ປ.ທຣຳ ບີບບັງຄັບໃຫ້ເອີຣົບຢູ່ຂ້າງຕົນ ເພື່ອກົດດັນອີຣານຕໍ່ບັນຫາໂຄງການນິວເຄຼຍ

ລາຍງານ 16 ມັງກອນ 2020, ໂດຍອີງຕາມການລາຍງານຂອງ The Washington Post ເມື່ອວັນທີ 15 ມັງກອນ ທີ່ຜ່ານມາລະບຸວ່າ: ທ່ານ ໂດໂນ ທຣຳ ປະທານປະເທດ ສ.ອາເມຣິກາ ຂູ່ຕັ້ງກຳແພງພາສີ 25% ຕໍ່ລົດນຳເຂົ້າຈາກເຢຍລະມັນ, ຝຣັ່ງ ແລະ ອັງກິດ ຫາກທັງສາມປະເທດບໍ່ສະແດງຈຸດຢືນຢ່າງເປັນທາງການ ວ່າອີຣານເປັນຝ່າຍລະເມີດຂໍ້ຕົກລົງນິວເຄຼຍ ສະບັບປີ 2015 ຈາກການທີ່ລັດຖະບານອີຣານປະກາດເມື່ອຕົ້ນເດືອນນີ້ ເຊິ່ງເປັນຊ່ວງທີ່ຄວາມຂັດແຍ່ງກັບ ສ.ອາເມຣິກາເຖິງຂີດສຸດ ຍຸດຕິປະຕິບັດຕາມເງື່ອນໄຂທັງໝົດຂອງຂໍ້ຕົກລົງນິວເຄຼຍ ທີ່ລວມເຖິງການຈຳກັດຈຳນວນເຄື່ອງຈັກເສີມສະມັດຕະພາບຢູເຣນຽມ.

ເຊິ່ງທຳນຽບຂາວຍັງບໍ່ສະແດງຈຸດຢືນຕໍ່ລາຍງານຂອງ The Washington Post ນອກຈາກນີ້, ຍັງບໍ່ຊັດເຈນວ່າການກົດດັນຂອງຜູ້ນຳ ສ.ອາເມຣິກາ ມີຜົນຕໍ່ເຢຍລະມັນ, ຝຣັ່ງ ແລະ ອັງກິດຫຼາຍໜ້ອຍພຽງໃດ ເນື່ອງຈາກທ່ານ ໂດໂນ ທຣຳ ເຄີຍຂູ່ຂຶ້ນພາສີລົດເອີຣົບເປັນເງື່ອນໄຂໃນການເຈລະຈາຫຼາຍຄັ້ງ ແລະ ຍັງບໍ່ຊັດເຈນວ່າທ່ານ ໂດໂນ ທຣຳ ກ່າວກັບທັງສາມປະເທດເມື່ອໃດ.

ເຖິງຢ່າງໃດກໍ່ຕາມ, ເຢຍລະມັນ, ຝຣັ່ງ ແລະ ອັງກິດ ອອກຖະແຫຼງການຮ່ວມກັນເມື່ອຕົ້ນອາທິດນີ້ ໂດຍອ້າງອີງມາດຕາ 36 ຂອງຂໍ້ຕົກລົງແຜນປະຕິບັດການຮ່ວມແບບສົມບູນ (JCPOA) ເຊິ່ງເປັນຊື່ຢ່າງເປັນທາກງານຂອງຂໍ້ຕົກລົງນິວເຄຼຍອີຣານ ຈັດຕັ້ງຄະນະປະຕິບັດງານສະເພາະກິດແກ້ໄຂສະຖານະການທີ່ລັດຖະບານອີຣານກັບມາເດີນໜ້າໂຄງການນິວເຄຼຍ ພາຍໃນ 15 ວັນ.

ຫາກບໍ່ປະສົບຄວາມສຳເລັດ ຫຼື ຜົນຍັງບໍ່ເປັນທີ່ໜ້າເພິ່ງພໍໃຈໃນບັນຫາໃດ ໃຫ້ຄະນະປະຕິບັດງານສະເໜີຕໍ່ສະພາຄວາມໝັ້ນຄົງແຫ່ງສະຫະປະຊາຊາດເພື່ອພິຈາລະນາ ເຊິ່ງອາດມີມະຕິໃຫ້ຟື້ນຟູມາດຕະການຂວໍ້າບາດອີຣານສ່ວນທີ່ເຄີຍຍົກເລີກໄປເມື່ອຂໍ້ຕົກລົງມີຜົນບັງຄັບໃຊ້.

ໃນດ້ານຂອງທ່ານ ຮັສຊັນ ໂຣຮານີ ປະທານປະເທດອີຣານ ກ່າວວ່າລັດຖະບານອີຣານພ້ອມກັບມາປະຕິບັດຕາມຂໍ້ຕົກລົງ ຫາກມີກາຍົກເລີກມາດຕະການຂວໍ້າບາດ, ຂະນະດຽວກັນກໍ່ໄດ້ວິຈານການເຄື່ອນໄຫວດັ່ງກ່າວຂອງເອີຣົບ ວ່າເປັນຝ່າຍທີ່ຜິດພາດຢ່າງຮ້າຍແຮງ ທີ່ບໍ່ຊ່ວຍເຫຼືອລັດຖະບານອີຣານຈາກມາດຕະການຂວ້ຳບາດຂອງ ສ.ອາເມຣິກາ ແລະ ກ່າວວ່າ ສ.ອາເມຣິກາເປັນຕົ້ນເຫດທີ່ແທ້ຈິງຂອງສະຖຽນລະພາບທີ່ສັ່ນຄອນໃນຕາເວັນອອກກາງ ໂດຍໄດ້ກະທຳຜິດຮ້າຍແຮງຫຼາຍຄັ້ງ ນອກເໜືອຈາກການລອບເອົາຊີວິດຂອງທ່ານ ພົນຕີ ກັສເຊັມ ໂຊໄລມານີ ຍັງລວມໄປເຖິງການຮຸກຮານທາງທະຫານໃນອິຣັກ, ລີບີ ແລະ ເຢເມນ.

ນອກຈາກນີ້ຍັງກ່າວວ່າ ການກຳນົດກົນໄກດັ່ງກ່າວຂອງເຢຍລະມັນ, ຝຣັ່ງ ແລະ ອັງກິດ ທີ່ມີ ສ.ອາເມຣິກາເປັນຜູ້ຊັກຈູງຖືວ່າເຊື່ອຖືບໍ່ໄດ້ ເພາະລັດຖະບານ ສ.ອາເມຣິກາຜິດສັນຍາມາໂດຍຕະຫຼອດ ໂດຍ ສ.ອາເມຣິກາເປັນຝ່າຍຖອນຕົວຈາກຂໍ້ຕົກລົງນິວເຄຼຍກ່ອນເມື່ອເດືອນພຶດສະພາ 2018 ແລະ ກໍ່ໄດ້ຫັນກັບມາຂວ້ຳບາດອີຣານຝ່າຍດຽວອີກຄັ້ງ