ຜູ້ນຳເກົາຫຼີເໜືອປາກົດຕົວເປັນຄັ້ງແລກ ພາຍຫຼັງມີຂ່າວຊ່າລືວ່າໄດ້ຈາກໂລກນີ້ໄປແລ້ວ

ລາຍງານ 2 ພຶດສະພາ 2020, ສຳນັກຂ່າວກາງເກົາຫຼີ (KNCA) ກະບອກສຽງຂອງລັດຖະບານເກົາຫຼີເໜືອລາຍງານວ່າ ທ່ານ ຄິມ ຈອງ-ອຶນ ຜູ້ນຳສູງສຸດຂອງເກົາຫຼີເໜືອ ໄດ້ເດີນທາງໄປຍັງເມືອງຊັນຊອນ ແຂວງພະຢອງອັນໃຕ້ ໃກ້ກັບນະຄອນຫຼວງປຽງຢາງ ເມື່ອວັນສຸກ (1 ພຶດສະພາ) ທີ່ຜ່ານມາ ເພື່ອເປັນປະທານໃນພິທີເປີດໂຮງງານຜະລິດປຸ໋ຍແຫ່ງໃໝ່, ໂດຍມີບຸກຄົນໃກ້ຊິດຕິດຕາມໄປດ້ວຍ 3 ຄົນຄື: ທ່ານ ນາງ ຄິມ ໂຢ-ຈອງ ນ້ອງສາວ, ທ່ານ ປາກ ປອງ-ຈູ ຮອງປະທານຄະນະກຳມະການສູນກາງພັກແຮງງານເກົາຫຼີ ແລະ ທ່ານ ຄິມ ແຈ-ຣະຢອງ ນາຍົກລັດຖະມົນຕີ.

ການເຄື່ອນໄຫວດັ່ງກ່າວຖືເປັນການປາກົດຕົວຢ່າງເປັນທາງການຄັ້ງທຳອິດໃນຮອບ 21 ວັນຂອງທ່ານ ຄິມ ຈອງ-ອຶນ ພາຍຫຼັງທີ່ KCNA ລາຍງານພ້ອມເຜີຍແຜ່ຮູບພາບຄັ້ງຫຼ້າສຸດ ເມື່ອວັນທີ 11 ເມສາ ທີ່ຜ່ານມາ ເປັນພາບການປະຊຸມຂອງຄະນະກຳມະການກົມການເມືອງສູນກາງພັກແຮງງານເກົາຫຼີ ແຕ່ຫຼັງຈາກນັ້ນກໍ່ບໍ່ໄດ້ປາກົດຕົວຕໍ່ສື່ມວນຊົນອີກ, ໂດຍສະເພາະຢ່າງຍິ່ງບໍ່ໄດ້ເຂົ້າຮ່ວມໃນພິທີລະນຶກຂອງຄອບຄົວ ນັ້ນກໍ່ຄືວັນຄ້າຍວັນເກີດ 108 ປີຂອງທ່ານ ຄິມ ອິວ-ຊຸງ ຜູ້ສ້າງຕັ້ງປະເທດ ແລະ ປະທານປະເທດຕໍ່ຫຼອດການຂອງເກົາຫຼີເໜືອ ຫຼື ຜູ້ເປັນປູ່ ເມື່ອວັນທີ 15 ເມສາ ທີ່ຜ່ານມາ ອັນໄດ້ເຮັດໃຫ້ເກີດກະແສການຄາດເດົາໄປຕ່າງໆນາໆ.

ຂະນະທີ່, Daily NK ເຊິ່ງເປັນໜຶ່ງໃນສື່ອິດສະຫຼະຕິດຕາມສະຖານະການໃນເກົາຫຼີເໜືອລາຍງານ ໂດຍອ້າງແຫຼ່ງຂ່າວວ່າທ່ານ ຄິມ ຈອງ-ອິນ ເຂົ້າຜ່າຕັດລະບົບຫຼອດເລືອດ ແລະ ຫົວໃຈ ເມື່ອວັນທີ 12 ເມສາ ທີ່ຜ່ານມາ, ແຕ່ CNN ຂອງ ສ.ອາເມຣິກາລາຍງານເພີ່ມວ່າ ມີອາການໜັກ ອັນຍິ່ງເພີ່ມການຄາດເດົາໄປອີກວ່າ ທ່ານຜູ້ນຳຂອງເກົາຫຼີເໜືອລົ້ມປ່ວຍໜັກ ຫຼື ອາດເສຍຊີວິດແລ້ວ, ແຕ່ລັດຖະບານເກົາຫຼີໃຕ້ກໍ່ໄດ້ອອກມາຢືນຢັນວ່າຂ່າວຂອງ Daily NK ເປັນຂ່າວປອມ.

ເຖິງຢ່າງໃດກໍ່ຕາມ, ເກົາຫຼີເໜືອບໍ່ເຄີຍສະແດງຈຸດຢືນຕໍ່ຄຳວິຈານຕ່າງໆນາໆຈາກໂລກພາຍນອກ ໂດຍສະເພາະທີ່ມາຈາກສື່ຕາເວັນຕົກທີ່ກ່ຽວກັບເລື່ອງສ່ວນຕົວຂອງຜູ້ນຳ, ຫວນຄືນໄປໃນລະຫວ່າງເດືອນກັນຍາ ເຖິງເດືອນຕຸລາ 2014 ທ່ານ ຄິມ ຈອງ-ອຶນ ບໍ່ປາກົດຕົວ 41 ວັນ ໄລຍະນັ້ນກໍ່ມີກະແສຂ່າວແບບນີ້ເຊັ່ນກັນວ່າ ເສຍຊີວິດແລ້ວ, ແຕ່ລັດຖະບານເກົາຫຼີເໜືອບໍ່ເຄີຍອອກມາແກ້ຂ່າວ ຈົນໄດ້ມີການນຳສະເໜີຮູບພາບຂອງທ່ານ ຄິມ ຈອງ-ອຶນ ລົງຢ້ຽມຢາມ ແລະ ຖືໄມ້ຄອນເທົ້າ ແລະ ເກົາຫຼີໃຕ້ເປັນຜູ້ໃຫ້ຂໍ້ມູນວ່າ ຜູ້ນຳເກົາຫຼີເໜືອເຂົ້າຜ່າຕັດຫົວເຂົ່າ.