ນາຍົກລັດຖະມົນຕີລັດເຊຍຕິດເຊື້ອໂຄວິດ-19, ຂະນະທີ່ປະຊາຊົນຕິດເຊື້ອແລ້ວກວ່າ 1 ແສນຄົນ

ລາຍງານ 1 ພຶດສະພາ 2020, ທ່ານ ມິຄາອິວ ມິຊຸສຕິນ ນາຍົກລັດຖະມົນຕີລັດເຊຍ ລາຍງານຕໍ່ທ່ານ ວະລາດິເມຍ ປູຕິນ ປະທານປະເທດລັດເຊຍຜ່ານທາງລະບົບປະຊຸມທາງໄກ ເມື່ອວັນພະຫັດທີ່ຜ່ານມາ ວ່າຕົນຕິດເຊື້ອຈຸລະໂລກໂຄໂຣນາສາຍພັນໃໝ່ ຫຼື ໂຄວິດ-19 ແລະ ກຳລັງກັກຕົວເພື່ອປິ່ນປົວຢູ່ໂຮງໝໍແຫ່ງໜຶ່ງໃນນະຄອນຫຼວງມົດສະກູ, ຂະນະດຽວກັນທ່ານ ມິຄາອິວ ມິຊຸສຕິນ ໄດ້ຂໍໃຫ້ທ່ານ ປູຕິນ ແຕ່ງຕັ້ງບຸກຄົນໃນຄະນະລັດຖະມົນຕີ ໃຫ້ປະຕິບັດໜ້າທີ່ຮັກສາການໃນຕຳແໜ່ງນາຍົກລັດຖະມົນຕີແທນຕົນໄປກ່ອນ.

ຂະນະທີ່ທ່ານ ປູຕິນ ບໍ່ໄດ້ສະແດງທ່າທີຕົກຕື່ນ ໂດຍກ່າວວ່າທຸກຄົນລ້ວນມີຄວາມສ່ຽງທີ່ຈະຕິດໂຄວິດ-19 ແລະ ອວຍພອນໃຫ້ທ່ານ ມິຄາອິວ ມິຊຸສຕິນຈົ່ງຊ່ວງເຊົາໂດຍໄວ ພ້ອມກ່າວວ່າຕົນເຫັນດີກັບຂໍ້ສະເໜີໃນການແຕ່ງຕັ້ງຮັກສາການນາຍົກລັດຖະມົນຕີ ເຊິ່ງຕໍ່ມາທ່ານ ປູຕິນ ໄດ້ມອບໝາຍໜ້າທີ່ດັ່ງກ່າວໃຫ້ກັບທ່ານ ອັງເດຼ ເບລູຊັອບ ຮອງນາຍົກລັດຖະມົນຕີຄົນທຳອິດຮັກສາການແທນ ແຕ່ຢືນຢັນວ່າຫາກໃນລະຫວ່າງນີ້ຕ້ອງມີການຕັດສິນໃຈໃນບັນຫາສຳຄັນ ຄະນະລັດຖະມົນຕີຕ້ອງຂໍຄວາມເຫັນຈາກທ່ານ ມິຄາອິວ ມິຊຸສຕິນກ່ອນ.

ເຊິ່ງທ່ານ ມິຄາອິວ ມິຊຸສຕິນເປັນເຈົ້າໜ້າທີ່ລະດັບສູງສຸດຂອງລັດຖະບານລັດເຊຍ ທີ່ຕິດເຊື້ອໂຄວິດ-19 ແລະ ການປະກາດວ່າຕິດເຊື້ອດັ່ງກ່າວຂອງນາຍົກລັດຖະມົນຕີລັດເຊຍ ເກີດຂຶ້ນໃນວັນດຽວກັບທີ່ສູນຕອບໂຕ້ໂຄວິດ-19 ຂອງລັດເຊຍລາຍງານວ່າ ມີຜູ້ຕິດເຊື້ອໂຄວິດ-19 ລາຍໃຫ້ອີກ 7,099 ຄົນໃນຮອບ 24​ ຊົ່ວໂມງ ຖືເປັນສະຖິຕິລາຍວັນສູງທີ່ສຸດ ເພີ່ມຈຳນວນຜູ້ຕິດເຊື້ອສະສົມເປັນ 106,498 ຄົນ, ສ່ວນຜູ້ເສຍຊີວິດເພີ່ມຂຶ້ນອີກ 101 ຄົນ ເຮັດໃຫ້ຈຳນວນຜູ້ເສຍຊີວິດສະສົມເພີ່ມເປັນ 1,073 ຄົນແລ້ວ, ສ່ວນຜູ້ທີ່ໄດ້ຮັບການປິ່ນປົວດີແລ້ວມີ 11,619 ຄົນ.

ສະຖິຕິດັ່ງກ່າວເຮັດໃຫ້ລັດເຊຍກາຍເປັນປະເທດທີ່ 8 ຂອງໂລກທີ່ມີຜູ້ຕິດເຊື້ອສະສົມຈາກໂຄວິດ-19 ຫຼາຍກວ່າ 100,000​ ຄົນ ຖັດຈາກ ສ.ອາເມຣິກາ, ແອັດສະປາຍ, ອິຕາລີ, ຝຣັ່ງ, ອັງກິດ, ເຢຍລະມັນ ແລະ ຕວັກກີ, ໃນດ້ານຂອງທ່ານ ປູຕິນ ໄດ້ຂະຫຍາຍເວລາການປິດປະເທດອອກໄປຈົນເຖິງວັນທີ 11 ພຶດສະພາ 2020.