ປ.ປູຕິນ ຖະແຫຼງຕໍ່ສະພາປະຊາຊົນ ເລື່ອງການຍົກເລີກຂໍ້ຈຳກັດວາລະການດຳລົງຕຳແໜ່ງປະທານປະເທດ

ລາຍງານ 11 ມີນາ 2020, ທ່ານ ວະລາດິເມຍ ປູຕິນ ປະທານປະເທດລັດເຊຍກ່າວຖະແຫຼງຕໍ່ສະພາຜູ້ແທນປະຊາຊົນ ຫຼື ສະພາດູມາ ໃນນະຄອນຫຼວງມົດສະກູ ເມື່ອວັນອັງຄານ 10 ມີນາ ທີ່ຜ່ານມາ ມີເນື້ອສຳຄັນຕອນໜຶ່ງລະບຸວ່າ: ການຍົກເລີກຂໍ້ຈຳກັດສຳລັບບຸກຄົນໃດໜຶ່ງໃນການດຳລົງຕຳແໜ່ງທາງການເມືອງ ລວມເຖິງຕຳແໜ່ງປະທານປະເທດສາມາດເກີດຂຶ້ນໄດ້ ຫາກສານລັດຖະທຳມະນູນພິຈະລະນາວ່າ ການແກ້ໄຂກົດໝາຍເພື່ອຈຸດປະສົງດັ່ງກ່າວບໍ່ລະເມີດຫຼັກການພື້ນຖານ ແລະ ບົດບັນຍັດໃນມາດຕາໃດກໍ່ຕາມຂອງລັດຖະທຳມະນູນ.

ເຊິ່ງທ່ານ ປູຕິນ ຜູ້ນຳລັດເຊຍ ອາຍຸ 67 ປີ ທີ່ຢູ່ໃນຕຳແໜ່ງສະໄໝປັດຈຸບັນຍາວນານມາຕັ້ງແຕ່ປີ 2012 ກ່າວວ່າລັດເຊຍຍັງຄົງຢູ່ໃນພາວະຕ້ອງຟື້ນຕົວ ຈາກການລົ້ມສະຫຼາຍຂອງສະຫະພາຍໂຊວຽດ ເມື່ອປີ 1991 ໂດຍຫາກສານລັດຖະທຳມູນມີຄຳຕັດສິນເປັນບວກ ຕາມຂໍ້ສະເໜີດັ່ງກ່າວ ໝາຍຄວາມວ່າຫຼັງຄົບວາລະໃນປີ 2024 ທ່ານ ປູຕິນ ຈະສາມາດລົງສະໝັກເລືອກຕັ້ງໄດ້ອີກ ແລະ ມີທ່າອ່ຽງສູງທີ່ຈະໄດ້ຮັບໄຊຊະນະຕໍ່ເນື່ອງອີກ 2 ສະໄໝ ຫຼື 12 ປີ ເທົ່າກັບວ່າ ທ່ານ ປູຕິນ ອາດດຳລົງຕຳແໜ່ງຜູ້ນຳລັດເຊຍຍາວນານເຖິງປີ 2036.

ໃນດ້ານຂອງສະພາດູມີມີກຳນົດແກ້ໄຂຮ່າງລັດຖະທຳມະນູນສະບັບໃໝ່ແທນສະບັບປັດຈຸບັນທີ່ໃຊ້ມາຕັ້ງແຕ່ປີ 1993 ເປັນຮອບທີ 3 ເຊິ່ງຖືເປັນຄັ້ງສຸດທ້າຍໃນວັນພຸດທີ 11 ມີນານີ້, ຫຼັງລົງມະຕິຮັບຮອງເມື່ອຕົ້ນອາທິດດຽວກັນ ຕໍ່ຈາກນັ້ນຈະເຂົ້າສູ່ການລົງປະຊາມະຕິຂອງປະຊາຊົນລັດເຊຍ ໃນວັນທີ 22 ເມສານີ້, ໂດຍທ່ານ ປູຕິນໄດ້ປະກາດຈຸດປະສົງຊັດເຈນເລື່ອງການປະຕິຮູບລັດຖະທຳມະນູນຄັ້ງໃຫຍ່ ເມື່ອກາງເດືອນມັງກອນ ທີ່ຜ່ານມາ, ເຖິງຈະລະບຸການກະຈາຍອຳນາດຈາກປະທານປະເທດ ແຕ່ຍັງຮັກສາທ່າທີເລື່ອງການຮັກສາອຳນາດເພື່ອເປັນຜູ້ນຳຕະຫຼອດການ.