ຈີນປະກາດພາວະສຸກເສີນຂັ້ນສູງສຸດ ເພື່ອຕ້ານການແຜ່ລະບາດຂອງເຊື້ອຈຸລະໂລກໂຄໂຣນາສາຍພັນໃໝ່

ລາຍງານ 26 ມັງກອນ 2020, ສຳນັກຂ່າວຊິນຫົວຂອງທາງການຈີນລາຍງານຄວາມຄືບໜ້າກໍລະນີການລະບາດຂອງ ພະຍາດປອດອັກເສບ ຈາກເຊື້ອຈຸລະໂລກໂຄໂຣນາສາຍພັນໃໝ່ (Novel Corona Virus – nCov) ຫຼື ໄວຣັສອູຫັ້ນ ວ່າຂະນະນີ້ທາງການຈີນໄດ້ປະກາດພາວະສຸກເສີນສູງສຸດທົ່ວປະເທດ ຍົກເວັນຕິເບດ ເພື່ອຢຸດຢັ້ງການແຜ່ລະບາດຂອງເຊື້ອຈຸລະໂລກ ໂດຍພົບວ່າ ໃນ 30 ມົນທົນຂອງຈີນມີລາຍງານພົບຜູ້ປ່ວຍໂລກປອດອັກເສບຈາກເຊື້ອຈຸລະໂລກໂຄໂຣນາສາຍພັນໃໝ່ແລ້ວ.

ເຊິ່ງເຂດປົກຄອງຕົນເອງຕິເບດ ທີ່ຕັ້ງຢູ່ທາງພາກຕາເວັນຕົກສຽງໃຕ້ຂອງຂີນ ຖືເປັນພູມມິພາກພຽງແຫ່ງດຽວທີ່ຍັງບໍ່ມີລາຍງານຜູ້ຕິດເຊື້ອພະຍາດດັ່ງກ່າວໃນປັດຈຸບັນ.

ຕົວເລກຜູ້ຕິດເຊື້ອຈາກການລາຍງານຂອງຄະນະກຳມາທິການສາທາລະນະສຸກແຫ່ງ ສປ.ຈີນ ໃນທົ່ວປະເທດມີ 1,975 ຄົນ (ນັບເຖິງວັນທີ 25 ມັງກອນ 2020) ໃນນັ້ນມີຜູ້ປ່ວຍຂັ້ນວິກິດ 324 ຄົນ, ມີຜູ້ເສຍຊີວິດແລ້ວ 56 ຄົນ, ສ່ວນຜູ້ປ່ວຍທີ່ໄດ້ຮັບການປິ່ນປົວຈົນຟື້ນຕົວດີມີ 49 ຄົນ ແລະ ຜູ້ປ່ວຍຕ້ອງສົງໄສວ່າຕິດເຊື້ອມີ 2,684 ຄົນ.

ຂະນະດຽວກັນມີການຕິດຕາມອາກາດ ຜູ້ທີ່ມີປະຫວັດການສຳຜັດໃກ້ຊິດກັບຜູ້ປ່ວຍ ຈຳນວນ 23,431 ຄົນ, ໂດຍມີ 21,556 ຄົນຕ້ອງຢູ່ພາຍໃຕ້ການສັງເກດການຈາກແພດໝໍ, ຂະນະທີ່ 325 ຄົນໄດ້ຮັບການປ່ອຍຕົວແລ້ວ.

ນອກຈາກນັ້ນ ມີການຢືນຢັນຈຳນວນຜູ້ຕິດເຊື້ອຈຸລະໂລກໂຄໂຣນາສາຍພັນໃໝ່ 10 ຄົນ ໃນເຂດບໍລິຫານພິເສດຮົງກົງ ແລະ ມາເກົ້າ ລວມເຖິງເກາະໄຕ້ຫວັນຂອງຈີນ ໂດຍແບ່ງເປັນຮົງກົງ 5 ຄົນ, ມາເກົ້າ 2 ຄົນ ແລະ ໄຕ້ຫວັນ 3 ຄົນ.

ສ່ວນຈຳນວນຜູ້ຕິດພະຍາດປອດອັກເສບຈາກເຊື້ອຈຸລະໂລກໂຄໂຣນາສາຍພັນໃໝ່ໃນຕ່າງປະເທດປະກອບມີ: ໄທ 5 ຄົນ, ຍີ່ປຸ່ນ 3 ຄົນ, ເກົາຫຼີໃຕ້ 2 ຄົນ, ສ.ອາເມຣິກາ 2 ຄົນ, ຫວຽດນາມ 2 ຄົນ, ສິງກະໂປ 4 ຄົນ, ມາເລເຊຍ 4 ຄົນ, ເນປານ 1 ຄົນ, ຝຣັ່ງ 3 ຄົນ, ອົດສະຕຣາລີ 1 ຄົນ ແລະ ການາດາ 1 ຄົນ.

ໃນດ້ານຂອງທ່ານ ສີ ຈິ້ນຜິງ ປະທານປະເທດຈີນ ໃນຖານະເລຂາທິການພັກຄອມມູນິດຈີນ ໄດ້ຮຽກປະຊຸມສຸກເສີນຄະນະກຳມະການກົມການເມືອງສູນກາງພັກ ເມື່ອວັນເສົາ 25 ມັງກອນ ທີ່ຜ່ານມາ ເພື່ອປຶກສາຫາລືກ່ຽວກັບສະຖານະການການແຜ່ລະບາດຂອງເຊື້ອຈຸລະໂລກໂຄໂຣນາສາຍພັນໃໝ່ໃນປະເທດ.

ເຊິ່ງທ່ານ ສີ ຈິ້ນຜິງ ກ່າວໃນຕອນໜຶ່ງວ່າ ການທີ່ເຊື້ອໂລກແຜ່ລະບາດຢ່າງໄວວາ ຖືເປັນສະຖານະການທີ່ໜ້າເປັນຫ່ວງຢ່າງຍິ່ງ ຈຶ່ງຮຽກຮ້ອງເຈົ້າໜ້າທີ່ທຸກລະດັບໃຫ້ຄວາມສຳຄັນກັບຄວາມປອດໄພດ້ານສຸຂະພາບຂອງປະຊາຊົນເປັນສຳຄັນ ໂດຍການປ້ອງກັນ ແລະ ຄວບຄຸມການແຜ່ລະບາດຂອງເຊື້ອໂລກ ຖືເປັນພາລະກິດອັນຮີບດ່ວນ ແລະ ສຳຄັນທີ່ສຸດໃນເວລານີ້, ເຖິງຢ່າງໃດກໍ່ຕາມ ຜູ້ນຳຈີນສະແດງຄວາມເຊື່ອໝັ້ນວ່າ ລັດຖະບານຈະສາມາດເອົາຊະນະເຊື້ອໂລກອັນຕະລາຍຊະນິດນີ້ໄດ້.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube