ຈີນ-ສ.ອາເມຣິກາ ບັນລຸຂໍ້ຕົກລົງຂັ້ນທຳອິດ ໃນການແກ້ໄຂຂໍ້ຂັດແຍ່ງທາງການຄ້າລະຫວ່າງກັນ

ລາຍງານ 16 ມັງກອນ 2020, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ແລະ ທ່ານ ຫຼິວ ເຮີ ຮອງນາຍົກລັດຖະມົນຕີ ແລະ ທີ່ປຶກສາດ້ານນະໂຍບາຍເສດຖະກິດຂອງທ່ານ ສີ ຈິ້ນຜິງ ປະທານປະເທດຈີນ ໄດ້ລົງນາມຮ່ວມກັນໃນຂໍ້ຕົກລົງການຄ້າໄລຍະອຳທິດ ທີ່ທຳນຽບຂາວ ເມື່ອວັນທີ 15 ມັງກອນ ທີ່ຜ່ານມາ ໂດຍທ່ານ ໂດໂນ ທຣຳ ກ່າວວ່າຂໍ້ຕົກລົງດັ່ງກ່າວ ເຖິງຈະເປັນພຽງຂັ້ນເລີ່ມຕົ້ນ ແຕ່ກໍ່ເປັນຖົນທາງອັນຖືກຕ້ອງທີ່ຈະນຳໄປສູ່ການແກ້ໄຂຄວາມຜິດພາດ ແລະ ສຳລັບປະຊາຊົນອາເມຣິກາທຸກທົ່ວໜ້າ ຂໍ້ຕົກລົງນີ້ຈະຊ່ວຍຮຽກຄືນຄວາມຍຸຕິທຳທາງການຄ້າ.

ຂະນະທີ່ທ່ານ ຫຼິວ ເຮີ ກ່າວວ່າການຮ່ວມມືຍ່ອມນຳໄປສູ່ເສັ້ນທາງອັນຖືກຕ້ອງ ແລະ ອ່ານຈົດໝາຍຂອງທ່ານ ສີ ຈິ້ນຜິງ ທີ່ມີເນື້ອໃນສຳຄັນວ່າ ລັດຖະບານຈີນມີຄວາມຍິນດີຕໍ່ການຮ່ວມລົງນາມໃນຂໍ້ຕົກລົງການຄ້າໄລຍະທຳອິດນີ້ ເຊິ່ງຖືເປັນນິມິດໝາຍອັນດີວ່າ ສ.ອາເມຣິກາ ແລະ ຈີນຈະເດີນໜ້າເຈລະຈາ ເພື່ອແກ້ໄຂຄວາມຂັດແຍ່ງທາງການຄ້າຕໍ່ໄປ, ເຊິ່ງຄວາມຂັດແຍ່ງທາງການຄ້າລະຫວ່າງ ສ.ອາເມຣິກາ ແລະ ຈີນ ທີ່ເປັນປະເທດມີຂະໜາດເສດຖະກິດໃຫຍ່ເປັນອັນດັບ 1 ແລະ 2 ຂອງໂລກຕາມລຳດັບ ໄດ້ເລີ່ມຕົ້ນຂຶ້ນເມື່ອເດືອນມີນາ 2018 ເລີ່ມຈາກການທີ່ທ່ານ ໂດໂນ ທຣຳ ສັ່ງຂຶ້ນພາສີຈັກຊັກເຄື່ອງ ແລະ ແຜງເຊວພະລັງງານແສງຕາເວັນຈາກຈີນ ຫຼັງຈາກນັ້ນຕໍ່ດ້ວຍການທີ່ທັງສອງປະເທດຂຶ້ນພາສີຕອບໂຕ້ກັນຢ່າງຕໍ່ເນື່ອງ.

ສຳລັບເນື້ອໃນສຳຄັນຂອງຂໍ້ຕົກລົງການຄ້າຂັ້ນທຳອິດຄື ຈີນຈະເພີ່ມມູນຄ່າການນຳເຂົ້າສິນຄ້າຈາກ ສ.ອາເມຣິກາ ທັງຜິດຕະພັນກະສິກຳ ແລະ ສິນຄ້າເຕັກໂນໂລຊີເພີ່ມອີກ 200,000 ລ້ານໂດລາສະຫະລັດ ໂດຍຈີນນຳເຂົ້າສິນຄ້າຂອງ ສ.ອາເມຣິກາ ເປັນມູນຄ່າ 186,000 ລ້ານໂດລາສະຫະລັດ ເມື່ອປີ 2017 ເຊິ່ງເປັນປີທຳອິດທີ່ທ່ານ ໂດໂນ ທຣຳ ດຳລົງຕຳແໜ່ງປະທານປະເທດ, ເຊິ່ງຈາກມູນຄ່າການເພີ່ມການນຳເຂົ້າສິນຄ້າ ແບ່ງເປັນການຊື້ສິນຄ້າກະສິກຳ 32,000 ລ້ານໂດລາສະຫະລັດ, ສິນຄ້າອຸດສາຫະກຳ 78,000 ລ້ານໂດລາສະຫະລັດ, ສິນຄ້າພະລັງງານ 52,000 ລ້ານໂດລາສະຫະລັດ ແລະ ພາກບໍລິການ 38,000​ ລ້ານໂດລາສະຫະລັດ.

ໃນດ້ານເງື່ອນໄຂທາງການຄ້າທີ່ ສ.ອາເມຣິກາ ຫຼຸດຜ່ອນໃຫ້ຈີນ ລວມມີການຫຼຸດກຳແພງພາສີຈາກ 15% ລົງມາເປັນ 7.5% ຕໍ່ມູນຄ່າການນຳເຂົ້າສິນຄ້າຈາກຈີນ 120,000 ລ້ານໂດລາສະຫະລັດ ເຊິ່ງອັດຕາເດີມເປັນໄປຕາມມາດຕະການທີ່ລັດຖະບານ ສ.ອາເມຣິກາບັງຄັບໃຊ້ເມື່ອວັນທີ 1 ກັນຍາ ປີທີ່ຜ່ານມາ ໂດຍຂໍ້ຕົກລົງການຄ້າໄລຍະທຳອິດນີ້ຈະມີຜົນບັງຄັບໃຊ້ພາຍໃນ 30 ວັນນັບຈາກມື້ລົງລາຍເຊັນເປັນຕົ້ນໄປ.