ສະພາດູມາລັດເຊຍ ມີມະຕິຮັບຮອງເອົາທ່ານ ມິຄາອິວ ມິຊຸສຕິນ ເປັນນາຍົກລັດຖະມົນຕີຄົນໃໝ່

ລາຍງານ 17 ມັງກອນ 2020, ສະພາດູມາ ຫຼື ສະພາລ່າງຂອງລັດເຊຍໄດ້ລົງມະຕິດ້ວຍຄະແນນສຽງ 383 ສຽງຮັບຮອງໂດຍບໍ່ມີສຽງຄັດຄ້ານ ແຕ່ງົດອອກສຽງ 41 ສຽງ ຈາກທັງໝົດ 424 ສຽງໃນກອງປະຊຸມ ເມື່ອວັນທີ 16 ມັງກອນ ທີ່ຜ່ານມາ ເພື່ອຮັບຮອງການສະເໜີຊື່ທ່ານ ມິຄາອິວ ມິຊຸສຕິນ ອາຍຸ 53 ປີ ຫົວໜ້າສຳນັກງານພາສີແຫ່ງຊາດລັດເຊຍ ຂຶ້ນດຳລົງຕຳແໜ່ງນາຍົກລັດຖະມົນຕີຄົນໃໝ່ຂອງລັດເຊຍ ເຊິ່ງຖືກສະເໜີຊື່ໂດຍທ່ານ ວະລາດິເມຍ ປູຕິນ ປະທານປະເທດລັດເຊຍ ແລະ ຍັງໄດ້ຮັບສຽງສະໜັບສະໜູນຢ່າງເຕັມທີ່ຈາກພັກຢູໄນເຕັດລັດເຊຍ ທີ່ຄອງສຽງສ່ວນໃຫຍ່ໃນສະພາດູມາ.

ການແຕ່ງຕັ້ງທ່ານ ມິຄາອິວ ມິຊຸສຕິນ ຖືເປັນສ່ວນໜຶຶ່ງຂອງການປັບປຸງລະບົບການເມືອງ ແລະ ປະຕິຮູບລັດຖະທຳມະນູນຂອງລັດເຊຍຄັ້ງໃຫຍ່ ພາຍຫຼັງທີ່ຄະນະລັດຖະມົນຕີລັດເຊຍລາອອກທັງຄະນະ ເຊິ່ບນຳໂດຍທ່ານ ເດີມີຕຣີ ເມດເວດເດບ ຕາມປະກາດຂອງທ່ານ ປູຕິນ ເມື່ອວັນທີ 15 ມັງກອນ ທີ່ຜ່ານມາ.

ທ່ານ ມິຄາອິວ ມິຊຸສຕິນ ກ່າວກ່ອນການລົງມະຕິວ່າ ຢາກຂໍໃຫ້ລັດຖະສະພາປະຕິບັດງານຮ່ວມກັບຕົນ ເພື່ອຮີບເລັ່ງຕາມແຜນການປະຕິບັດຂອງທ່ານ ປູຕິນ ທີ່ຈະໝົດວາລະການດຳລົງຕຳແໜ່ງປະທານປະເທດສະໄໝປັດຈຸບັນໃນປີ 2024 ແຕ່ຜູ້ສັງເກດການບອກວ່າ ທ່ານ ປູຕິນ ຜູ້ນຳລັດເຊຍອາດກຳລັງວາງແນວທາງເພື່ອເຂົ້າຮັບຕຳແໜ່ງໃໝ່ ຫຼື ບໍ່ກໍ່ຈະຍັງຢູ່ໃນອຳນາດທີ່ຊົງອິດທິພົນແຕ່ຂໍຢູ່ຫຼັງສາກຕໍ່ໄປ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube