ຈີນ-ມຽນມາລົງນາມເອກະສານ 33 ສະບັບ, ສ້າງທ່າເຮືອນ້ຳເລິກ ແລະ ທາງລົດໄຟຄວາມໄວສູງ

ລາຍງານ 19 ມັງກອນ 2020, ທ່ານ ສີ ຈິ້ນຜິງ ປະທານປະເທດຈີນ ແລະ ທ່ານ ນາງ ອອງ ຊານ ຊູຈີ ທີ່ປຶກສາແຫ່ງລັດ ແລະ ລັດຖະມົນຕີກະຊວງການຕ່າງປະເທດມຽນມາ ຮ່ວມເປັນສັກຂີພະຍານໃນພິທີລົງນາມບັນທຶກຄວາມເຂົ້າໃຈ (MOU) 33 ສະບັບ ທີ່ທຳນຽບລັດຖະບານໃນນະຄອນຫຼວງເນປີດໍ ເມື່ອວັນເສົາ 18 ມັງກອນ ທີ່ຜ່ານມາ ໂດຍເນື້ອໃນສຳຄັນຂອງ MOU ທຸກສະບັບກ່ຽວຂ້ອງກັບແຜນຍຸດທະສາດໜຶ່ງແລວ ໜຶ່ງເສັ້ນທາງ ທີ່ມາຈາກແນວຄິດລິເລີ່ມຂອງທ່ານ ສີ ຈິ້ນຜິງ ທີ່ຕ້ອງການວາງເສັ້ນທາງເຊື່ອມໂຍງການຄ້າອອກຈາກຈີນສູ່ອີກຫຼາຍພູມມິພາກໃຫ້ເປັນເສັ້ນທາງສາຍໄໝແຫ່ງສະຕະວັດທີ 21.

ສຳລັບກອບການຮ່ວມມືສຳຄັນທີ່ລົງນາມກັນເປັນໄປຕາມທີ່ມີການເປີດເຜີຍກ່ອນໜ້ານີ້ຄື  ໂຄງການທ່າເຮືອນຳເລິກເຈົ້າຜິວ ໃນລັດຍະໄຂ່ ມູນຄ່າ 1,300 ລ້ານໂດລາສະຫະລັດ ເຊິ່ງເປັນສ່ວນໜຶ່ງຂອງແຜນຍຸດທະສາດລະບຽງເສດຖະກິດຈີນ-ມຽນມາ, ໂຄງການພັດທະນາເມືອງຢ່າງກຸ້ງ ໃຫ້ເປັນເມືອງເສດຖະກິດໃໝ່ ແລະ ໂຄງການເສັ້ນທາງລົດໄຟຄວາມໄວສູງຈາກມົນທົນຢູນານຂອງຈີນ ແລ້ວຜ່ານມຽນມາທັງປະເທດ ເຊິ່ງເປັນການວາງເສັ້ນທາງການຄ້າຈາກພູມມິພາກຕາເວັນຕົກສຽງໃຕ້ຂອງຈີນສູ່ມະຫາສະໝຸດອິນເດຍ.

ເຖິງຢ່າງໃດກໍ່ຕາມ, ມີລາຍງານວ່າຜູ້ນຳຈີນບໍ່ໄດ້ປຶກສາຫາລືກັບທ່ານ ນາງ ອອງ ຊານ ຊູຈີກ່ຽວກັບໂຄງການກໍ່ສ້າງເຂື່ອນມິດໂສນ ຢູ່ຕົ້ນນ້ຳອິຣະວະດີ ທີ່ລັດຖະບານຈີນເປັນຜູ້ລົງທຶຶນລາຍໃຫຍ່ ດ້ວຍງົບປະມານ 3,600 ລ້ານໂດລາສະຫະລັດ ແຕ່ມຽນມາສັ່ງໂຈະການກໍ່ສ້າງເມື່ອປີ 2010 ເນື່ອງຈາກເປັນຫ່ວງຕໍ່ບັນຫາດ້ານສິ່ງແວດລ້ອມ ບວກກັບການປະທ້ວງຢ່າງໜັກຂອງປະຊາຊົນ, ເຊິ່ງທ່ານ ນາງ ອອງ ຊານ ຊູຈີ ກ່າວເຖິງຈີນວ່າ ເປັນປະເທດທີ່ມີບົດບາດຢ່າງຍິ່ງທັງໃນດ້ານສາຍພົວພັນລະຫວ່າງປະເທດ ແລະ ເສດຖະກິດໂລກ ພ້ອມທັງຮຽກຮ້ອງໃຫ້ການລົງທຶນຈາກຈີນຕ້ອງສ້າງຜົນປະໂຫຍດໃຫ້ປະຊາຊົນໃນທ້ອງຖິ່ນ ແລະ ຫຼີກລ້ຽງການທຳລາຍສິ່ງແວດລ້ອມໃນພື້ນທີ່.

ເຊິ່ງສາຍພົວພັນລະຫວ່າງຈີນ ກັບ ມຽນມາມີທັງຂຶ້ນ ແລະ ລົງໃນຍຸກລັດຖະບານທະຫານ ແຕ່ປ່ຽນແປງໄປໃນທາງທີ່ດີຂຶ້ນຢ່າງຕໍ່ເນື່ອງ ນັບຕັ້ງແຕ່ມຽນມາປະເຊີນກັບແຮງກົດດັນຢ່າງໜັກຈາກໂລກຕາເວັນຕົກຕໍ່ສະຖານະການຄວາມໝັ້ນຄົງໃນລັດຍະໄຂ່ ທີ່ກ່ຽວຂ້ອງກັບຊາວໂຣຮິງຢາ ໂດຍຈີນໃຊ້ອິດທິພົນທາງການທູດ ຈາກການເປັນໜຶ່ງໃນສະມາຊິກຖາວອນຂອງສະພາຄວາມໝັ້ນຄົງແຫ່ງສະຫະປະຊາຊາດ ຊ່ວຍເຫຼືອມຽນມາໃນບັນຫາດັ່ງກ່າວຫຼາຍຄັ້ງ, ຂະນະທີ່ທ່ານ ສີ ຈິ້ນຜິງກ່າວກັບທ່ານ ອູ ວິນ ມິນ ປະທານປະເທດມຽນມາ ວ່າພ້ອມຍົກລະດັບສາຍພົວພັນກັບມຽນມາໃນທຸກດ້ານ ເພື່ອນຳພາໄປສູ່ຍຸກໃໝ່.

HTML tutorial