ ແລະ ຕາເວັນອອກກາງ.

HTML tutorial