ສ.ອາເມຣິກາ ມອບອຸປະກອນປ້ອງກັນແກ່ ສປປ.ລາວ ເພື່ອຮັບມືກັບເຊື້ອຈຸລະໂລກໂຄໂຣນາສາຍພັນໃໝ່

ລາຍງານ 11 ກຸມພາ 2020, ອົງການພັດທະນາສາກົນແຫ່ງສະຫະລັດ ອາເມຣິກາ (USAID) ອອກຖະແຫຼງການວ່າ: ກ່ຽວກັບການໃຫ້ການຊ່ວຍເຫຼືອດ້ານມະນຸດສະທຳແກ່ ສປປ.ລາວ ເພື່ອຍົກລະດັບການປ້ອງກັນເຊື້ອຈຸລະໂລກໂຄໂຣນາສາຍພັນໃໝ່ ໂດຍໄດ້ມອບແວ່ນຕາປ້ອງກັນພະຍາດຈຳນວນ 440 ອັນ, ຊຸດຄຸມໃນການຜ່າຕັດ 1,500 ຊຸດ, ເຄື່ອງປ້ອງກັນໃບໜ້າ 220 ຊຸດ ລວມທັງຖົງສຳລັບຂີ້ເຫຍື້ອບໍ່ອະເຊື້ອ, ຜ້າຢາງກັນເປື້ອນ, ໜ້າກາກໃບໜ້າ N95, ກ່ອງສຳລັບຂີ້ເຫຍື້ອບໍ່ອະເຊື້ອ, ຖົງມື ແລະ ເຄື່ອງອະນາໄມມື, ອຸປະກອນເຫຼົ່ານີ້ແມ່ນຈະໄດ້ຖືກນຳສົ່ງຕໍ່ໄປໃຫ້ບັນດາແຂວງໃນຂອບເຂດທົ່ວປະເທດທີ່ກຳລັງມີຄວາມຕ້ອງການສູງ.

ໂດຍພິທີມອບຮັບດັ່ງກ່າວໄດ້ຈັດຂຶ້ນທີ່ກະຊວງສາທາລະນະສຸກ, ນະຄອນຫຼວງວຽງຈັນ ເມື່ອວັນທີ 10 ກຸມພາ ທີ່ຜ່ານມາ ຕາງໜ້າມອບໂດຍທ່ານ ປອ ປີເຕີ ເຮມ້ອນ ເອກອັກຄະລັດຖະທູດ ສ.ອາເມຣິກາ ປະຈຳ ສປປ.ລາວ ແລະ ຕາງໜ້າຮັບໂດຍທ່ານ ຮສ. ດຣ. ພູທອນ ເມືອງປາກ ຮອງລັດຖະມົນຕີກະຊວງສາທາະລະສຸກ.

ເຊິ່ງການສົ່ງມອບດັ່ງກ່າວເປັນສ່ວນໜຶ່ງຂອງງົບປະມານ 100 ລ້ານໂດລາສະຫະລັດ ທີ່ທ່ານ ໄມ ພອມແພວ ລັດຖະມົນຕີກະຊວງການຕ່າງປະເທດ ສ.ອາເມຣິກາ ປະກາດເມື່ອອາທິດທີ່ຜ່ານມາ ເພື່ອເປັນການຊ່ວຍເຫຼືອໃນສ່ວນຂອງລັດຖະບານ ສ.ອາເມຣິກາຕໍ່ “ທຸກປະເທດ” ທີ່ກຳລັງປະສົບບັນຫານີ້.

ສຳລັບ ສປປ.ລາວ ແມ່ນຍັງບໍ່ມີຜູ້ຕິດເຊື້ອຈຸລະໂລກໂຄໂຣນາສາຍພັນໃໝ່, ເຖິງຢ່າງໃດກໍ່ຕາມ ທ່ານ ທອງລຸນ ສີສຸລິດ ນາຍົກລັດຖະມົນຕີ ກໍ່ໄດ້ອອກຄຳສັ່ງເມື່ອອາທິດ ທີ່ຜ່ານມາ ໃຫ້ກະຊວງການຄ້າ ແລະ ກະຊວງສາທາລະນະສຸກຮ່ວມກັນດຳເນີນການຈັດຊື້ຜ້າອັດປາກໃຫ້ພຽງພໍກັບຄວາມຕ້ອງການພາຍໃນປະເທດ ແລະ ຈະລົງໂທດຜູ້ທີ່ກັກຕຸນ ຫຼື ສວຍໂອກາດຂຶ້ນລາຄາສິນຄ້າດັ່ງກ່າວ.


ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube