ເກົາຫຼີໃຕ້ຕ້ອງຕິ ສ.ອາເມຣິກາ ທີ່ແຊກແຊງນະໂຍບາຍຟື້ນຟູສາຍພົວພັນກັບເກົາຫຼີເໜືອ

ລາຍງານ 19 ມັງກອນ 2020, ທຳນຽບປະທານປະເທດເກົາຫຼີໃຕ້ ອອກຖະແຫຼງການເມື່ອວັນສຸກ 17 ມັງກອນ ທີ່ຜ່ານມາ ມີເນື້ອໃນກະທັດຮັດລະບຸວ່າ ການດຳເນີນນະໂຍບາຍ ແລະ ການຕັດສິນໃຈໃນກໍລະນີໃດກໍ່ຕາມ ທີ່ກ່ຽວຂ້ອງກັບການຮ່ວມມືກັບເກົາຫຼີເໜືອ ຂຶ້ນຢູ່ກັບວິຈາລະນະຍານຂອງລັດຖະບານເກົາຫຼີໃຕ້ເປັນສຳຄັນ ແລະ ເປັນການເສຍມາລະຍາດຢ່າງຍິ່ງຕໍ່ການວິຈານທີ່ບໍ່ຢູ່ບົນພື້ນຖານຂອງຫຼັກການນະໂຍບາຍຂອງທ່ານ ມູນ ແຈ-ອິນ ປະທານປະເທດເກົາຫຼີໃຕ້.

ເຖິງແມ່ນວ່າຖະແຫຼງການຂອງທຳນຽບປະທານປະເທດເກົາຫຼີໃຕ້ ບໍ່ໄດ້ພາດພິງຜູ້ໃດໂດຍກົງ ແຕ່ການເຜີຍແຜ່ສານດັ່ງກ່າວແມ່ນອອກມາພຽງວັນດຽວ ພາຍຫຼັງທີ່ທ່ານ ແຮຣີ ແຮຣິສ ເອກອັກຄະລັດຖະທູດ ສ.ອາເມຣິກາ ປະຈຳເກົາຫຼີໃຕ້ ກ່າວກັບສື່ເກົາຫຼີໃຕ້ຫຼາຍແຫ່ງເມື່ອວັນທີ 16 ມັງກອນ ທີ່ຜ່ານມາວ່າ ເຖິງຈະເປັນໂຄງການລະຫວ່າງສອງເກົາຫຼີ ແຕ່ລັດຖະບານເກົາຫຼີໃຕ້ຄວນເພີ່ມການຮ່ວມມືກັບລັດຖະບານ ສ.ອາເມຣິກາຕໍ່ບັນຫາດັ່ງກ່າວ ໂດຍທ່ານ ແຮຣີ ແຮຣິສ ສະເໜີການຕັ້ງຄະນະປະຕິບັດງານຮ່ວມກັນ ເພື່ອປ້ອງກັນການສື່ສານທີ່ຜິດພາດ.

ຂະນະດຽວກັນ, ເອກອັກຄະລັດຖະທູດ ສ.ອາເມຣິກາຍັງກ່າວວ່າ ຈິ່ງຢູ່ທີ່ ສ.ອາເມຣິກາບໍ່ມີອຳນາດອະນຸມັດ ຫຼື ປະຕິເສດນະໂຍບາຍດັ່ງກ່າວຂອງເກົາຫຼີໃຕ້ ແຕ່ ສ.ອາເມຣິກາຄືພັນທະມິດໜຶ່ງດຽວຂອງເກົາຫຼີໃຕ້ໃນບັນຫາກ່ຽວກັບເກົາຫຼີເໜືອ, ທະຫານອາເມຣິກາ 28,500 ຄົນປະຈຳການຢູ່ໃນເກົາຫຼີໃຕ້ ໃນຂະນະທີ່ຄົນອາເມຣິກາເສຍພາສີມະຫາສານເພື່ອປົກປ້ອງປະເທດແຫ່ງນີ້ ດ້ວຍເຫດນີ້ ລັດຖະບານ ສ.ອາເມຣິກາຈຶ່ງຄວນມີຄວາມສົນໃຈຕໍ່ທຸກໂຄງການຂອງເກົາຫຼີໃຕ້ ທີ່ກ່ຽວຂ້ອງກັບການຮ່ວມມືລະຫວ່າງສອງເກົາຫຼີ ແລະ ຍັງກ່າວອີກວ່າ ໜ້າທີ່ຂອງຕົນໃນຖານະເອກອັກຄະລັດຖະທູດ ສ.ອາເມຣິກາຄືການຮັກສາຜົນປະໂຫຍດຂອງ ສ.ອາເມຣິກາ.

ເຖິງແມ່ນວ່າການຂວ້ຳບາດຂອງສະພາຄວາມໝັ້ນຄົງແຫ່ງສະຫະປະຊາຊາດ ທີ່ບັງຄັບໃຊ້ກັບເກົາຫຼີເໜືອຍັງຄົງຍົກເວັ້ນອຸດສາຫະກຳການທ່ອງທ່ຽວ ແຕ່ລັດຖະບານ ສ.ອາເມຣິກາກໍ່ຍັງຕ້ອງການໃຊ້ມາດຕະການຂວ້ຳບາດເພື່ອເພີ່ມຂໍ້ຈຳກັດໃຫ້ກັບອຸດສາຫະກຳທີ່ກ່ຽວຂ້ອງ ເຊິ່ງຜູ້ນຳເກົາຫຼີໃຕ້ບໍ່ເຫັນດີນຳ ເນື່ອງຈາກມີແຜນທີ່ຈະຟື້ນຟູສາຍພົວພັນກັບເກົາຫຼີເໜືອຜ່ານການທ່ອງທ່ຽວ.

ນອກຈາກນີ້, ຈິງຢູ່ທີ່ ສ.ອາເມຣິກາ ແລະ ເກົາຫຼີໃຕ້ມີຄວາມເປັນພັນທະມິດດ້ານຄວາມໝັ້ນຄົງມາຫຼາຍທົດສະວັດ ແຕ່ທັງສອງປະເທດຍັງຕົກລົງກັນບໍ່ໄດ້ ຕໍ່ກໍລະນີທີ່ທ່ານ ໂດໂນ ທຣຳ ປະທານປະເທດ ສ.ອາເມຣິກາ ຕ້ອງການໃຫ້ເກົາຫຼີໃຕ້ເພີ່ມຄ່າໃຊ້ຈ່າຍທາງທະຫານ ຈາກປັດຈຸບັນປີລະ 1,000 ລ້ານໂດລາສະຫະລັດ ເປັນ 5,000 ລ້ານໂດລາສະຫະລັດຕໍ່ປີ ແລ້ວບັນຈຸໄວ້ໃນຂໍ້ຕົກລົງມາດຕະການພິເສດ (SMA) ເຊິ່ງເປັນຊື່ຢ່າງທາງການຂອງກອບການຮ່ວມມືດ້ານຄ່າໃຊ້ຈ່າຍທາງທະຫານສອງຝ່າຍສະບັບໃໝ່.