ຄົບຮອບ 75 ປີ ກອງທັບແດງໂຊວຽດບຸກຍຶດແບັກແລັງ, ຈຸດຈົບສົງຄາມໂລກ ຄັ້ງທີ II ໃນເອີຣົບ

ສະໜາມຮົບເອີຣົບ ເປັນສະໜາມຮົບແຫ່ງອຳອິດທີ່ເປີດສາກຈູດຊະນວນສົງຄາມໂລກ ຄັ້ງທີ II ໂດຍເລີ່ມຈາກການບຸກຕີເຂົ້າດິນແດນປະເທດໂປໂລຍ ແບບສາຍຟ້າແມບຂອງກອງທັບທະຫານຟາຊິດເຢຍລະມັນ 57 ກອງພັນ ພ້ອມດ້ວຍເຮືອບິນສູ້ຮົບ 3,000 ລຳ ແລະ ລົດຕັງ ໃນວັນທີ 1 ກັນຍາ 1939, ຈາກເຫດນີ້ ຝຣັ່ງ ແລະ ອັງກິດທີ່ເປັນພັນທະມິດຂອງໂປໂລຍກໍ່ໄດ້ປະກາດສົງຄາມກັບເຢຍລະມັນ.

ແຜນການຮົບໃນສະໜາມຮົບເອີຣົບຂອງເຢຍລະມັນໄດ້ດຳເນີນໄປຢ່າງວ່ອງໄວ, ມາຮອດເດືອນເມສາ 1940 ສາມາດຍຶດຄອງດິນແດນໃນຫຼາຍສ່ວນຂອງທະວີບເອີຣົບ, ວັນທີ 22 ມິຖຸນາ 1940 ປາຊິດເຢຍລະມັນໄດ້ບັງຄັບໃຫ້ນາຍພົນເປແຕັງ ຂອງຝຣັ່ງຍອມຈຳນົນ, ຈາກນັ້ນ ຟາຊິດເຢຍລະມັນກໍ່ໄດ້ຮ່ວມມືກັບຟາຊິດອິຕາລີເປີດກວ້າງຂະຫຍາຍສົງຄາມຢູ່ທາງພາກໃຕ້ ແລະ ຕາເວັນອອກສຽງໃຕ້ຂອງທະວີບເອີຣົບ.

ວັນທີ 22 ມິຖຸນາ 1941 ຟາຊິດເຢຍລະມັນໄດ້ບຸກໂຈມຕີເຂົ້າສະຫະພາບໂຊວຽດ ໂດຍບໍ່ປະກາດສົງຄາມທີ່ໃຊ້ກຳລັງພົນເຖິງ 190 ກອງພົນ ເພື່ອຍຶດເອົາເມືອງມົດສະກູ, ແຕ່ພໍມາຮອດເດືອນກຸມພາ 1942 ກອງທັບເຢຍລະມັນໄດ້ຖືກກອງທັບແດງແຫ່ງສະຫະພາຍໂຊວຽດບຸກໂຈມຕີຕໍ່ຕ້ານຄືນ ແລະ ຖືກດັບສູນເຖິງ 50 ກອງພັນ.

ມາຮອດທ້າຍປີ 1943 ກອງທັບແດງໂຊວຽດໄດ້ດຳເນີນການບຸກໂຈມຕີກອງທະຫານຟາຊິດເຢຍລະມັນໃຫ້ປະລາໄຊໃນບັ້ນຮົບສະຕາລິນກຣາດ ແລະ ເປັນເຈົ້າການໃນການບຸກຕີເຢຍລະມັນໃນທຸກສະໜາມຮົບ.

ມາຮອດປີ 1944 ກອງທັບແດງໂຊວຽດສາມາດປົດປ່ອຍດິນແດນປະເທດຕ່າງໆໃນເອີຣົບອອກຈາກການຄອບຄອງຂອງຟາຊິດເຢຍລະມັນເຊັ່ນ: ຣູມານີ, ອານບານີ ແລະ ຢູໂກສະລາວີ.

ຂະບວນການຕີຕ້ານຟາຊິດເຢຍລະມັນໄດ້ມີຄວາມເຂັ້ມຂຸ້ນຂຶ້ນ ຫຼັງຈາກທີ່ ສ.ອາເມຣິກາ ແລະ ອັງກິດໄດ້ຍົກກຳລັງສົມທົບກັບຝຣັ່ງທີ່ນອກມັງດີ ໃນວັນທີ 6 ມິຖຸນາ 1944 ຈາກນັ້ນກອງທັບສຳພັນທະມິດກໍ່ດຳເນີນການປົດປ່ອຍຕົວເມືອງປາຣີສຳເລັດ ໃນວັນທີ 19 ສິງຫາ 1944.

ພາຍຫຼັງສິ້ນສຸດການຂັບໄລ່ຟາຊິດອອກຈາກດິນແດນຂອງຕົນແລ້ວ, ໃນລະດູໃບໄມ້ປົ່ງປີ 1945 ກອງເສນາທິການໃຫຍ່ແຫ່ງກອງທັບແດງໂຊວຽດ ໄດ້ຮ່າງແຜນການດັບສູນສັດຕູຂັ້ນສຸດທ້າຍ, ເມື່ອວັນທີ 19 ເມສາ 1945 ກອງທະຫານໂຊວຽດໄດ້ມຸ່ງໜ້າສູ່ແບັກແລັງ ການຕໍ່ສູ້ທາງພາກພື້ນດິນ ແລະ ທາງອາກາດໄດ້ດຳເນີນໄປທັງເວັນ ແລະ ຄືນໂດຍໃຊ້ເວລາ 10 ມື້ຈຶ່ງສຳເລັດ.

ຕອນຮຸ່ງແຈ້ງຂອງວັນທີ 30 ເມສາ 1945 ກອງທະຫານໂຊວຽດໄດ້ບຸກໂຈມຕີ ແລະ ຍຶດຕຶກເລສະຕາກ ເຊິ່ງເປັນສຳນັກງານຂອງລັດຖະບານເຢຍລະມັນ ແລະ ສາມາດຍຶດເອົາແບັກແລັງ ໃນວັນທີ 2 ພຶຶດສະພາ 1945.

ວັນທີ 8 ພຶດສະພາ 1945 ນາຍພົນເຮືອນກາໂດນິກ ແຫ່ງເຢຍລະມັນໄດ້ປະກາດຍອມຈຳນວນຢ່າງບໍ່ມີເງື່ອນໄຂຕໍ່ຝ່າຍສຳພັນທະມິດ ເຮັດໃຫ້ສົງຄາມໂລກຄັ້ງທີ II ໃນສະໜາມຮົບເອີຣົບສິ້ນສຸດລົງ.




ຕິດຕາມພວກເຮົາທາງ Twitter

ຕິດຕາມພວກເຮົາທາງ Youtube