ອູແກຣນຈະຮຽກຄ່າເສຍຫາຍຈາກອີຣານ ທີ່ເຮັດໃຫ້ຍົນໂດຍສານສາຍການບິນ UIA ຕົກ

ລາຍງານ 11 ມັງກອນ 2020, ທ່ານ ໂວໂລດິເມຍ ເຊເລນສະກີ ປະທານປະເທດອູແກຣນກ່າວວ່າ ລັດຖະບານອູແກຣນຫວັງເປັນຢ່າງຍິ່ງ ວ່າອີຣານຈະນຳຕົວຜູ້ກະທຳຜິດຍິງຂີປະນາວຸດໃສ່ຍົນໂດຍສານຂອງສາຍການບິນ Ukriane International Airline ຫຼື UIA ຕົກເມື່ອວັນທີ 8 ມັງກອນ ທີ່ຜ່ານມາ ຂຶ້ນສານຕາມກົດໝາຍ, ຂະນະດຽວກັນຜູ້ນຳອູແກຣນກ່າວອີກວ່າ ໜ່ວຍງານທີ່ກ່ຽວຂ້ອງຂອງອູແກຣນຈະດຳເນີນການຮຽກຄ່າເສຍຫາຍ ແຕ່ຍັງບໍ່ທັນເປີດເຜີຍວ່າເປັນຈຳນວນເທົ່າໃດ ແລະ ລັດຖະບານອີຣານຕ້ອງຂໍໂທດຢ່າງເປັນທາງການ, ນອກຈາກນີ້ ຍັງຮຽກຮ້ອງໃຫ້ຄະນະປະຕິບັດງານຂອງອູແກຣນທີ່ສົ່ງໄປແລ້ວ 45 ຄົນ ໃຫ້ສາມາດເຂົ້າເຖິງພື້ນທີ່ເກີດເຫດ ແລະ ຫຼັກຖານທຸກອັນຢ່າງອິດສະຫຼະ ແລະ ບໍ່ໃຫ້ມີຄວາມຊັກຊ້າ.

ພາບ: ທ່ານ ໂວໂລດິເມຍ ເຊເລນສະກີ ປະທານປະເທດອູແກຣນ ພົບປະສະມາຊິກຄອບຄົວຜູ້ຖືກເຄາະຮ້າຍ

ເຊິ່ງສຳນັກຂ່າວແຫ່ງຊາດຂອງອີຣານເຜີຍແຜ່ຖະແຫຼງການໃນມື້ນີ້ວ່າ: ຍ້ອນຄວາມຜິດພາດຂອງມະນຸດ ເຮັດໃຫ້ຖ້ຽວບິນ PS752 ຂອງ UIA ທີ່ໃຊ້ຍົນໂບອິ້ງ 737-800 ແລະ ບິນຜ່ານພື້ນທີ່ລະອຽດອ່ອນທາງທະຫານ ຕົກໃຫ້ກັບສະໜາມບິນສາກົນອິໝ່າມ ໂຄໄມນີ ໃນນະຄອນຫຼວງເຕຫະຣານ ເຮັດໃຫ້ມີຜູ້ໂດຍສານ ແລະ ຈຸບິນ 176 ຄົນເສຍຊີວິດທັງໝົດ ນັ້ນປະກອບມີຈຸບິນ 9 ຄົນ, ໂດຍຢືນຢັນວ່າຜູ້ກ່ຽວຂ້ອງກັບເຫດການດັ່ງກ່າວທຸກຄົນຈະຕ້ອງຮັບໂທດຕາມກົດໝາຍ.

ຂະນະທີ່ທ່ານ ຮັສຊັນ ໂຣຮານີ ປະທານປະເທດອີຣານກ່າວຂໍໂທດ ແລະ ສະແດງຄວາມເສຍໃຈຢ່າງສູງສຸດໄປຍັງຄອບຄົວຂອງຜູ້ເສຍຊີວິດ ຕໍ່ຄວາມຜິດພາດອັນເປັນຫາຍະນະ, ແຕ່ທ່ານ ໂມຮຳໝັດ ຈາວາດ ຊາຣີບ ລັດຖະມົນຕີກະຊວງການຕ່າງປະເທດອີຣານກ່າວວ່າ ໂສກນາດຕະກຳຂອງຖ້ຽວບິນ PS752 ນັ້ນເກີດຂຶ້ນທ່າມກາງຊ່ວງໄລຍະເວລາອັນວິກິດຈາກຄວາມສ່ຽງທີ່ ສ.ອາເມຣິກາ ເປັນຜູ້ສ້າງ.

ສຳລັບສັນຊາດຂອງຜູ້ເສຍຊີວິດໃນຖ້ຽວບິນ PS752 ນັ້ນເປັນຄົນອີຣານຫຼາຍທີ່ສຸດ 82 ຄົນ, ຮອງລົງມາຄົນການາດາ 57 ຄົນ ຫຼຸດລົງຈາກລາຍງານກ່ອນໜ້ານີ້ຄື 63​ ຄົນ, ເນື່ອງຈາກຄວາມສັບສົນໃນການກວດສອບເອກະສານຂອງຜູ້ເສຍຊີວິດ ແລະ ມີຄົນອູແກຣນ 11 ຄົນ, ສ່ວນທີ່ເຫຼືອປະກອບດ້ວຍຄົນຊູແອດ, ອາຟະການິດສະຖານ, ເຢຍລະມັນ ແລະ ອັງກິດ.

ພາບ: ທ່ານ ໂວໂລດິເມຍ ເຊເລນສະກີ ປະທານປະເທດອູແກຣນ ວາງດອກໄມ້ ເພື່ອໄວ້ອາໄລແກ່ຜູ້ເສຍຊີວິດ

HTML tutorial