WHO ເຕືອນໂຄວິດ-19 ບໍ່ປານີໃຜທັງນັ້ນ ການໃຊ້ຊີວິດແບບສຸ່ມສ່ຽງນັ້ນຄືຄວາມເປັນ ແລະ ຄວາມຕາຍ

ລາຍງານ 21 ມີນາ 2020, ທ່ານ ເທດຼອສ ແອດຮານອມ  ເກເບຼເຢຊຸສ (Tedros Adhanom Ghebreyesus ) ຜູ້ອຳນວຍການອົງການອະນາໄມໂລກ (WHO) ຖະແຫຼງເມື່ອວັນສຸກທີ່ຜ່ານມາ ກ່ຽວກັບສະຖານະການການແຜ່ລະບາດຂອງເຊື້ອໄວຣັດໂຄໂຣນາສາຍພັນໃໝ່ ຫຼື ໂລກໂຄວິດ-19 ວ່າ: ເຖິງແມ່ນວ່າກຸ່ມທີ່ສ່ຽງທີ່ສຸດຄືຜູ້ສູງອາຍຸ ແຕ່ເຊື້ອໂລກດັ່ງກ່າວບໍ່ເຄີຍປານີໃຜ ກຸ່ມຄົນໄວໜຸ່ມກໍ່ເຊັ່ນກັນ, ຈາກການປະເມີນຂໍ້ມູນທີ່ຫຼາຍປະເທດສົ່ງເຂົ້າມາພົບວ່າ ຜູ້ປ່ວຍອາຍຸຕ່ຳກວ່າ 50 ປີ ຈຳນວນຫຼາຍຕ້ອງໄດ້ໃຊ້ເຄື່ອງຊ່ວຍຫາຍໃຈ.

ທ່ານ ເທດຼອດກ່າວຕໍ່ອີກວ່າ ດ້ວຍເຫດນີ້ຈຶ່ງຂໍເຕືອນເພື່ອກະຕຸ້ນຈິດສຳນຶກຂອງກຸ່ມຄົນໄວໜຸ່ມໃນທົ່ວໂລກໃນຕອນນີ້ວ່າ ເຖິງຈະຄິດວ່າຕົນເອງແຂງແຮງພຽງໃດກໍ່ຕາມ ແຕ່ຫາກຕິດໂລກໂຄວິດ-19 ແລ້ວ ເຊື້ອໂລກກໍ່ສາມາດເຮັດໃຫ້ຜູ້ທີ່ອາຍຸນ້ອຍຕ້ອງໄດ້ປິ່ນປົວຢູ່ໂຮງໝໍຫຼາຍອາທິດ ຫຼື ອາດເຖິງຂັ້ນເສຍຊີວິດ, ການໃຊ້ຊີວິດນອກເຄຫະສະຖານໃນຕອນນີ້ຂໍໃຫ້ເພີ່ມການພິຈາລະນາຢ່າງຖີ່ຖ້ວຍ ເນື່ອງຈາກການຕັດສິນໃຈເດີນທາງໄປສະຖານທີ່ແຫ່ງໃດກໍ່ຕາມ ອາດເປັນການເຮັດໃຫ້ຊີວິດຂອງໃຜບາງຄົນຕົກຢູ່ໃນສະພາບລະຫວ່າງຄວາມເປັນກັບຄວາມຕາຍ.

ກ່ຽວກັບການບັນຫາເຄື່ອງມືການແພດທີ່ທົ່ວໂລກກຳລັງຂາດແຄນຢ່າງໜັກໜ່ວງ ທ່ານ ເທດຼອສ ກ່າວວ່າ WHO ຈັດສົ່ງຊຸດກວດຫຼາຍກວ່າ 1.5 ລ້ານຊຸດກະຈາຍໄປໃຫ້ຫຼາຍປະເທດທີ່ຕິດຕໍ່ຂໍຮັບແລ້ວ ແຕ່ທ່າມກາງສະຖານະການທີ່ເປັນຢູ່ຄວາມຕ້ອງການໃຊ້ຊຸດກວດສູງກວ່າປົກກະຕິເຖິງ 80 ເທົ່າ ເຊິ່ງ WHO ປະສານກັບຈີນໃຫ້ຊ່ວຍຜະລິດອຸປະກອນການແພດໂດຍສະເພາະຊຸດກວດໂຄວິດ-19, ໜ້າກາກອະນາໄມ, ຊຸດປ້ອງກັນ ແລະ ເຄື່ອງຊ່ວຍຫາຍໃຈ ແລ້ວສົ່ງໄປຍັງສາງຂອງ WHO ທີ່ເມືອງດູໄບ ໃນສະຫະນະຄອນ ເອເມຣັດ ອາຣັບ (UAE).

ຂະນະດຽວກັນ ຜູ້ອຳນວຍການ WHO ກ່າວເຖິງຂໍ້ສົມມຸດທີ່ວ່າ ການໃຊ້ຢາຕ້ານການອັກເສບເຊັ່ນ: ໄອບູໂພຣເຟນ ໃນຜູ້ຕິດເຊື້ອໂຄວິດ-19 ອາດກະຕຸ້ນການເຮັດວຽກຂອງເອນຊາຍຊະນິດໜຶ່ງໃນຮ່າງກາຍ ຈົນເຮັດໃຫ້ອາການຮຸນແຮງຂຶ້ນ ວ່າຍັງບໍ່ມີຫຼັກຖານທີ່ຊັດເຈນວ່າການໃຊ້ຢາດັ່ງກ່າວກໍ່ໃຫ້ເກີດຜົນເສຍກັບຜູ້ຕິດເຊື້ອໂຄວິດ-19, ນອກຈາກຜົນຂ້າງຄຽງປົກກະຕິຂອງຢາ ແຕ່ກຳລັງມີການປຶກສາຫາລືຢ່າງລະອຽດກັບແພດໝໍທົ່ວໂລກ ໃນການໃຊ້ຢາຫຼຸດໄຂ້ໃຫ້ກັບຜູ້ຕິດໂລກໂຄວິດ-19.

ເຊິ່ງທ່ານ ເທດຼອສຢືນຢັນວ່າ ເຖິງແມ່ນວ່າເຊື້ອໄວຣັສໂຄໂຣນາສາຍພັນໃໝ່ເຮັດໃຫ້ໂລກຕົກຢູ່ໃນພາວະ “ໂລກລະບາດຄັ້ງໃຫຍ່” ແຕ່ບໍ່ໝາຍຄວາມວ່າມະນຸດຈະບໍ່ສາມາດເອົາຊະນະສິ່ງທີ່ເບິ່ງບໍ່ເຫັນດ້ວຍຕາເປົ່ານີ້ໄດ້, ໂດຍຜູ້ອຳນວຍການ WHO ຍົກຕົວຢ່າງສະຖານະການໃນຈີນທີ່ມີທິດທາງດີຂຶ້ນເປັນລຳດັບ ຈົນບໍ່ພົບຜູ້ຕິດເຊື້ອພາຍໃນປະເທດຕັ້ງແຕ່ຊ່ວງທ້າຍອາທິດນີ້ ສາມາດເປັນແຮງບັນດານໃຈໃຫ້ກັບທົ່ວໂລກໃຫ້ປະສົບຄວາມສຳເລັດໃນການກອບກູ້ສະຖານະການ ເຖິງຈະຢູ່ໃນພາວະອັນໂຫດຮ້າຍທີ່ສຸດ.