ປ.ທຣຳກ່າວວ່າ ກອງທັບ ສ.ອາເມຣິກາພ້ອມອອກໜີ ຫາກອິຣັກພ້ອມຈ່າຍເງິນ

ລາຍງານ 13 ມັງກອນ 2020, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວໃນລາຍງານຂ່າວຂອງສະຖານີໂທລະພາບ FOX ອອກອາກາດເມື່ອວັນທີ 11 ມັງກອນ ທີ່ຜ່ານມາ ກ່ຽວກັບສະພາປະຊາຊົນອິຣັກມີມະຕິໃຫ້ ສ.ອາເມຣິກາ ແລະ ພັນທະມິດຕາເວັນຕົກຍຸດຕິກິດຈະກຳທາງທະຫານທຸກຮູບແບບ ແລະ ຖອນທັບກັບອອກໄປ ວ່າກອງທັບ ສ.ອາເມຣິກາ ພ້ອມປະຕິບັດຕາມ ແຕ່ກ່ອນຈະໄປລັດຖະບານອິຣັກຕ້ອງຈ່າຍເງິນຈຳນວນເທົ່າກັບທີ່ລັດຖະບານ ສ.ອາເມຣິກາລົງທຶນໄປໃນອິຣັກກ່ອນ.

ເມື່ອຜູ້ດຳເນີນລາຍງານຊັກຖາມຜູ້ນຳ ສ.ອາເມຣິກາ ວ່າຈະຮຽກເງິນຈາກອິຣັກດ້ວຍວິທີໃດ, ທ່ານ ໂດໂນ ທຣຳ ຕອບວ່າຕອນນີ້ອິຣັກມີເງິນຝາກຢູ່ໃນບັນຊີທະນາຄານຂອງອາເມຣິກາປະມານ 35,000 ລ້ານໂດລາສະຫະລັດ, ເຊິ່ງລັດຖະບານອິຣັກສາມາດມອບເງິນຈຳນວນດັ່ງກ່າວໃຫ້ກັບ ສ.ອາເມຣິກາໄດ້ ຫາກບໍ່ດັ່ງນັ້ນທະຫານອາເມຣິກາ 5,200 ຄົນຈະຍັງຢູ່ໃນອິຣັກຕໍ່ໄປ, ທ່ານ ໂດໂນ ທຣຳ ກ່າວອີກວ່າ ສ.ອາເມຣິກາ ໄດ້ສ້າງໜຶ່ງໃນຖານທັບຂະໜາດໃຫຍ່ ແລະ ດີທີ່ສຸດໃນໂລກຫຼາຍແຫ່ງໄວ້ໃນອິຣັກ ທັງທີ່ ສ.ອາເມຣິກາຄວນມີຖານທັບແບບດຽວກັນໃນປະເທດ ບໍ່ວ່າຈະເປັນນະຄອນນິວຢອກ ຫຼື ນະຄອນຫຼວງວໍຊິງຕັນ ແລະ ລັດຖະບານ ສ.ອາເມຣິກາຍັງໃຫ້ການຊ່ວຍເຫຼືອສະໜັບສະໜູນອິຣັກພັດທະນາປະເທດຢ່າງຕໍ່ເນື່ອງມາຍາວນານຫຼາຍປີ.

ຂະນະດຽວກັນ, ທ່ານ ໂດໂນ ທຣຳ ກ່າວວ່າປະຊາຊົນອີຣັກສ່ວນໃຫຍ່ບໍ່ຕ້ອງການຢູ່ພາຍໃຕ້ການຄວບງຳຈາກອີຣານ, ຕະຫຼອດໄລຍະເວລາກວ່າ 15 ປີຜ່ານມາ ອີຣານມີອິດທິພົນເໜືອອິຣັກຫຼາຍຂຶ້ນຢ່າງຊັດເຈນ ຕົນຈຶ່ງເຊື່ອວ່າປະຊາຊົນອິຣັກບໍ່ພໍໃຈ ແລະ ບັນຫານີ້ບໍ່ມີທາງຍຸຕິດ້ວຍດີ, ນອກຈາກນີ້ຜູ້ນຳ ສ.ອາເມຣິກາ ຍັງໄດ້ຍົກຕົວຢ່າງຂອງອາຣັບບີ ຊາອູດິດ ແລະ ເກົາຫຼີໃຕ້ ທີ່ຕ້ອງໄດ້ຈ່າຍເງິນສະໜັບສະໜູນທາງການທະຫານໃຫ້ແກ່ ສ.ອາເມຣິກາ ຢ່າງຕໍ່ເນື່ອງຕາມຂໍ້ຕົກລົງ.

ໃນດ້ານຂອງທ່ານ ອາເດວ ອັບດຸນ-ມາດີ ນາຍົກລັດຖະມົນຕີອິຣັກ ໄດ້ລົງຢ້ຽມຢາມເມືອງເອີບິວ ເຊິ່ງເປັນເມືອງເອກຂອງເຂດປົກຄອງຕົນເອງເຄີດິດສະຖານ ຕັ້ງຢູ່ພາກເໜືອຂອງປະເທດ ແລະ ເປັນສະຖານທີ່ຕັ້ງຂອງຖານທັບ ສ.ອາເມຣິກາ 1 ໃນ 2 ແຫ່ງທີ່ຖືກຈະຫຼວດຂອງກອງທັບປະຕິວັດອີຣານ ໂຈມຕີເມື່ອວັນທີ 8 ມັງກອນ ທີ່ຜ່ານມາ, ໂດຍທ່ານນາຍົກລັດຖະມົນຕີອິຣັກໄດ້ພົບປະຫາລືກັບເຈົ້າໜ້າທີ່ລະດັບສູງຂອງລັດຖະບານເຄີດິດສະຖານ ກ່ຽວກັບສະຖານະການຄວາມໝັ້ນຄົງທີ່ເຄັ່ງຕຶງ ນັບຕັ້ງແຕ່ ສ.ອາເມຣິກາ ໄດ້ລອບສັງຫານທ່ານ ພົນຕີ ກັສເຊັມ ໂຊໄລມານີ ອະດີດຜູ້ບັນຊາການກອງກຳລັງນັກຮົບພິເສດຄຸດ ຂອງກອງທັບປະຕິວັດອີຣານ ແລະ ທ່ານ ອາບູ ມາດີ ອັນ-ມູຮັນສິດ ອະດີດຮອງຜູ້ບັນຊາການຮັສ ກອງກຳລັງຕິດອາວຸດຊີອະໃນອິຣັກ ທີ່ອີຣານໃຫ້ການສະໜັບສະໜູນ ໃນນະຄອນຫຼວງແບກແດດ ເມື່ອວັນທີ 3 ມັງກອນ ທີ່ຜ່ານມາ.

ເຊິ່ງທ່ານນາຍົກລັດຖະມົນຕີອິຣັກຢືນຢັນວ່າ ອິຣັກຕ້ອງການຮັກສາສາຍພົວພັນແບບເພື່ອນມິດກັບ ສ.ອາເມຣິກາ ແຕ່ໃນຂະນະດຽວກັນ ກໍ່ເຖິງເວລາແລ້ວທີ່ອິຣັກຕ້ອງຢືນດ້ວຍຕົນເອງ, ເຖິງຢ່າງໃດກໍ່ຕາມ ສະມາຊິກສະພາປະຊາຊົນອິຣັກ ທີ່ເປັນຊາວເຄິດ ແລະ ຊາວສຸໜີ່ແມ່ນບໍ່ໄດ້ເຂົ້າຮ່ວມປະຊຸມ ແລະ ລົງມະຕິຂັບໄລ່ທະຫານອາເມຣິກາ ແລະ ພັນທະມິດຕາເວັນຕົກອອກຈາກອິຣັກ ແຕ່ກຸ່ມການເມືອງຊາວຊີອະມີສຽງສ່ວນໃຫຍ່ທີ່ພຽງພໍຜ່ານມະຕິ.

HTML tutorial