ສຳນັກຂ່າວກອງ ສ.ອາເມຣິກາວ່າໂຄວິດ-19 ບໍ່ແມ່ນສີມືມະນຸດ, ສ່ວນ ປ.ທຣຳ ເຊື່ອວ່າເປັນຜົນຜະລິດຈາກຈີນ

ລາຍງານ 1​ ພຶຶດສະພາ 2020, ສຳນັກຂ່າວກອງແຫ່ງຊາດ ສ.ອາເມຣິກາ (ODNI) ເຊິ່ງເປັນຕົ້ນສັງກັດຂອງໜ່ວຍຂ່າວກອງ 16 ແຫ່ງ ລວມທັງສຳນັກຂ່າວກອງກາງ (CIA) ອອກຖະແຫຼງການເມື່ອວັນພະຫັດ (30 ເມສາ) ທີ່ຜ່ານມາ ວ່າປະຊາຄົມຂ່າວກອງມີຄວາມເຫັນໃນທິດທາງດຽວກັນ ຕາມການວິເຄາະບົນພື້ນຖານທາງວິທະຍາສາດ ວ່າເຊື້ອຈຸລະໂລກໂຄໂຣນາສາຍພັນໃໝ່ ຫຼື ໂຄວິດ-19 ບໍ່ແມ່ນສິ່ງທີ່ມະນຸດສ້າງຂຶ້ນ ຫຼື ເປັນການຕັດຕໍ່ທາງພັນທຸກຳ ແຕ່ຈະກວດສອບຕໍ່ໄປວ່າເຊື້ອໂລກດັ່ງກ່າວມາຈາກສັດ ຫຼື ເຊື່ອມໂຍງກັບຫ້ອງທົດລອງໃນຈີນຫຼືບໍ່?.

ເຊິ່ງໜ່ວຍຂ່າວກອງສ່ວນໃຫຍ່ຍັງບໍ່ເຊື້ອວ່າຈະພົບຫຼັກຖານທີ່ຈະສາມາດເຊື້ອໂຍງໄປຍັງຫ້ອງປະຕິບັດການ ແລະ ນັກວິທະຍາສາດທີ່ສຶກສາພັນທຸກຳຂອງເຊື້ອຈຸລະໂລກສາຍພັນໃໝ່ກໍ່ລະບຸວ່າ ເປັນໄປໄດ້ສູງທີ່ເຊື້ອຈຸລະໂລກດັ່ງກ່າວແຜ່ລະບາດຈາກສັດມາສູ່ມະນຸດ ໃນສະພາບແວດລ້ອມທີ່ບໍ່ແມ່ນຫ້ອງປະຕິບັດການເຊັ່ນດ່ຽວກັບກໍລະນີເຊື້ອ HIV, ອີໂບລາ (Ebola) ແລະ ໂລກຊາ (SARE).

ເຖິງຢ່າງໃດກໍ່ຕາມ, ທ່ານ ໂດໂນ ທຣຳ ປະທານປະເທດ ສ.ອາເມຣິກາ ກ່າວໃນວັນດຽວກັນ ຢືນຢັນຄວາມເຊື່ອໝັ້ນຂອງຕົນເອງວ່າ ເຊື້ອໂຄວິດ-19 ທີ່ເຮັດໃຫ້ມີຜູ້ເສຍຊີວິດແລ້ວໄປກວ່າ 230,000 ຄົນໃນທົ່ວໂລກ ຈາກຈຳນວນດັ່ງກ່າວຫຼາຍກວ່າ 63,000 ຄົນເປັນຜູ້ເສຍຊີວິດໃນ ສ.ອາເມຣິກາ ອາດມາຈາກຫ້ອງປະຕິບັດການດ້ານຈຸລະໂລກວິທະຍາໃນເມືອງອູຫັ້ນ ຂອງ ສປ.ຈີນ.

ເມື່ອນັກຂ່າວຊັກຖາມວ່າ ດ້ວຍເຫດໃດຈຶ່ງໝັ້ນໃຈຂະໜາດນັ້ນ ແລະ ມີຫຼັກຖານຫຼືບໍ່?, ທ່ານ ໂດໂນ ທຣຳຕອບວ່າ ມີແຕ່ບອກບໍ່ໄດ້ ແລະ ກ່າວຕໍ່ໄປວ່າ ຕົນກຳລັງພິຈາລະນາໃຊ້ມາດຕະການກຳແພງພາສີຮອບໃໝ່ກັບ ສປ.ຈີນ ເພື່ອຕອບໂຕ້ສະຖານະການທີ່ເກີດຂຶ້ນ.

ເຖິງຢ່າງໃດກໍ່ຕາມ, ສະຖາບັນຈຸລະໂລກວິທະຍາແຫ່ງເມືອງອູຫັ້ນ ໄດ້ອອກມາປະຕິເສດແລ້ວຫຼາຍຄັ້ງ ກ່ຽວກັບຂໍ້ກ່າວຫາຂອງຫຼາຍຝ່າຍ ໂດຍສະເພາະຈາກຕາເວັນຕົກ ວ່າຫ້ອງປະຕິບັດການແຫ່ງນີ້ ຄືຕົ້ນກຳເນີດຂອງເຊື້ອຈຸລະໂລກໂຄໂຣນາສາຍພັນໃໝ່ ແລະ ເປັນແຫຼ່ງປ່ອຍເຊື້ອໂລກດັ່ງກ່າວ.




ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube