ທາງການຢືນຢັນວ່າ ຜົ້ງສາລີຍັງບໍ່ມີຜູ້ຕິດເຊື້ອຈຸລະໂລກໂຄໂຣນາສາຍພັນໃໝ່ ຕາມຂ່າວໃນສື່ອອນລາຍ

ລາຍງານ 8 ກຸມພາ 2020, ອີງຕາມການລາຍງານຂອງວິທະຍຸກະຈາຍສຽງແຫ່ງຊາດໃຫ້ຮູ້ວ່າ: ຈາກກໍລະນີທີ່ມີການອອກຂ່າວທາງສື່ສັງຄົມອອນລາຍວ່າຢູ່ແຂວງຜົ້ງສາລີ ວ່າມີຜູ້ຕ້ອງສົງໄສຕິດເຊື້ອພະຍາດອັກເສບປອດຈາກເຊື້ອຈຸລະໂລກໂຄໂຣນາສາຍພັນໃໝ່ຈໍານວນ 27 ຄົນ ແລະ ມີຜູ້ເສຍຊີວິດ 3 ຄົນແລ້ວນັ້ນແມ່ນ “ບໍ່ມີມູນຄວາມຈີງ” ຮຽກຮ້ອງໃຫ້ສັງຄົມຢ່າຫຼົງເຊື່ອ ແລະ ບໍລິໂພກຂໍ້ມູນຂ່າວສານຢ່າງມີສະຕິ ເພາະທຸກໆຂໍ້ມູນການລາຍງານຜູ້ຕິດເຊື້ອຂອງທາງການລາວ ແມ່ນສາມາດກວດສອບໄດ້ໂດຍຜ່ານອົງການອະນາໄມໂລກ ປະຈຳ ສປປ.ລາວ ເຊີ່ງບໍ່ມີການປົກປິດຂໍ້ມູນຄວາມຈິງແຕ່ຢ່າງໃດ.

ດຣ. ສີສະຫວາດ ສຸດທາລີລະໄຊ ຮອງຫົວຫນ້າກົມຄວບຄຸມພະຍາດຕີດຕໍ່ກະຊວງສາທາລະນະສຸກ ໃຫ້ສໍາພາດຕໍ່ສື່ມວນຊົນໃນວັນທີ 8 ກຸມພານີ້ວ່າ:ພາຍຫຼັງໄດ້ຮັບແຈ້ງວ່າມີສື່ອອນລາຍອອກຂ່າວວ່າຢູ່ແຂວງຜົ້ງສາລີ ພົບຜູ້ຕີດເຊື້ອຈຸລະໂລກໂຄໂຣນາສາຍພັນໃຫມ່ 27 ຄົນ ໃນນີ້ເສຍຊີວິດແລ້ວ 3 ຄົນກະຊວງສາທາລະນະສຸກໄດ້ຈັດກອງປະຊຸມຢ່າງຮີບດ່ວນຮ່ວມກັບໜ່ວຍງານແພດໝໍແຂວງຜົ້ງສາລີຜ່ານໂທລະສັບ ເພື່ອສອບສວນກ່ຽວກັບເລື່ອງນີ້ ພ້ອມທັງແຕ່ງຕັ້ງໜ່ວຍງານແພດລົງກວດສຸຂະພາບກໍລະນີສົງໄສຢ່າງລະອຽດ ແລະ ໄດ້ຮັບການລາຍງານວ່າບໍ່ມີຜູ້ຕິດເຊື້ອ ຫຼື ເສຍຊີວິດຍ້ອນເປັນເຊື້ອຈຸລະໂລກໂຄໂຣນາສາຍພັນໃໝ່ ຕາມທີ່ສື່ສັງຄົມອອນລອຍອອກຂ່າວໄປກ່ອນໜ້ານີ້ແຕ່ຢ່າງໃດ ປັດຈຸບັນຫນ່ວຍງານສະເພາະກິດໃນການສະກັດກັ້ນພະຍາດນີ້ ຍັງຕິດຕາມເຝົ້າລະວັງໃນບໍລິເວນທີ່ເກີດການສົງໄສຢ່າງຕໍ່ເນື່ອງ ຮຽກຮ້ອງໃຫ້ສັງຄົມເຊື່ອໝັ້ນຕໍ່ການຈັດຕັ້ງປະຕິບັດວຽກງານຂອງທາງການລາວ.

ດຣ. ສີສະຫວາດ ສຸດທາລີລະໄຊ ໃຫ້ຮູ້ຕື່ມວ່າ: ປັດຈຸບັນຢູ່ລາວຍັງບໍ່ພົບຄົນທີ່ເປັນພະຍາດອັກເສບປອດ ຈາກເຊື້ອຈຸລະໂລກໂຄໂຣນາສາຍພັນໃໝ່ເທື່ອ ມີພຽງກໍລະນີສົງໄສເທົ່ານັ້ນ ເຊີ່ງບຸກຄົນດັ່ງກ່າວແມ່ນໄດ້ຜ່ານການກວດສຸຂະພາບເປັນຢ່າງດີ ແລະ ໄດ້ຮັບການຢັ້ງຢືນຈາກອົງການອະນາໂລກວ່າບໍ່ເປັນພະຍາດອັກເສບປອດຈາກເຊື້ອຈຸລະໂລກໂຄໂຣນາສາຍພັນໃໝ່.

ດັ່ງນັ້ນ, ເພື່ອປ້ອງກັນບໍ່ໃຫ້ຕິດເຊື້ອພະຍາດນີ້ທຸກຄົນໃນສັງຄົມຄວນຫຼີກລ່ຽງການເດີນທາງໄປເຂດທີ່ມີການລະບາດ ຫຼື ຊຸມຊົນແອອັດ,ຖ້າຈຳເປັນຈະໄປຕ້ອງໄດ້ໄປຫຼີກລ່ຽງການສຳຜັດໃກຊິດກັບຄົນທີ່ມີອາການຄ້າຍຄືໄຂ້ຫວັດເຊັ່ນ: ໄຂ້, ໄອ, ເຈັບຄໍ ແລະ ຫາຍໃຈຍາກ, ປະຕິບັດມາລະຍາດໃນການໄອຈາມດ້ວຍການອັດປາກ ແລະ ດັງ,ໃຊ້ຜ້າອັດປາກ, ລ້າງມືຂອງທ່ານທຸກຄັ້ງດ້ວຍສະບູ ຫຼື ນ້ຳຢາຂ້າຊື້ອ.

ຫາກທ່ານມີອາການຄ້າຍຄືໄຂ້ຫວັດເຊັ່ນ: ໄຂ້, ໄອ, ເຈັບຄໍ ຫຼື ຫາຍໃຈຍາກ ບວກກັບໄດ້ເດີນທາງໄປໃນເຂດມີປະຫວັດຂອງການເດີນທາງມາຈາກຈີນພາຍໃນ 14 ວັນກ່ອນເລີ່ມຕົ້ນເຈັບ ຫຼື ສຳຜັດໃກ້ຊິດກັບກໍລະນີຢັ້ງຢືນວ່າຕິດເຊື້ອພະຍາດອັກເສບປອດສາຍພັນໃໝ່ ໃນຂະນະທີ່ກໍລະນີດັ່ງກ່າວກຳລັງມີອາການຄວນໄປພົບແພດໝໍໃກ້ບ້ານທ່ານ ແລະ ແຈ້ງປະຫວັດການເດີນທາງຂອງທ່ານຖ້າໄດ້ໄປເຂດທີ່ມີການລະບາດພະຍາດດັ່ງກ່າວໃນໄລຍະ 14 ວັນກ່ອນມີອາການ.

ຫຼີກລ່ຽງການສຳຜັດສັດເປັນ ຫຼື ຕາຍ ແລະ ເວລາກ່ອນທີ່ຈະສວມໃສ່ຜ້າອັດປາກ-ດັງແມ່ນໃຫ້ລ້າງມືໃຫ້ສະອາດດ້ວຍເຫຼົ້າ, ສະບູ ແລະ ນ້ຳສະອາດ ເວລາໃສ່ຕ້ອງອັດປົກປິດເອົາປາກ ແລະ ດັງ, ຮັບປະກັນວ່າບໍ່ໃຫ້ມີຊ່ອງຫວ່າງ ລະຫວ່າງໃບໜ້າ ແລະ ຜ້າອັດປາກ, ຖ້າພົບເຫັນກໍລະນີສົງໄສວ່າເປັນພະຍາດອັກເສບປອດສາຍພັນໃໝ່ ໃຫ້ໂທແຈ້ງສາຍດ່ວນໝາຍເລກ 166 ຕະຫຼອດ24 ຊົ່ວໂມງ.

HTML tutorial