ຍີ່ປຸ່ນເລັ່ງເຈລະຈາກັບຈີນ ຂໍອົບພະຍົບປະຊາຊົນຈາກອູຫັ້ນ, ຂະນະທີ່ ສ.ອາເມຣິກາ ສົ່ງຍົນໄປອົບພະຍົບແລ້ວ

ລາຍງານ 26 ມັງກອນ 2020, ທ່ານ ຊິນໂຊ ອາເບະ ນາຍົກລັດຖະມົນຕີຍີ່ປຸ່ນຖະແຫຼງວ່າ ໜ່ວຍງານລັດທຸກໜ່ວຍງານທີ່ກ່ຽວຂ້ອງກັບສະຖານະການການແຜ່ລະບາດຂອງເຊື້ອຈຸລະໂລກໂຄໂຣນາສາຍພັນໃໝ່ໃນຈີນ ປະຊຸມກັນຕະຫຼອດອາທິດທີ່ຜ່ານມາ ເພື່ອປະເມີນຄວາມເປັນໄປໄດ້ໃນການອົບພະຍົບພົນລະເມືອງຍີ່ປຸ່ນອອກຈາກເມືອງອູຫັ້ນ ມົນທົນຫູເປີຍຂອງຈີນ ທີ່ເປັນສູນກາງການແຜ່ລະບາດຂອງເຊື້ອຈຸລະໂລກໂຄໂຣນາສາຍພັນໃໝ່ ແລະ ໄດ້ຕິດຕໍ່ສື່ສານກັບຄົນຍີ່ປຸ່ນທຸກຄົນໃນເມືອງອູຫັ້ນ ວ່າມີຄວາມຕ້ອງການເດີນທາງກັບປະເທດຫຼາຍໜ້ອຍພຽງໃດ.

ເຖິງຢ່າງໃດກໍ່ຕາມ, ການທີ່ເມືອງອູຫັ້ນ ແລະ ເມືອງໃຫຍ່ອີກຫຼາຍແຫ່ງໃນຈີນ ຢູ່ພາຍໃຕ້ມາດຕະການຄວບຄຸມໂລກລະບາດຢ່າງເຂັ້ມງວດ, ດ້ວຍຂະບວນການທີ່ລວມເຖິງການໂຈະໃຫ້ບໍລິການຂົນສົ່ງສາທາລະນະທັງທາງບົກ, ທາງເຮືອ ແລະ ທາງອາກາດ ຈຶ່ງຍັງເປັນເລື່ອງຍາກທີ່ຈະລຳລຽງພົນລະເມືອງອອກມາ, ແຕ່ລັດຖະບານຍີ່ປຸ່ນໄດ້ກຽມພ້ອມຍົນເຊົ່າເໝົາລຳ ແລະ ມາດຕະການສຸກເສີນທີ່ຈຳເປັນສຳລັບການພົບພະຍົບໄວ້ແລ້ວ ໂດຍພ້ອມອອກເດີນທາງທັນທີ່ທີ່ໄດ້ຮັບອະນຸຍາດຈາກລັດຖະບານຈີນ.

ການຖະແຫຼງດັ່ງກ່າວຂອງທ່ານນາຍົກລັດຖະມົນຕີຍີ່ປຸ່ນ ເກີດຂຶ້ນໃນວັນດຽວກັບທີ່ກະຊວງສາທາລະນະສຸກຂອງຍີ່ປຸ່ນ ໄດ້ຢືນຢັນຜູ້ຕິດເຊື້ອຈຸລະໂລກໂຄໂຣນາສາຍພັນໃໝ່ຄົນທີ 4 ໃນປະເທດ ເປັນນັກທ່ອງທ່ຽວຊາຍຄົນຈີນ ອາຍຸປະມານ 40 ປີ ແລະ ມີພູມລຳເນົາຢູ່ເມືອງອູຫັ້ນ ໂດຍຜູ້ປ່ວຍເດີນທາງເຂົ້າປະເທດເມື່ອວັນທີ 22 ມັງກອນ ທີ່ຜ່ານມາ ແຕ່ບໍ່ສະແດງອາກາດເມື່ອຜ່ານຈຸດຄັດກອງ, ແຕ່ຫຼັງຈາກນັ້ນພຽງວັນດຽວເລີ່ມເປັນໄຂ່ ແລະ ຜູ້ປ່ວຍໄດ້ເດີນທາງໄປຍັງໂຮງໝໍໃກ້ທີ່ສຸດເມື່ອວັນທີ 24 ມັງກອນ ແລະ ກ່າວກັບໝໍວ່າມີອາກາດປວດຕາມຂໍ້ ເຊິ່ງຜົນກວດຫາເຊື້ອຢືນຢັນວ່າເປັນອາກາດຈາກເຊື້ອຈຸລະໂລກໂຄໂຣນາສາຍພັນໃໝ່ແທ້.

ໃນດ້ານຂອງສະຫະລັດ ອາເມຣິກາ ກໍ່ໄດ້ສົ່ງຍົນເຊົ່າເໝົາລຳ ເພື່ອອົບພະຍົບພົນລະເມືອງອາເມຣິກາ ແລະ ເຈົ້າໜ້າທີ່ການທູດ ລວມເຖິງສະມາຊິກໃນຄອບຄົວ ຈາກສະຖານກົງສຸນ ສ.ອາເມຣິກາ ໃນເມືອງອູຫັ້ນແລ້ວ ພາຍຫຼັງການເຈລະຈາເປັນເວລາຫຼາຍວັນ ແລະ ໄດ້ຮັບອະນຸມັດຈາກກະຊວງການຕ່າງປະເທດ ແລະ ໜ່ວຍງານທີ່ກ່ຽວຂ້ອງຂອງທາງການຈີນ.